Ով անտեսեց Փաշինյանի՝ Գյումրիում տրված հանձնարարությունները. վարչապետի պարզաբանումը SHANTNEWS.am-ին

ՀՀ վարչապետ Նիկոլ Փաշինյանի հետ հանդիպմանը SHANTNEWS.am-ի թղթակիցը հիշեցրեց՝ վարչապետի՝ Գյումրի այցը, դրան հաջորդած աշխուժությունն ու նաև այն,որ  հետո ամեն ինչ դարձավ առաջվանը: Նախօրեին Գյումրիում հերթական քննարկումն էր կազմակերպվել փողոցաշինական թեմայով, որին հրավիրված են եղել և շինարարները, և վերահսկողական ծառայության ներկայացուցիչները, և քաղաքապետարանի աշխատակիցները: Քննարկմանը, սակայն, մարդ չի եկել: Այնպես որ, շատ բան չի փոխվել: Սա է թղթակցի դիտարկումը:

«Դուք ցույց էիք տալիս ժամանակավոր լուծումները, որ կանանց կոշիկների կրունկները ցեխերի կամ խճաքարերի մեջ չմխրճվեն: Ես շրջել եմ, բայց գոնե մեկ օրինակ չեմ տեսել, որակի մասին հերթը չի հասել խոսելու: Հենց հիմա համացանցում բազմաթիվ լուսանկարներ կան, որոնցից երևում է՝ օրեր առաջ տեղադրված մայթերի եզրաքարերը շրջվել են: Ավտոմաքսատունը Գյումրի տեղափոխելու հետ կապված՝ նշեցիք, որ հարցը քննարկվում է: Մինչև կքննարկվի, ուզում եմ հիշեցնել՝ առհասարակ մինչև հիմա Երևանից ոչ մի բան Գյումրի չի տեղափոխվել: 10 տարի խոսվում էր, որ մշակույթի և սպորտի նախարարությունները պետք է տեղափոխվեն Գյումրի, մարդիկ ուրախացան, անգամ տեղեր գտան, բայց ոչինչ տեղի չունեցավ»,- ասաց նա՝ նշելով, որ Գյումրիում գերզգայուն են մարդիկ, նշելով, որ սա ոչ թե հարց էր, այլ մտահոգություն, լրագրողական դիտարկում կամ ինֆորմացիա, որ ուզում էր փոխանցել:

Փաշինյանը տեղեկացրեց, որ երեկ քննարկում է եղել, Շիրակի մարզպետը կարծում է, որ պրոբլեմը հասունացել է այնքան, որ պետք է քրեական գործ հարուցվի:

«Ինքն այդ տեսակետին է, բայց իրավապահները ոգևորված չեն այդ տեսակետով, չեն կիսում այդ տեսակետը: Այն, ինչի մասին խոսում եք, ընդունելի չէ: Մարզպետն ասում է՝ պրոբլեմը հասունացել է մինչև այն կետը, որ քրգործ պետք է հարցուվի: Ես պիտի ապահովեմ, որ իրոք օբյեկտիվ որոշում կայացվի: Ասվում է այսպիսի բան, բաց խոսեմ, շատ մարզերում իրավապահներում աշխատում են մարդիկ, ովքեր վերջին 10 տարում անընդհատ աշխատում էին, շատ դեպքերում ջանասիրություն չէին գործադրում, որ գործերին համապատասխան ընթացք տան: Սա հաստատված իրողություն չէ: Պետք է ուշադիր լինեմ, մարզպետն ասում է՝ այսպիսին է վիճակը, պետք է քրգործ հարուցվի, հասկանանք՝ ինչ է կատարվում. եթե իրոք քրգործ հարուցելու հիմքեր կան, հարուցենք, եթե դա լուծում է: Չի կարելի մարդկանց նյարդերի հետ այդպես խաղալ, դա անթույլատրելի է»,- ասաց վարչապետը:

Փաշինյանն ասաց, որ չի ուզում՝ բոլոր հարցերն ինքը որոշի, ասի՝ «բորդյուր»-ի հարցը այսպես անենք, կարծում է՝ պետք է մեխանիզմներ ստեղծեն, որ ամեն ինչ մի մարդու ճաշակից կախված չլինի:

«Համակարգը գուցե այդքան արագ չի աշխատում, բայց սա է ճիշտ ճանապարհը: Դուք էլ հետևողական եղել, ահազանգեք, հրապարակեք, լավ իմաստով ճնշում գործադրեք»,- նշեց նա: