«Սպառազինությունների առևտուրը բանջարեղենի առևտուր չէ». ՀՀ ԱԳ նախարարը՝ ադրբեջանա-իսրայելական ռազմական գործակցության մասին

ՀՀ ԱԳ նախարար Էդվարդ Նալբանդյանը Իսրայել կատարած այցի ժամանակ հարցազրույց է տվել այդ երկրի հանրային հեռուստատեսությանը: Պատասխանելով լրագրողի հարցին, թե հազվադեպ երևույթ է, որ Հայաստանի ԱԳ նախարարն այցելում է Իսրայել՝ Էդվարդ Նալբանդյանն ասել է.

«Ավելի շուտ կասեի՝ շատ հազվադեպ է, երբ Իսրայելի ԱԳ նախարարն է հյուրընկալվում Հայաստանում: Հայաստանի բոլոր ԱԳ նախարարներն այցելել են Իսրայել: Ես գրեթե տասը տարի եղել եմ Իսրայելում ՀՀ դեսպան, ուստի սա իմ առաջին այցելությունը չէ Իսրայել։ Մշտապես ուրախ եմ վերադառնալ Երուսաղեմ»:

ՀՀ ԱԳ նախարարն ասել է, որ իր պաշտոնական այցը կազմակերպվել է Իսրայելի վարչապետ, ԱԳ նախարար Բենիամին Նեթանյահուի հրավերով: Կարճ, բայց բավական հագեցած է եղել: Վարչապետ Նեթանյահուի, տարածաշրջանային համագործակցության նախարար Ցախի Հանեգբիի, Երուսաղեմի հարցերով նախարար Զեև Էլկինի, խորհրդարանի խոսնակ Յուլի Էդելշտեյնի, խորհրդարանի փոխխոսնակ Թալի Պլոսկովի հետ հանդիպումների ժամանակ քննարկվել են միջպետական համագործակցության բազմաթիվ հարցեր, որոնք կապված են կապերը խորացնելու և գործակցության նոր ոլորտներ ստեղծելու հետ:

Լրագրողի հարցին, թե ինչպիսին են Նալբանդյանի ակնկալիքներն Իսրայելից Հայոց ցեղասպանության ճանաչման առնչությամբ և արդյոք առկա իրավիճակը բավարար է գնայհատում, ՀՀ ԱԳՆ ղեկավարը պատասխանել է հետևյալ կերպ.

«Դա եղել և մնում է մեր երկխոսության օրակարգի մաս: Մեր երկու ժողովուրդները վերապրել են ցեղասպանության սարսափը: Բազմաթիվ գիտնականների, քաղաքական գործիչների կարծիքով ժամանակին Հայոց ցեղասպանության լիարժեք դատապարտման պարագայում գուցե հնարավոր լիներ կանխել Շոան և այլ ցեղասպանություններ: Ահա թե ինչու ակնկալում ենք, որ Իսրայելը պաշտոնապես կճանաչի Հայոց ցեղասպանությունը:

Մենք տեսնում ենք, որ Իսրայելի հանրային կարծիքն արտահայտող ավելի ու ավելի շատ մարդիկ են կողմ հանդես գալիս ճանաչմանը, այդ թվում Խորհրդարանում: Երեկ ես հանդիպում ունեցա Կնեսետի խոսնակի հետ, ով նույնպես բավականին հստակ դիրքորոշում արտահայտեց Կնեսետի կողմից Հայոց ցեղասպանության ճանաչման կարևորության առնչությամբ»:

ՀՀ ԱԳ նախարարը խոսել է նաև հայ-իրանական հարաբերությունների մասին՝ նշելով, որ Իրանի հետ Հայաստանը համագործակցում է տարբեր ոլորտներում։ Պետք է հաշվի առնել, որ մյուս երկու հարևան երկրների՝ Թուրքիայի և Ադրբեջանի հետ կան փակ սահմաններ, և միայն Իրանն ու Վրաստանն են պահպանում բնականոն հարաբերություններ: Ըստ Նալբանդյանի՝ Հայաստանը ջանքեր է գործադրում երկկողմ փոխգործակցությունն ու գործընկերությունը զարգացնելու ուղղությամբ։

«Արդյոք դա խոչընդո՞տ է Իսրայելի և Հայաստանի միջև հարաբերություններում»,- հարցնում է հեռուստատեսության ներկայացուցիչը։

«Ես չեմ կարծում, որ դա խոչընդոտ է Իսրայելի հետ մեր երկկողմ հարաբերություններում, ինչպես որ խոչընդոտ չեն Իսրայելի հարաբերությունները Հայաստանի հարևան որևէ երկրի հետ»,- արձագանքել է ՀՀ ԱԳ նախարարը:

Հարցազրույցի առանցքային մաս են եղել երկու երկրներում դեսպանությունների բացակայությունը, նաև Իսրայելի և Ադրբեջանի միջև զենքի առևտուրը:

Էդվարդ Նալբանդյանն ասել է.

«Մեր կարծիքը շատ հստակ է. Իսրայելի կողմից Հայաստանում դեսպանություն բացելուն պես մենք փոխադարձության սկզբունքով դեսպանություն կբացենք Իսրայելում»:

Ինչ վերաբերում է ադրբեջանա-իսրայելական ռազմական համագործակցությանը, Նալբանդյանը պատասխանել է, որ սպառազինությունների առևտուրը բանջարեղենի առևտուր չէ և նմանատիպ առևտուրը միշտ իր սև կողմն ունի, որը կարող է հանգեցնել որոշ բացասական հետևանքների:

«Հայաստանի և Իսրայելի հարաբերություններում կարևորն այն է, որ մենք որևէ հարց քննարկելու համար արգելք չունենք, նույնիսկ զգայուն հարցերը մենք անկաշկանդ քննարկում ենք և փորձում լուծումներ գտնել: Ասացի այն, ինչ կարող էի ասել Ձեզ: Մենք բաց և շատ դրական քննարկումներ ենք անցկացնում»,- եզրափակել է խոսքը ՀՀ ԱԳ նախարարը: