Վանաձորի քաղաքապետի շուրջ աղմուկը ՍԴ որոշումից հետո նոր թափ է առնում

ՀՀ Սահմանադրական դատարանի երեկ կայացրած որոշումը, որով անօրինական են ճանաչվել Վանաձերի ավագանու նիստերը, կողմերը տրամագծորեն տարբեր ձևերով են մեկնաբանում: Հայցվոր կողմը՝ «Լուսավոր Հայաստան» կուսակցության ղեկավար Էդմոն Մարուքյանը, դա հաղթանակ է անվանում և պնդում, որ Վանաձորի ավագանին պետք է լուծարվի ու նոր ընտրություններ նշանակվեն, իսկ Վանաձորի քաղաքապետ Մամիկոն Ասլանյանը ոչ միայն չի պատրաստվում հրաժարվել զբաղեցրած պաշտոնից, այլև  ցանկանում է գործել նույն ոգով՝ սպասելով օրենքի փոփոխությանը:

Հիշեցնենք, որ 2016 թվականի հոկտեմբերի 2-ին տեղի ունեցած Վանաձորի ավագանու ընտրություններում իշխանական թեվը ներկայացնող երկու կուսակցությունները՝ ՀՀԿ-ն և ՀՅԴ միասին ստացան ավագանու 15 մանդատ, իսկ ոչ իշխանական թևի երեք կուսակցությունները՝ «Լուսավոր Հայաստանը», «Հայկական վերածնունդը» և ԲՀԿ-ն միասին՝ 18 մանդատ: Ավագանու առաջին նիստից երկու օր առաջ ոչ իշխանական թևի երեք կուսակցությունները համաձայնագիր ստորագրեցին ու հայտարարեցին միասնական թեկնածուի մասին:

Քվեարկության արդյունքները անսպասելի էր ոչ իշխանական թևի համար: Նրանց թեկնածուն՝ Քրիստ Մարուքյանը 14 կողմ ձայն էր ստացել, իսկ Հանրապետական թեկնածու Մամիկոն Ասլանյանը՝ 19 ձայն: Ոչ իշխանականները կուսակցությունները սկսեցին կասկածել մեկմեկու, սակայն դավաճաններին այդպես էլ չգտան:

Ստեղծված իրավիճակից պատվով դուրս գալու համար մեծամասնություն կազմող ոչ իշխանական երեք կուսակցությունները որոշեցին բոյկոտել ավագանու նիստերը, քվորում չապահովվել ու հասնել ավագանու լիազորությունների դադարեցման: Քաղաքական ճգնաժամը մի քանի ամիս տևեց, որից հետո հիմք ընդունելով Տեղական ինքնակառավարման մասին օրենքի մի շարք դրույթներ, Հանրապետական և ՀՅԴ խմբակցությունները 15 հոգանոց ավագանու կազմով սկսեցին նիստեր գումարել ու որոշումներ կայացնել:

Խորհրդարանի Ելք եվ Ծառուկյան խմբակցությունները այդ գայլը որակեցին Հակասահմանադրական ու Սահմանադրական դատարան հայց ներկայացրին , վիճարկելու «Տեղական ինքնակառավարման մասին» օրենքի՝ խնդրահարույց դրույթները:

Երեկ՝ հոկտեմբերի 10-ին սահմանադրական դատարանը բավարարեց դիմումի մի մասը, և «Տեղական ինքնակառավարման մասին» ՀՀ օրենքի 64-րդ հոդվածի 3-րդ կետը հակասահմանադրական ճանաչեց։

Սահմանադրական իրավունքի մասնագետները առայժմ չեն շտապում մեկնաբանել Սահմանադրական դատարանի որոշումը՝ պատճառաբանելով, որ մանրամասներին ծանոթ չեն և գործը ուսումնասիրելուց հետո միայն կարող են ասել, թե ինչ ընթացք կունենա գործընթացը: «Ելք»-ում վստահ պնդում են՝ այլընտրանք չկա, և քաղաքական ճգնաժամի հանգուցալուծումը ավագանու նոր ընտրությունն է , Վանաձորի քաղաքապետարանում, սակայն, նման զարգացումներ չեն կանխատեսում: Սակայն մի բան ակնհայտ է՝ քաղաքական կրքերը Վանաձորում կրկին կշիկանան: