Մինասի «Գիշեր» և «Ցերեկ» որմնանկարների փրկության գործը մեկնարկել է

Մինասի «Գիշեր» և «Ցերեկ» որմնանկարների փրկության գործը մեկնարկել է: Դրանք հանվել են կիսավեր շենքից և այժմ վերականգնվում են: Հիշեցնենք՝ որմնանկարները գտնվում էին նախկին գալվանոմետրերի գործարանում, որտեղ տեղումների հետևանքով սկսել էին պոկվել ու թափվել: «Ցերեկ» որմնանկարի մեծ մասն արդեն ոչնչացել էր, իսկ «Գիշեր»-ը համեմատաբար ավելի լավ էր պահպանվել: Որմնանկարների փրկության համար «Մինաս Ավետիսյան» հիմնադրամը դրամահավաք էր հայտարարել: Արձագանքողներ եղել են, բարերար է գտնվել, որն էլ ֆինանսավորել է որմնանկարների՝ պատից անջատման և վերականգնման ծրագիրը:

Որմնանկարների վերականգնման իտալացի մասնագետ Ֆաբրիցիո Իակոպինին կրկին Գյումրիում է: Նա անցած մի քանի տարիների ընթացքում Գյումրիում Մինասի 10-ը որմնանկար է վերականգնել, ևս երկուսը Հակոբ Հակոբյանի և Ռաֆայել Աթոյանի վրձնին են պատկանում: Այս անգամ վերականգնում է ամենավատ վիճակում գտնվող որմնանկարները:

«Գիշեր» և «Ցերեկ»-ը նախկին գալվանոմետրերի գործարանի պատերին քայքայվում էին: Այն, ինչ որմնանկարներից մնացել է՝ իտալական, Գյումրիում արդեն փորձված տեխնոլոգիայով, պատից հանվել է: Իտալացի մասնագետը նշում է, որ  հրատապ որոշում էր, որ կայացվել է քայքայվող որմնանկարների համար:

«Գիշեր» և «Ցերեկ» որմնանկարները Մինասը 1974-ին է նկարել: 30 տարուց ավելի լքված շենքում «Ցերեկ» որմնանկարի մեծ մասը փչացել է, այն ամբողջությամբ վերականգնել հնարավոր չէ: Ըստ այդմ՝ ամրացման և նկարչական վերականգնման ենթակա է միայն «Գիշեր» որմնանկարը, թեև «Ցերեկ»-ի համար էլ լուծում գտել են:

Իսկ թե ինչպես հնարավոր եղավ որմնանկարների փրկության համար միջոցներ գտնել, «Մինաս Ավետիսյան» հիմնադրամն առայժմ փակագծերը չի բացում: Դրամահավաք էին հայտարարել, իսկ թե ովքեր են արձագանքել ու ֆինանսավորել, դեռ չեն հրապարակում:

«Բարերարը մեզ գտավ: Այս պահին ստիպված եմ լռել, դա բարերարի խնդրանքն է: Չնայած մեր պայմանավորվածությունն այնպիսին է, որ հետո կհայտարարվի թե՛ բարերարի անունը, թե՛ վայրը, որտեղ տեղափոխվելու է որմնանկարը: «Ցերեկ» որմնանկարը կտանենք Ջաջուռի թանգարան, դրա մի մասը պահպանված չէ, և այլ լուծում կգտնենք ցուցադրելու, իսկ «Գիշեր» որմնանկարն ամբողջությամբ կվերականգնվի: Ամեն դեպքում, որմնանկարը հանդիսանում է պետության սեփականությունը և պահպանվում է պետության  կողմից: Բոլոր դեպքերում, որմնանկարները տրվում են ի պահ: Երբ պետությունը որոշում է փոխել հասցեատիրոջը, կառավարության որոշմամբ, որմնանկարիչը կարող է տեղափոխվել մեկ վայրից մյուսը»,- SHANTNEWS-ին ասել է «Մինաս Ավետիսյան» հիմնադրամի խորհրդի նախագահ Արման Ավետիսյանը:

«Գիշեր» որմնանկարը, ըստ Արման Ավետիսյանի, ի պահ է տրվելու ֆինանսավորվող կազմակերպություններից մեկին: Սա, ըստ նրա, չի նշանակում, թե որմնանկարը վաճառվելու է կամ սեփականության իրավունքով է հանձնվելու: Մինասի երկու գործերն էլ պետական պահպանվող հուշարձանների ցանկում են: Նույն  պայմաններով նաև տարիներ առաջ Մինասի մեկ այլ գործ Զվարթնոց օդանավակայան տեղափոխվեց: «Գիշեր» և «Ցերեկ» որմնանկարների վերականգնման աշխատանքները դեռ մեկուկես ամիս տևելու են, որից հետո միայն պարզ կդառնա, թե ուր է տարվելու «Գիշեր» որմնանկարը: