Դելֆինարիումը բացվեց․ կենդանիների համար ստեղծված պայմաններն այդպես էլ չեն ուսումնասիրվել

Տոնական շոու ծրագրով երեկ Գյումրիի դելֆինարիումը բացեց իր դռները հանդիսատեսի առջև: Երկշաբաթյա մարզումները թույլ են տվել Թավրիզից Գյումրի տեղափոխված դելֆիններին հարմարվել ստեղծված պայմաններին: Փակ տարածքում գտնվող լողավազանում դելֆիններն իրենց հմտություններն են ցույց տվել: Երկու դելֆինների կեցության ու անվտանգության հարցերը մի քանի օր առաջ հայտնվել էին կենդանասերների ու կենդանիների պաշտպանների ուշադրության կենտրոնում: Կարծիքներն ու մտահոգությունները, սակայն, առանց տեղում կատարված դիտարկումների էին: Դելֆինարիումի տնօրինությունն օրեր առաջ նաև իրազեկել էր բնապահպաններին ու կենդանասերներին, որ լինելու է առաջին ցուցադրությունը, բայց ոչ ոք չէր ներկայացել:

«Գրավոր կամ բանավոր իրազեկելու այս նորագույն տեխնոլոգիաների պայմաններում ես չգիտեմ՝ ինչքանով է լուրջ։ Մենք բոլոր բնապահպաններին, կենդանասերներին կոչ ենք արել համացանցով, էլեկտրոնային բոլոր տարբերակներով տեղյակ ենք պահել, որ մենք բացվում ենք, մեր դռները բաց է եղել, թող գային, նայեին ու կարծիք հայտնեին»,-ասել է դելֆինարիումի տնօրեն Թորգոմ Գևորգյանը։

Մասնագետները նշում են, որ երկու դելֆինների ազատ տեղաշարժի համար լողավազանի տարածքն ու ջրի որակը հարմարացված են ծովային պայմաններին: Թե ինչքանո՞վ էին երկու դելֆիններն իրենց լավ զգում փակ լողավազանում, հանդիսատեսը փորձում էր հասկանալ նրանց աշխույժ խաղից: Դելֆինարիումի հիմնադիր, ռուսաստանաբնակ գործարար Գագիկ Պետրոսյանն էլ իր հերթին հերքում է այն տեղեկությունները, թե դելֆինները Գյումրի են տեղափոխվել առանց պաշտոնական թույլտվության, ինչպես նաև համապատասխան նախարարություն չի ներկայացվել շրջակա միջավայրի վրա ազդեցության փորձաքննության վերաբերյալ փաստաթուղթ:

 «Մենք օրենքով սահմանված բոլոր կետերով ներմուծել ենք մեր կենդանիներին, մենք բոլոր համաշխարհային կազմակերպություններից թույլտվություն ունենք, որ բերել ենք Հայաստան։ Ո՞վ է ասում, որ անօրեն ինչ-որ բան ենք արել, փաստաթղթեր ունենք, կարող ենք ցույց տալ»,-ասել է դելֆինարիումի հիմնադիր, գործարար Գագիկ Պետրոսյանը։

Դելֆինները Սոչիի դելֆինարիումի կենդանիների երկրորդ սերունդն են, որոնք ապրել են Թավրիզի դելֆինարիումի լողավազանում: Գյումրիի դելֆինարիումի հիմնադիրը ծանոթ է նաև միջազգային փորձին, թե ինչ պայմաններ է անհրաժեշտ ստեղծել կենդանիներին լողավազանում հարմարեցնելու համար, ձեռք բերած փորձը կիրառել ու դելֆինարիումներ է բացել նաև այլ երկրներում: Սաշայի ու Քսյուշայի հետ մի քանի օրից շոու ծրագրում կներկայանա նաև ծովառյուծ Զայան: Դելֆինների հետ նրա խաղը նոր է բեմադրվում: Ծովառյուծին էլ են Թավրիզից բերել։

Դելֆինների ներկրման ու շրջակա միջավայրի վրա ազդեցության փորձաքննության վերաբերյալ փաստաթղթերի առկայության մասին Shantnews-ին այսօր պարզաբանումներ է տվել Բնապահպանության և ընդերքի տեսչական մարմնի կենդանական աշխարհի վերահսկողության բաժնի պետ Արթուր Բեգլարյանը։ Նա նախ նշել է, որ կենդանիները Հայաստան են հասել մաքսային օրինական ճանապարհով։ Իսկ տեսչական մարմնի Շիրակի մարզային կառույցը դելֆինարիումում փաստաթղթային ուսումնասիրություններ է կատարում, իսկ կենդանիների արտահանումն ու ներկրումը կարգավորվում է միջազգային առևտրի մասին օրենքով: Ներմուծման  թույլտվությունների տրամադրման վերաբերյալ փաստաթղթերի ուսումնասիրությունը կտևի 15 օր։