Ճարտարապետներն սկսել են Մինասի տան ուսումնասիրությունները

Մինաս Ավետիսյանի Ջաջուռում գտնվող հայրական տունը կվերականգնվի: Այս մասին օրեր առաջ Ջաջուռում հայտարարեց քաղաքաշինության կոմիտեի նախագահը: Մասնագետների խումբը՝ ճարտարապետներն ու արվեստաբանները, արդեն եղել են գյուղում, Ջաջուռում ուսումնասիրել տան վիճակը, չափագրել են, թե ինչ է պահպանվել Մինասի հայրական տնից: Սա կարևոր է հասկանալու համար, թե ինչպես են կատարվելու վերականգնման աշխատանքները:

Քաղաքաշինության կոմիտեն տան վերականգնումը հնարավոր է համարում պետական բյուջեի և ներդրողների համաֆինանսավորմամբ: Մինասի հայրական տունը կառուցվել է 1929-ին. այս մասին վկայում է գրությունը, որը փորագրված է տան մուտքի վերևում: Բայց սա տան կառուցման առաջին փուլի թվագրությունն է: Հետո` մինչև 60-ականները, ձևափոխություններ են եղել, կառուցվել է երկրորդ հարկը: Այն ժամանակ Մինասի հայրական տունը գյուղում եզակիներից է եղել իր մեծությամբ ու կցակառույցներով:

Մինասն այս տանը վերջին անգամ մահվանից 2 օր առաջ է եղել: Նա հաճախ էր այցելում Ջաջուռ՝ ծնողներին տեսության, նաև գյուղական տեսարանները մտապատկերում թարմացնելու համար: Մինասի արվեստանոցը կանգուն է, բայց այնտեղ հասնել չեն համարձակվում անգամ ճարտարապետները, ովքեր ուսումնասիրում են տունը:

Այն խիստ վթարային է, կրող կոնստրուկցիաները երկրաշարժի հետևանքով ու հաջորդած տարիներին քայքայվել են: Այն, ինչ պահպանվել է, ճարտարապետները ֆիքսում են, չափագրում ու տան եռաչափ սխեման կազմում:

Ճարտարապետ Նարեկ Մինասյանը երկու տարի առաջ է Մինասի տանն ուսումնասիրություններ կատարել: Այն ժամանակ դա ապագա ճարտարապետի դիպլոմային աշխատանքն է եղել՝ վերակառուցել Մինասի տունը, որը Ջաջուռ գյուղի զարգացման նախապայման կարող է հանդիսանալ: Հիմա ուսումնասիրությունները կոնկրետ վերականգնման համար են: Ճարտարապետը նշում է` շատ դժվար է առանց արխիվային գծագրերի ու լուսանկարների սկսել նախագծումը:

«Քանի օր է` զրույցներ ենք ունենում, թե ինչպես է եղել տունը նախկինում: Այն մարդիկ, ովքեր ապրում են այստեղ, պատմում են, որ այստեղ եղել է աստիճան կամ շքամուտք: Մենք, հիմնվելով այդ հարցազրույցների, կիսաքանդ հեծանների և ուրիշ դետալների վրա, ենթադրում ենք, որ այստեղ եղել է այսպես: Ըստ այդմ` սխեմատիկ պատկերը կազմում ենք»,- SHANTNEWS.am-ի հետ զրույցում ասել է ճարտարապետ Նարեկ Մինասյանը:

Նկարչի տան, այսպես ասած, ճարտարապետական պատմությունը երիտասարդ մասնագետները բաժանել են 3 մասի՝ ինչպիսին է այն եղել, երբ այստեղ դեռ Մինասն է ապրել, ինչ է պահպանվել և ինչ է դառնալու վերականգնումից հետո:

«Այն, որ տունը կվերականգնվի, հասկանալի է և միանշանակ: Հիմա ավելի շատ սևեռվել ենք, թե ինչ է այստեղ լինելու՝ ստուդիաներ, հյուրատուն: Դեռ անորոշ պահեր կան, բայց տունը հաստատ կվերականգնվի»,- SHANTNEWS.am-ի հետ զրույցում նշել է Մինաս Ավետիսյանի որդին` Արման Ավետիսյանը:

Մինասի տուն-թանգարան, համատեղությամբ նաև հյուրատուն … Սրանք նախնական ծրագրեր են, թե ինչի կարող է վերածվել տունը վերականգնումից հետո: Նախնական են նաև ճարտարապետների ուսումնասիրությունները: Դրանք դեռ շարունակվելու են, որից հետո միայն վերականգման նախագծային փուլն է լինելու: Այս ընթացքում քաղաքաշինության կոմիտեն նաև ֆինանսավորման աղբյուրներն է հստակեցնելու: