Հայաստանի՝ ծնունդով իրանցի քաղաքացիներին բանկերը վարկ չեն տալիս. գործարարը դիմեց Փաշինյանին

«Իմ քայլը՝ հանուն Կոտայքի մարզի» ներդրումային համաժողովի մասնակից գործարարներից մեկը ՀՀ վարչապետ Նիկոլ Փաշինյանին ներկայացրեց բանկային ոլորտում իրենց աշխատանքը խոչընդոտող մի խնդիր: Ծնունդով իրանցի գործարարը հետաքրքրվեց.

«Բանկային պրոբլեմներ կան ծնունդով իրանցի հայերի համար: Ինչպե՞ս կարող եմ օգտվել պետական աջակցությունից, խիստ հետաքրքրված եմ գյուղատնտեսության ոլորտում աշխատանք սկսելու, զարգացնելու առումով, բայց պետական աջակցություն տվող բանկերի տեսակետից մենք ոչ ցանկալի հաճախորդ ենք: Ես ուզում եմ գործել ու ապրել Հայաստանում և աշխատել այս ոլորտում»:

ՀՀ վարչապետը նշեց, որ գործարարի ասածում կարևոր նրբերանգ կա, պետք է ճիշտ հասկանալ՝ ինչի մասին է խոսքը: Նա ընդգծեց՝ կառավարությունն այս հարցում որևէ միջամտություն, առնվազն՝ բացասական, չի ունենում, բանկերը մասնավոր ընկերություններ են, նրանք ունեն նաև օտարերկրյա բաժնետերեր, ու մանավանդ վարկ տալու-չտալու գործում կառավարություն չի կարող միջամտել, ասել՝ այսինչ մարդուն վարկ տվեք, այսինչ մարդուն՝ մի տվեք:

«Ամիսներ առաջ երբ խնդիրներ կային, նաև Իրանի քաղաքացի հանդիսացող մեր քաղաքացիների հետ, կառավարությունը հաղորդակցություն սկսեց բանկային համակարգի հետ, որ կարողանանք մեր քաղաքացիների շահերը մաքսիմալ պաշտպանել, որ խտրականության չենթարկվեն»,- ասաց նա:

Վարչապետը խոստացավ՝ իր օգնականը կապ կհաստատի գործարարի հետ, կոնկրետ դեպքը կքննարկեն, ապա նշեց՝ եթե բանկերից մեկը վարկ չի տալիս, հնարավոր է՝ այլ բանկից փորձի վարկ ստանալ, որևէ բանկից, որ այլ քաղաքականություն ունի:

«Ընդհանուր առմամբ, Իրանի շուրջ միջազգային կոնյունկտուրայի հետ կապվածից բացի, կա նաև այլ նյուանս, ՀՀ ոչ քիչ քաղաքացիների վարկը բանկերը մերժում են: Այստեղ պետք է հասկանալ մերժման պատճառները, ու բնականաբար, մենք որևէ բանկի չենք կարող պարտադրել որևէ մեկին վարկավորում տալ, բայց խտրականությունից պաշտպանել կարող ենք, եթե կա նման դեպք, դրանից բխող նաև որոշակի գործողություններ պիտի լինեն»,- ասաց Փաշինյանը:

Համաժողովի մասնակից մեկ այլ գործարար վարչապետին տեղեկացրեց՝ Չինաստանի հետ պայմանագիր են կնքել, նրանք փողը փոխանցում են, մինչդեռ դեսպանատնից հայտնել են, որ բանկը թույլ չի տալիս Հայաստան փող փոխանցել, քանի որ Իրանի հարևանն ենք:

«Չինաստանի դեպքում գործ ունենք նույն խնդրի հետ, ինչ Հայաստանում: Չինաստանի կառավարության քաղաքականությունը Իրանի հարցում այլ է, Չինաստանը, ի հեճուկս պատժամիջոցների, Իրանից նավթ է գնում, բայց կա բանկ, որ հաշվում է՝ այդ քաղաքականությունն իր համար ռիսկային է, իր քաղաքականության շրջանակներում որոշ որոշումներ է կայացնում: Իրավիճակը ավելի պարզ դարձավ Ձեր այդ արձագանքով»,- նշեց վարչապետը: