Գյումրու ուսումնարաններում և քոլեջներում այս տարի ընդունելությունը մրցույթով էր

Գյումրու նախնական և միջին մասնագիտական ուսումնական մի քանի հաստատություններում այս տարի դիմորդների մեծ հոսք է եղել, որը հաստատությունների համար անսպասելի էր՝ հաշվի առնելով նաև դիմումների ընդունման սահմանված կարճ ժամկետները: Արդյունքում՝ ունեցել են աննախադեպ մի իրավիճակ, երբ ստիպված են եղել հիմնական դպրոցն ավարտած աշակերտներին ուսումնարան ու քոլեջ ընդունել մրցույթով՝ հիմք ընդունելով դպրոցների տված ավարտական վկայականի գնահատականները:

Դուրս մնացածներին տեղավորել պետպատվերի լրացուցիչ տեղեր հատկացնելու հաշվին նախարարությունը մերժել է: Եթե տարիներ առաջ արհեստագործական ուսումնարանի կամ քոլեջի ուսանողը հայտարարեր, որ ինքը մրցույթով է ընդունվել, ոչ մեկը չէր հավատա: Բայց այս քննաշրջանում այդպես է եղել:

Գյումրու նախնական և միջին մասնագիտական որոշ հաստատություններում դիմորդներին ընտրել են մրցութային տարբերակով: Ըստ թիվ 4 արհեստագործական ուսումնարանի տնօրեն Քնարիկ Ահարոնյանի՝ բարձր առաջադիմություն ունեցող դիմորդները մրցույթով ընդունվել են, իսկ ցածր առաջադիմություն ունեցողները՝ դուրս մնացել։ Բարձր առաջադիմությունը չափվել է հիմնական կրթության ատեստատի գնահատականներով, թեև այդպիսի աշակերտները պետք է, որ շարունակեին սովորել ավագ դպրոցում:

Թիվ 4 արհեստագործական ուսումնարանին 9-ամյա կրթության բազայով 108 անվճար տեղ էր հատկացվել, անցած տարվանից 19-ով պակաս, իսկ դիմորդներն ավելին էին, քան անցած տարի: Դիմել էին նախարարություն ևս 22 տեղ հատկացնելու խնդրանքով, մերժվել են:

Որևէ ուսումնական հաստատության լրացուցիչ տեղ չի հատկացվի․ այսպիսի պատասխան ստացել է նաև Գյումրու պետական բժշկական քոլեջը, ըստ տնօրեն Մանվել Մարտիրոսյանի, պատճառն այն է, որ միջին բուժանձնակազմի պահանջարկ չկա: Դիմորդների թիվը կրկնակի է եղել պետպատվերի տեղերից: 9-ամյայի բազայով 39 ուսանող են ընդունել, 11-ը դուրս է մնացել մրցույթից:

Հիմնական կրթությունն ավարտած, նախնական ու միջին մասնագիտական հաստատություններից դուրս մնացած դիմորդն ստիպված է վերադառնալ դպրոցի ավագ օղակ: Իսկ հանրակրթության ավագ դպրոցի կրթակարգը միտված է աշակերտին նախապատրաստել բուհական կրթության, որտեղ հիմա վերադառնալու են արհեստագործական հմտությունների ձգտող աշակերտները, որոնք այսպես թե այնպես, դպրոցը շարունակել չէին ուզում:

Նախնական ու միջին կրթական երկու հաստատությունների ստեղծված իրավիճակի հակառակ պատկերն է եղել Գյումրու տեխնիկական քոլեջում, ունեցել են 20 թափուր տեղ: Թե ինչու է ամբողջ հանրապետությունում երկաթուղայինների մասնագետներ պատրաստող միակ քոլեջը թափուր տեղեր ունեցել, ըստ տնօրեն Մխիթար Սարգսյանի, դիմումների ընդունելության սեղմ ժամկետներով է պայմանավորվում:

Անցած տարիներին մինչև սեպտեմբերի 10-ը ուսանող են ընդունել, այս տարի ժամկետն ավարտվել է օգոստոսի 17-ով: Ավելի ուշ են դիմորդներ դիմել, բայց ըստ տնօրենի՝ արդեն ընդունել չէին կարող, քանի որ թափուր տեղերը հետ էին ուղարկել։ Խնդիրը կարգավորել վճարովի ուսուցման տեղեր բացելով՝ կոնկրետ 9-ամյա կրթության բազայով հնարավոր չէ: Պետական հաստատությունները վճարովի հիմունքներով ուսանողներ ընդունելու իրավունք չունեն: Արդյունքում՝ տեղի է ունեցել նաև հետևյալը՝ ուսումնարաններից և քոլեջներից դուրս մնացած 9-ամյա կրթությամբ դիմորդներն ընտրել են մասնավոր միջին մասնագիտական հաստատությունների վճարովի ուսուցումը: