Եթե կա դատավոր, ով չի հասկանում, որ անկախ է, դա խնդիր է. Ռուստամ Բադասյան

ՀՀ արդարադատության նախարար Ռուստամ Բադասյանից այսօր լրագրողները հետաքրքրվեցին՝ ինչպե՞ս է պատկերացնում 27 տարվա վաղեմության դեպքերի բացահայտումը, որի մասին նախապես հայտարարվել էր: Նախարարին նաև հարց ուղղեցին՝ փաստահավաք խմբին ի՞նչ գործառույթներ են վերապահվելու, ապա հիշեցրին՝ ընդդիմախոսներն ասում են, որ փոխանակ առաջ գնան, այս կերպ հետքայլ են անում:

«Դա որոշակի գնահատական է Հայաստանում տեղի ունեցած իրադարձություններին: Մենք ամենևին անցյալ չենք գնում, եթե նման նպատակ ունենայինք, տվյալ մարմնին կտայինք քննչական մարմնի կամ այլ կարգավիճակ, կամ սահմանադրական փոփոխություններ կանեինք: Մենք ընդամենը փաստերն ենք վերհանում, դրա շրջանակներում որոշակի գնահատական կտանք, որ բացառվի նման մեխանիզմների կիրառումն ապագայում»,- ասաց նախարարը:

Բադասյանը նշեց՝ իրենք անցյալի սխալները փորձում են բացառել ապագայում, այնտեղ միայն ընտրական գործընթացի և այլնի մասին չէ խոսքը, եթե հայտնաբերեն կոռուպցիոն մեխանիզմ, որ աշխատել է դատական համակարգում, առանձին գործերի ոչ օրինաչափ վարույթ ընդունելու դեպք, պետք է մոնիթորինգ սահմանել, որ նման մեխանիզմներ հնարավոր չլինի գործադրել դատական համակարգում: Նախարարը շեշտեց՝ սա միտված է ապագային:

Նախարարից ճշտեցին նաև՝ քանի՞ դատավորի նկատմամբ է կարգապահական վարույթ հարուցվել: Բադասյանը նշեց, որ իր կողմից նախարարի լիազորությունները ստանձնելուց հետո 2 դատավորի վերաբերյալ միջնորդություն է ներկայացվել ԲԴԽ-ին, ապա ասաց՝ կարևոր շեշտադրում պետք է անել՝ տպավորություն է, որ կա մոտեցում՝ կարծես ամենավատ համակարգը դատականն է, այն ամենակոռումպացվածն է, շատ վատ մարդիկ են հավաքված, մտածում են՝ ինչ անեն, որ կոռուպցիան շարունակեն:

«Ես պետք է ցրեմ այդ տպավորությունները: Դատական համակարգն ունի նույնքան պրոբլեմներ, որքան կարող են ունենալ այլ մարմիններ, չկա որևէ տրամադրվածություն, որ կենտրոնանալու ենք, լիազորություններն ուղղելու ենք դատավորների նկատմամբ պատժիչ ֆունկցիաներին, կարգապահական վարույթներ հարուցվելու են և միջնորդություն ներկայացնելու են միայն այն դեպքերում, երբ վստահ ենք, որ տվյալ դեպքում տեղի է ունեցել կարգապահական խախտում, որի շեմը բարձր է դրված՝ երաշխավորելու դատական համակարգի անկախությունը»,- ասաց նա:

Նախարարը նաև նշեց՝ եղել է դեպք, որ ինքը միջնորդությամբ հանդես չի եկել, և գործի վարույթը կարճվել է:

Դիտարկմանը, թե այդ տպավորությունը վարչապետի խոսքերից էր առաջացել, Բադասյանն արձագանքեց՝ նշելով, որ տպավորությունը ոչ թե վարչապետի խոսքերից, այլ նրա խոսքերը մեկնաբանելուց էին առաջացել:

«Երբ վարչապետը դիտարկումներ է անում, հետո անդրադառնում մասնավոր դեպքի, կան ուժեր, որ մասնավորը տարածում են ընդհանուրի վրա, խեղաթյուրում են վարչապետի խոսքը, և հասարակության շրջանում նման տպավորություն է ստեղծվում: Եթե կա դատավոր, ով չի հասկանում, որ անկախ է ու ինքն է որոշակի գործողություններ կատարում, դա խնդիր է, այն պետք է արձանագրել, բայց մեկնաբանել ու պրոյեկտել դա ամբողջ դատական համակարգի վրա, չեմ կարծում, որ ճիշտ է, ու չեմ կարծում, որ որևէ մեկը կառավարությունում կարծում է, որ դա ճիշտ է»,- նշեց նախարարը: