Բանաձևն իրավաբանական ուժ չունի. The Guardian-ի արձագանքը

«Ծանր պատմական բանավեճերից հետո ԱՄՆ ներկայացուցիչների պալատը ԱՄՆ-Թուրքիա լարված հարաբերութունների համատեքստում ճնշող մեծամասնությամբ կողմ քվեարկեց 1915 թվականի Հայոց ցեղասպանության ճանաչման բանաձևի օգտին: 405 կողմ ՝ այն բանաձևին, որը, սակայն, Թուրքիային չի պարտադրում օրենսդրորեն ճանաչել և կոչել «ցեղասպանություն» 1.5 միլիոն հայերի կանխամտածված ու պլանավորած կոտորածը Օսմանյան կայսրությունում»,- գրում է բրիտանական  The Guardian շաբաթաթերթը:

«Նախօրեին՝ երեքշաբթի 403 կողմ և 16 դեմ ձայներով կողմ էին քվեարկել Թուրքիայի դեմ պատժամիջոցներ կիրառելուն՝ միևնույն ժամանակ խստագույնս քննադատելով Դոնալդ Թրամփին, որը Թուրքիայի նախագահի հետ ունեցած հեռախոսազրույցից հետո հետ  քաշեց ամերիկյան զորամիավորումները Սիրիայից՝  ճանապարհ հարթելով Սիրիայի հյուսիսում գտնվող քրդերի վրա թուրքական հարձակման համար:

Թուրքական կառավարությունը շարունակաբար մերժում է դարասկզբի սպանությունները որպես «ցեղասպանություն» բնութագրել, և ակտիվ քարոզչություն ու ճնշումներ է իրականացրել ԱՄՆ-ի և աշխարհի այն բոլոր երկրների վրա, որոնք փորձել են կամ օգտագործել այդ տերմինը:

Աշխարհի բազմաթիվ երկրներ և ԱՄՆ-ի  համարյա բոլոր նահանգները պաշտոնապես ճանաչել են 1915 թվականի կոտորածները որպես ցեղասպանություն: Մինչդեռ ԱՄՆ Կոնգրեսը երկար ժամանակ դիմադրել է՝ ՆԱՏՕ-ի կազմում գտնվող ամերիկյան դաշնակից Թուրքիայի հետ  հարաբերությունները չլարելու համար: Հայոց ցեղասպանության ճանաչման բանաձևին աջակցությունն ավելացավ հատկապես դեմոկրատական կուսակցության կողմից, երբ Թրամփը հնարավորություն տվեց Թուրքիային հարձակվել Սիրիայի հյուսիսի քրդական խմբավորումների վրա:

Սիրիայի քրդական խմբավորումներն ԱՄՆ-ի հավատարիմ դաշնակիցն էին «Իսլամական պետության» դեմ պայքարում: Թուրքական հարձակման հետևանքով  քուրդ զինյալների և խաղաղ բնակչության շրջանում կան բազմաթիվ զոհեր: Հարյուր հազարավորները տեղահանվել են:

«Եթե մենք անտեսում ենք պատմությունը, ուրեմն մեզ վիճակված է ականատես լինել անցյալի սխալների կրկնությանը: Քրդերի դեմ թուրքական զինուժի վերջին հարձակումները մեր ժամանակներում վտանգի վառ հիշեցումն են»,- ասել է Ներկայացուցիչների պալատի խոսնակ Նենսի Փելոսին ՝ երեքշաբթի կոչ անելով աջակցել բանաձևի ընդունմանը:

Կալիֆոռնիայի նահանգից դեմոկրատ Ադամ Շիֆը, որն այս բանաձևի «կնքահայրն» է, ասել է.

«Ներկայացուցիչների պալատը հայտարարեց, որ այլևս մաս չի կազմի ցեղասպանության ժխտմանը: Սա քվեարկություն է, որի իրականացման համար ես պայքարել եմ 19 տարի, և որին տասնամյակներ շարունակ սպասել են իմ հազարավոր ընտրողները»:

The Guardian-ի վերլուծական հոդվածի հեղինակը կրկին հիշեցնում է՝ երկկուսակցական ներկայացուցչական պալատը բանաձևն ընդունել է Թուրքիայի դեմ ամերիկյան տնտեսական պատժամիջոցների համատեքստում:

Ի պատասխան բանաձևի ընդունման՝ Թուրքիայի արտաքին գործերի նախարար Մեվլյութ Չավուշօղլուն դատապարտել է տեղի ունեցածը, անվանել «անիմաստ քաղաքական քայլ» և «պատմությունը վերաշարադրելու փորձ»:

«ԱՄՆ վարչակազմը և քաղաքական գործիչները, ինչպես նաև Ամերիկայի ժողովուրդը, պետք է պատրաստ լինեն այդ բանաձևի հասցրած վնասներին: Դա  փորձ է՝ խաթարել Թուրքիա-ԱՄՆ կապերը, և միջազգային ու տարածաշրջանային անվտանգության տեսանկյունից փխրուն ժամանակահատվածում կվնասի ԱՄՆ շահերին: Անկասկած, այս բանաձևը կնվազեցնի ԱՄՆ-ի իմիջը Թուրքիայի հասարակության համար, քանի որ  նաև վարկաբեկում է ԱՄՆ Ներկայացուցիչների պալատի արժանապատվությունը»,- ասել է Չավուշօղլուն: