Գյումրիում տնակների հաշվառումն ավարտված է, բայց տնակների թիվը դարձյալ մնում է վիճահարույց որոշ կառույցների համար

Ինչպես է լուծվելու Գյումրիում հաշվառված տնակներում ապրող ընտանիքների բնակարանային փոխհատուցման հարցը: Խնդրի լուծման արդյունավետ տարբերակը բնակարանաշինությունն է, թե բնակարանների գնման վկայագրերի տրամադրումը: Հերթական անգամ այս հարցերն են քննարկել Շիրակի մարզպետարանի և Գյումրու քաղաքապետարանի պատասխանատուները: Ներկայացվել են նաև վարչապետի հանձնարարականով ստեղծված աշխատանքային խմբի Գյումրիում տնակների հաշվառման արդյունքները:

Մոտ 1 տարի վարչապետի հանձնարարականով ստեղծված աշխատանքային խումբը Գյումրիի տնակային ավաններում հաշվառում կատարեց, բայց էլի ստույգ տվյալներ չկան, թե քաղաքում քանի տնակ կա: Կադաստրի տվյալներով` Գյումրիում տնակների թիվն այլ է, քաղաքապետարանի տվյալներով՝ այլ: Շիրակի մարզպետարանի քաղաքաշինության վարչության բնակարանային և ենթակառուցվածքների գործունեության բաժնի պետ Տիգրան Հարությունյանի խոսքերով` խոսքը 800-900 տնակի մասին է, որոնք կադաստրի տվյալներով, իբր քաղաքապետարանը ավել է հաշվառել: Կադաստրի տրամադրած տվյալներով` համադրություն կատարել են, բայց ըստ պատասխանատուի, սխալը դեռ չեն գտել:

Հաշվառված տնակային հասցեներից ոչ բոլորն են բնակեցված, կան նաև այնպիսի դեպքեր, երբ տնակը տարիների ընթացքում քարաշեն տան է վերածվել, բայց մնացել է տնակային հասցեով: Մարզպետարանի պատասխանատուի կարծիք-առաջարկն է, որ հաշվառման ընթացքում փակ տնակների քանդման գործընթաց սկսվեր, կամ էլ քարաշեն տների տարածքների հողերի նշանակությունը փոխվեր: Աշխատանքային խմբի անդամ, «Շիրակ» կենտրոնի ղեկավար Վահան Թումասյանն էլ է համակարծիք, որ մոտ 1 տարի միայն հաշվառում կատարելը ժամանակի անտեղի կորուստ էր:

Իսկ աշխատանքային խումբը գործնական քայլեր կատարելու իրավունք կունենա միայն օրենսդրական հիմքեր լինելու դեպքում: Օրենքի ուժով կարող են չբնակեցված տնակները քանդել: Հիմա այդ օրենքի նախագիծն է մշակվում: Իսկ մինչ այդ, աշխատանքային խմբի անդամները բանավոր համաձայնության են եկել, որ տնակների քանդումը պետք է սկսվի քաղաքի կենտրոնից:

Շիրակի մարզպետարանի պատասխանատուն էլ վթարայինների բնակիչների համար լավ լուրով էր եկել: Գյումրու 4-րդ աստիճանի վթարայնության 4 շենքերի բնակիչներ բնակարանների գնման վկայագրեր կստանան: Խոսքը 170 ընտանիքի մասին է: Դրանք Անտառավան 26, Ղուկասյան 29, Իսահակյան 9 և Տիգրան Մեծ պողոտա 5 հասցեների շենքերի մասին է:

Բնակարանների գնման վկայագրերի շրջանառությանը միշտ անշարժ գույքի շուկան գնաճով է արձագանքում: Գյումրու բնակարանային շուկայում չկան վկայագրի արժեքին համապատասխան նորմալ վիճակի բնակարաններ: Իսկ վկայագրերի արժեքը, ըստ մարզպետարանի պատասխանատուի, նվազելու է, պայմանավորված նրանով, որ կադաստրի տվյալներով Գյումրիում բնակարանները էժանացել են, բայց իրականում բնակարանները թանկացել են: Աշխատանքային խումբը հիմա քննարկում է բնակարանների գնման վկայագրի արժեքը ոչ թե կադաստրային, այլ շուկայական գնով սահմանելու հարցը: Փոխհատուցումը չի վերաբերելու այն ընտանիքներին, որոնք բնակարան կորցրել են, բայց ոչ թե տնակում, այլ վարձով են ապրում: Առհասարակ, աշխատանքային խմբի ուշադրության կենտրոնում միայն տնակներում ապրողներն են:

Անօթևաններից շատերը 2011 թվականին թերի փաստաթղթերի պատճառով հերթացուցակից դուրս մնացին, ու հիմա Գյումրիում բնակարանի շահառու համարվող ընտանիք չկա: Շիրակի մարզպետարանը նոր գրություն է ներկայացրել կառավարություն՝ սեփական տներ կորցրած ու չփոխհատուցված, դրամական փոխհատուցումների սպասող, նաև կիսված ընտանիքներին շահառու ճանաչելու մասին: Պատասխանել են, որ հնարավոր է՝ Գյումրիի վերաբերյալ առանձին օրենսդրական ակտ ընդունվի: Եվ 88-ից 31 տարի անց պատասխանատուները փաստում են, որ Գյումրու 96 տնակային ավաններից ընդամենը մեկն է ամբողջությամբ մաքրվել ժամանակավոր կացարաններից: Խոսքը Բարեկամության այգու մասին է: