Նվեր-կիթառ, աճուրդի հանված կախազարդ … կայացել է «Ժպիտների քաղաք» հիմնադրամի բարեգործական գալա-ընթրիքը

Կայացել է «Ժպիտների քաղաք» հիմնադրամի ամենամյա բարեգործական գալա-ընթրիքը: Ստեղծման օրվանից հիմնադրամն օգնել է քաղցկեղ և արյան հիվանդություններ ունեցող մինչև 18 տարեկան 240 երեխաների, նրանց բուժման համար հանգանակել ու տրամադրել շուրջ 270 մլն դրամ: Հերթական ընթրիքի նպատակն էր դոնորներին և գործունեության մեկ տարվա ընթացքում հիմնադրամի ծրագրերին աջակցած բարերարներին ներկայացնել հաշվետվություն կատարած աշխատանքի մասին, ներկայացնել ապագա ծրագրերն ու իրականացնել բարեգործական դրամահավաք:

13-ամյա Արկադի Մելքոնյանը մի քանի երաժշտական գործիքի է տիրապետում՝ կիթառ, շվի, դաշնամուր … 9 տարեկանից հաճախել է կիթառի դասընթացների, կարճ ժամանակ անց լավ տիրապետել ու կրթությունը շարունակել երաժշտական դպրոցում:

Արկադին այն պատանին էր, ում մեկ ամիս առաջ խոստում էր տվել«Ջոեֆ Ջիփսի Քինգս Ֆեմիլի» խմբի երգիչ Ջոեֆ Ֆարգիերը, երբ այցելել էր պրոֆեսոր Յոլյանի անվան արյունաբանական կենտրոնում բուժվող երեխաներին: Այստեղ նա համերգով էր հանդես եկել, զրուցել փոքրիկների հետ և երբ իմացել էր Արկադիի ունակությունների մասին, խոստացել էր իր կիթառը նվիրել նրան:

Մեկ ամիս անց հայտնի երաժիշտն ու պատանին դարձյալ հանդիպում են, տարբեր լեզուներով են խոսում, բայց սա չի խանգարում երաժիշտներին հասկանալ միմյանց:

«Շատ ուրախ եմ, որ այստեղ եմ ու մասնակցում եմ «Ժպիտների քաղաք» հիմնադրամի այս միջոցառմանը, ես խոստացել էի, որ կիթառ պետք է նվիրեմ տղային: Ծրագրեր ունեմ օգնելու ամբողջ աշխարհի այն երեխաներին, ովքեր ունեն խնդիր: Բոլոր արտիստներին պետք է ընդգրկել այս ծրագրում, որպեսզի կարողանանք երաժշտության միջոցով օգնել այս երեխաներին»,- ասաց Ֆարգիերը:

Եվս մեկ երեխայի ժպիտ պարգևելու ցանկությամբ ընթրիքին մասնակցում էին բազմաթիվ հյուրեր, այդ թվում` Նիկոլա և Քրիստինա Ազնավուրները, Դմիտրի Ռոգաչովի անվան մանկական արյունաբանության, ուռուցքաբանության և իմունոլոգիայի ազգային բժշկահետազոտական կենտրոնի նախագահ Ալեքսանդր Ռումյանցևը, բազմաթիվ գործարարներ, արվեստի, մշակույթի, հասարակական գործիչներ, բժիշկներ:

ՀՀ-ում տարեկան գրանցվում է քաղցկեղի 8500 նոր դեպք, որից 80-100-ը երեխաների մոտ, այս հիվանդությունից տարեկան մահանում է 5500 մարդ: Եթե Հայաստանում այն համարում են դատավճիռ, ապա ամբողջ աշխարհում հիվանդության ընկալումը բոլորովին այլ է: Սրանում համոզվել է հիմնադրամի հոգաբարձուների խորհրդի նախագահ, վարչապետի տիկին Աննա Հակոբյանը, որը այցելել է տարբեր երկրների բազմաթիվ արյունաբանական կլինիկաներ ու բոլորովին այլ պատկերի ականատես եղել, ներկաներին պատմեց այդ մասին:

Կան բոլոր նախադրյալները, նաև մարդիկ, ովքեր պատրաստ են ևս մեկ կյանք փրկելու գործում իրենց լուման ներդնել: Աննա Հակոբյանը դա անում է՝ աճուրդի հանելով իր սիրելի զարդերից մեկը:

Փոխարենը առատաձեռնությունը կարող է նվիրաբերության բերկրանք պարգևել, ընդգծում է Աննա Հակոբյանը՝ ներկայացնելով հիմնադրամի նպատակները. դրանցից մեկը հյուրատան կառուցումն է այն ընտանիքների համար, որոնք մարզերից են երեխաներին բերում բուժվելու, երկրորդը պալյատիվ բաժանմունքի ստեղծումն է:

«Ազնավուր հիմնադրամի» անունից Քրիստինա Ազնավուրը 10 միլիոն դրամ է նվիրաբերում «Ժպիտների քաղաք» հիմնադրամին, իր խոստումը կատարում է նաև Ջոեֆ Ֆարգիերը:

Գալա-ընթրիքին Ջոեֆ Ֆարգիերը արյունաբանական կենտրոնում բուժվող 12-ամյա Արկադի Մելքոնյանին է նվիրել իր կիթառը։ Վերջինս, շնորհակալություն հայտնելով նվերի համար, Ֆարգիերին է նվիրել հայկական դուդուկ։

Եվս մեկ կիթառ խմբի անդամների ստորագրությամբ հանվել է աճուրդի։