Մինչև տարեվերջ Գյումրու փողոցներում կտեղադրվեն 5000 ճանապարհային նշաններ, տեսախցիկներ ու արագաչափեր

Գյումրու վերանորոգված փողոցներում վարորդները խախտում են երթևեկության կանոնները՝ գերազանցում են արագությունն ու անտեսում գծանշումները: Սրան նպաստում է նաև այն, որ փողոցներում բացակայում են ճանապարհային նշանները:«Ճանապարհային երթևեկության ազգային խորհուրդ» ՀԿ-ն է ուսումնասիրություններ կատարել Գյումրու փողոցներում ու իրականացրել նաև իրազեկվածության բարձրացման ակցիաներ: Արդյունքում կոնկրետ գործողություններ են նախատեսվել, որոնք Գյումրիում երթևեկությունը կդարձնեն ավելի անվտանգ:Վերջին մեկուկես տարվա ընթացքում, ինչ Գյումրիում փողոցաշինական աշխատանքներն են, երթևեկությունն անկանոն է: Այն հատվածներում, որտեղ աշխատանքները դեռ ավարտված չեն, վարորդները ստիպված շրջանցում են, ճանապարհ գտնում՝ ով ինչպես կարող է:Իսկ այն փողոցներում, որոնք արդեն բարեկարգ են, գերազանցում են արագությունը: Գծանշումներն արված են, բայց ճանապարհային նշաններ ու տեսախցիկներ չկան, ինչն էլ վարորդներին արագությունը գերազանցելու և խախտումներ կատարելու առիթ էր տալիս։Արագության գերազանցումը միակ խախտումը չէ: Սայաթ Նովա, Գերցեն, Վ. Սարգսյան փողոցները, Հայուհու և Ազնավուրի հրապարակները գոտիավորված են, բայց վարորդներից շատերը, հատկապես վերադասավորման ու շրջադարձերի ժամանակ, խախտում են կանոններն ու չնախատեսված հատվածներում հատում գծանշումները՝ անգամ նախազգուշացնող լուսացույցների առկայության դեպքում:«Երևանում դուք շատ քիչ կարող եք տեսնել, որ մեքենան խախտի այն գիծը՝ մինչև զեբրային հասնելը, որովհետև հստակ  գիտի, որ կա տուգանք, Գյումրիում չկա, մենք կարող ենք ականատես լինել, որ մարդիկ անգամ կարմիրն անգամ դեռ չհանգած ու չփոխված կանաչի արդեն անցնում են խաչմերուկը՝ դրանով իսկ ստեղծելով երթևեկության վտանգավոր իրավիճակ»,- ասում է «Ճանապարհային անվտանգության ազգային խորհուրդ» ՀԿ-ի ղեկավար Պողոս Շահինյանը։«Ճանապարհային անվտանգության ազգային խորհուրդ» հասարակական կազմակերպությունն ուսումնասիրել է Գյումրու բոլոր կենտրոնական փողոցների երթևեկությունը: Պատկերն այսպիսին է, որ Գյումրիում վերանորոգված փողոցներում ճանապարհային նշանները բացակայում են, կամ դրանք երբեմն տեղադրված են լինում վարորդների համար ոչ տեսանելի հատվածներում։ Գյումրիում ինտենսիվ երթևեկությամբ փողոցներում նաև քիչ են կայանատեղիները, և մեքենաները կայանում են որտեղ պատահի, անգամ խաչմերուկներում, ինչը խոչընդոտում է երթևեկությանը։Երթևեկության կանոնները խախտում են նաև հետիոտները: Ճանապարհն անցնում են չնախատեսված հատվածներում։ Ըստ Գյումրիում անցկացված ուսումնասիրության՝ պատճառը ստորգետնյա կամ վերգետնյա անցումների պակասն է և ոչ միայն դա:Հետիոտների անվտանգությունն ապահովելու համար էլ Ճանապարհային ոստիկանությունը նախատեսում է Գյումրիում կրթական հաստատությունների մոտ սահմանված 40 կմ/ժ արագությունը 10-ով նվազեցնել: Այսինքն՝ այդ հատվածներում թույլատրելի արագությունը կլինի 30 կմ/ժ:

«Էստեղ խոսքն այն մասին է, որ 10 արագությունը տարբերություն է տալիս արգելակման ճանապարհում մեքենայի համար մինչև 10-15 մետր, 40 արագությունը եթե նվազեցնենք 30-ի, գրեթե 99 տոկոսով ապահովում է հետիոտների վրաերթի ենթարկվելու անվտանգությունը»,- նշել է Պողոս Շահինյանը։Երթևեկության կանոնակարգումը, ըստ մասնագետի, մեծապես կախված է փողոցների կահավորանքից։ Ճանապարհային ոստիկանությունն ու քաղաքապետարանը մինչև տարեվերջ տեղադրելու են հինգ հազար ճանապարհային նշաններ, նոր լուսացույցներ ու տեսախցիկներ։