ՄԱԿ-ի զարգացման ծրագիրը Շիրակի մարզի երիտասարդներին աշխատանքի տեղավորվելու հմտություններին է ծանոթացնում

Շիրակի մարզի երիտասարդների ավելի քան 40 տոկոսը համարվում է գործազուրկ: Աշխատանք փնտրողների գիտելիքների անհամապատասխանությունը գործատուների ներկայացրած պահանջներին հիմնական պատճառն է, որ աշխատանք չեն գտնում: Հայաստանի երիտասարդությանն ինչպես նախապատրաստել ապագայի աշխատաշուկային: Նոր մասնագիտություններ ձեռք բերելու և հմտանալու նոր հնարավորություններն է փորձում բացահայտել ՄԱԿ-ի զարգացման ծրագիրը, որն իրականացնում է Հայաստանյան գրասենյակը՝ Ռուսաստանի Դաշնության ֆինանսավորմամբ: Ծրագրի շրջանակներում Գյումրիում անցկացվել է «Հնարավորությունների տոնավաճառ» միջոցառումը:

Երիտասարդներին պետք է հնարավորություն ընձեռել սովորելու այն կարևոր հմտությունները, որոնք անհրաժեշտ են աշխատաշուկայում հաջողակ լինելու համար: Ծրագրի խոսնակները այն կարծիքին են, որ կրթական ծրագրերը չեն համապատասխանում ներկա տնտեսության պահանջներին: Հետո ավելի շատ խոսեցին ոչ թե կրթության որակների, այլ երիտասարդների մոտ բացակայող հմտությունների մասին:

Հայաստանում ՄԱԿ-ի զարգացման ծրագրի մշտական ներկայացուցիչ Դմիտրի Մարիյասինի համոզմամբ` երիտասարդության որոշ շրջանակի մոտ չկա շահագրգռվածություն, թե ուր դիմել և ինչ աշխատանքի ու ինչպիսի առաջարկներ կան մարզում: Չունեն նաև այն հմտությունները, որոնք որ թույլ կտան աշխատանքի ընդունվել: Այս ծրագիրը կարող է օգնել լրացնել այդ բացը և արդյունքում արդարացնել նաև գործատուների պահանջները:

Հմտությունների պակասը, ըստ բանախոսների, գալիս է երիտասարդների պասիվությունից: Լինել ակտիվ, ոչ թե հակաճառող, կարևորել ինքնուրույն մտածողությունն ու աշխատանքը:

Մասնագետները խորհուրդ են տալիս երիտասարդներին, ասում են՝ սեփական փորձով են համոզվել: Տնտեսական զարգացումները արագ են, հնարավորությունները՝ շատ, պետք է կարողանալ դրանք տեսնել:

«Այբ» դպրոցի տնօրեն Արամ Բախչանյանի հորդորն է երիտասարդներին.

«Սովորել այն, ինչը դժվար է սովորել, որքան ավելի դժվար է սովորել, այնքան մարդու ուղեղը զարգանում է, մի՛ ուղղորդվեք ձեր տաղանդով, եթե տաղանդավոր երգիչ եք, մի՛ մտածեք, որ պիտի երգիչ դառնաք, տաղանդավոր երգիչը կարող է այլ բաներ էլ լավ անել: Տաղանդը օգնում է հեշտ անել ամեն ինչ»:

Փոփոխությունների հետևից կրթական համակարգը որակապես չի հասնում: Սա պատճառներից մեկն է, որ գործատուն աշխատող է փնտրում, բայց թափուր աշխատատեղերը ամիսներով չեն համալրվում, աշխատանք փնտրող գործազուրկների թիվն էլ չի նվազում: Գյումրիում, պաշտոնական տվյալներով, 13 հազար մարդ, որի 40 տոկոսը` երիտասարդ, աշխատանք չի գտնում:

Առաջին հերթին, ըստ բանախոսների, երիտասարդները պետք է հասկանան, որ մասնագիտության ընտրության հարցում կողմնորոշվել է պետք ոչ թե ընտանիքի կարծիքի հիման վրա, այլ հաշվի առնելով, թե ո՛ր մասնագիտություններն են պահանջված: Ծրագիրը նաև Գյումրիում քոլեջների հետ է պատրաստվում աշխատել: Շիրակի մարզում տուրիզմը ևս զարգացող ճյուղ է, բայց, ըստ բանախոսների, կադրային խնդիրներ ունենք, որակյալ էքսկուրսավարներ չկան:

Շիրակի մարզպետ Տիգրան Պետրոսյանի խոսքերով` Շիրակի մարզում զբոսաշրջիկների թիվը հաջորդ տարի 20 տոկոսով ավելանալու է:

Քննարկմանը զուգահեռ, տեխնոլոգիական կենտրոնի սրահում տոնավաճառ էր կազմակերպվել: Այն ավելի շուտ ոչ թե գործազուրկի և գործատուի միջև հանդիպման հարթակ էր, այլ կազմակերպությունների արտադրանքն ու ծառայությունները ցուցադրելու հնարավորություն:

Ինչպես միշտ, հին արհեստների ու արվեստների ցուցադրությունը նման տոնավաճառների անբաժան մասն են կազմում Գյումրիում: Փայտի փորագրության վարպետ Լարիսա Գրիգորյանի խոսքերով` արհեստավորը մինչև կեսօր է սոված, ու աշխատող մարդը, եթե ինքն իր մասնագիտության մեջ հմտանա, անպայման տեղ կգտնի` իրացնելու իր ստեղծած աշխատանքը:

Հնարավորությունների տոնավաճառի հիմնական մասնակիցները ՀԿ-ների ներկայացուցիչներն էին, որոնք կամավորներ էին փնտրում իրենց ծրագրերն իրականացնելու համար:

Պարզվում է, հասարակական սեկտորն էլ որակյալ աշխատողների պակաս ունի: Ծրագրի պատասխանատուները Հայաստանի ապագան տեսնում են ինտելեկտուալ տեղեկատվական տեխնոլոգիաների, կայուն գյուղատնտեսության, տուրիզմի զարգացման մեջ: ՄԱԿ-ը զարգացման այս ծրագրի շրջանակներում պատրաստ է երիտասարդներին սովորեցնել նաև բիզնես կառավարման հմտություններ: