Գյումրիում մեկնարկել է թափառող շների ստերջացման ծրագիրը

Գյումրիում թափառող շները ստերջացվում են: Գործընթացը օրեր առաջ է սկսվել: Հիշեցնենք, որ 4 անգամ հայտարարված մրցույթներից հետո քաղաքապետարանը վերջապես գտավ Գյումրիում անասնաբուժական ծառայություն իրականացնող անհատ ձեռներեցի, որը մասնակցեց մրցույթին և տեղական բյուջեի ֆինանսավորմամբ ստերջացում կատարելու իրավունք ստացավ:

Կենտրոն ահազանգերը շատ են տարբեր թաղամասերից։ Քաղաքապետարանի հետ պայմանագիր են կնքել առայժմ 350 շան ստերջացման համար: Իսկ թե սա Գյումրիի թափառող շների որ մասն է կազմում, հստակ չէ, քանի որ թափառող կենդանիների հաշվառում և կոնկրետ թիվ չկա:

Շների ստերջացման գործը սկսվում է կենդանիներին բռնելուց: Անասնաբուժական կլինիկայի աշխատակիցները տարբեր թաղամասեր գալիս են բնակիչների ահազանգերով, բռնում են թափառող կենդանիներին անվնաս մեթոդներով: Գործն այնքան էլ հեշտ չէ, խմբերով շրջող շներին ոչ միշտ է հաջողվում բռնել: Մարդամոտ են այն կենդանիները, որոնք ագրեսիվ վարքագիծ չունեն:

Գյումրիի  փողոցներից անասնաբուժական կլինիկա բերվել ու ստերջացվել է 20-ից ավելի թափառող շուն: Ստերջացման պարտավորությունը ստանձնել է գյումրեցի անասնաբույժ Արմինե Եղիկյանը: 20 տարի ոլորտում է աշխատում, իր անձնական կլինիկան հիմնել է 5 տարի առաջ, հագեցրել վիրահատական անհրաժեշտ պարագաներով: Այստեղ օրական մինչև 6 թափառող շուն է բերվում ու ստերջացվում:

Յուրաքանչյուր կենդանու համար բուժման, վիրահատական ու հետվիրահատական շրջանը 3-4 օր է տևում: Անասնաբույժներն ասում են` առայժմ իրենց մոտ տեղափոխված շների մոտ լուրջ հիվանդություններ չեն հայտնաբերել: Վիրահատական միջամտությամբ ստերջացնում են` կանխելով տվյալ կենդանու բազմացումը:

Ստերջացումից հետո յուրաքանչյուր շուն ստանում է համարակալմամբ ականջակալ: Հերթական համարը հաշվառման համար է, իսկ ականջակալը ապացույցը կամ տարբերանշանը, որ տվյալ շունը ստերջացված է: Իսկ ստերջացված լինելն արդյո՞ք նշանակում է, որ կենդանին անվտանգ է:

«Շատ անհատական իրավիճակ է: Այս կենդանիներն իրենց կյանքում այլևս բազմացման ցիկլի միջով չեն անցնի: Հեռացված են այն օրգանները, որոնք նպաստելու են բազմացմանը: Ստերջացնում ենք»,- SHANTNEWS.am-ին ասել է անասնաբույժ  Արման Եղիկյանը:

Ամեն շաբաթ ստերջացված կենդանիների թիվ են ներկայացնելու Գյումրիի քաղաքապետարան: Սա հնարավորություն կտա հաշվառել, թե որ թաղամասում քանի թափառող շուն կա: Մինչ այժմ միայն մոտավոր տվյալներ կան, որ Գյումրիում 2000 թափառող շուն կա:

«Կան մարդիկ, որոնք մտածում են, թե սա կենդանիներին վերացնելու ծրագիր է, կենդանին այլևս չպիտի վերադառնա: Ուզում ենք հասկացնել, որ կենդանիներին չենք վերացնում, ստերջացնում ենք: Հորմոնային ֆոնը վերանում է, և զուգավորման շրջանում կենդանիներն ագրեսիվ պահվածք չեն ունենա: Իսկ կենդանիների ագրեսիան գալիս է մարդկանց ագրեսիայից»,- SHANTNEWS.am-ի հետ զրույցում ասել է անասնաբույժ Արմինե Եղիկյանը:

Անասնաբույժների խոսքերով` շներից վախեցող բնակիչները ստերջացման իմաստը կհասկանան, երբ դրա արդյունքը տեսնեն: Իսկ արդյունքի մասին, ըստ նրանց, հնարավոր կլինի խոսել մոտ 3 տարի անց, եթե ստերջացման ծրագիրը շարունակվի: Գյումրիում թափառող կենդանիների կացարան չկա։ Ստերջացումից հետո կենդանիները վերադարձվում են այնտեղ, որտեղից բերվել են: