Խորհրդարանական ընտրություններ և կորոնավիրուս. Իրանի մարտահրավերները

Արդյոք կարո՞ղ են թուլանալ ռեֆորմիստների դիրքերը Իրանում

Իրանում այսօր խորհրդարանական ընտրություններ են: Մեծ է հավանականությունը, որ երկրի նախագահ Հասան Ռոհանիի կողմնակից ռեֆորմիստները կթուլացնեն դիրքերը: Սա տեղի է ունենում Իրանի համար բավական դժվար ժամանակահատվածում՝ տնտեսական ու ոչ միայն տնտեսական պատժամիջոցներ Արևմուտքի կողմից: Վերջին օրերին էլ Իրանը բախվել է կորոնավիրուսով վարակման դեպքերի: 

Իրանում Մեջլիսի ընտրություններում առաջին ընտրողների թվում են եղել երկրի հոգևոր առաջնորդ այաթոլլա Ալի Խամենեին և նախագահ Հասան Ռոհանին: Նրանցից Ալի Խամենեին կոչ է արել ընտրողներին ամեն կերպ մասնակցել ընտրություններին:

«Քվեարկելը հավատացյալի պարտքն է: Յուրաքանչյուրը, ով հավատում է այս երկրի ազգային շահերին, պետք է մասնակցի քվեարկությանը: Իմ խորհուրդն է ջանքեր գործադրել ու ընտրության գալ»,– ասել է Խամենեին:

Երկրի նախագահ Հասան Ռոհանին էլ հույս է հայտնել, որ այս խորհրդարանը առավել ակտիվ կլինի և ի վիճակի կլինի լուծել մարդկանց հուզող խնդիրները:

«Դա կլինի ավելի ակտիվ խորհրդարան: Եվ դա կլինի այնպիսին, որ մարդիկ ականատես կլինեն` այն կկարողանա լուծել իրենց կենսական խնդիրները»,– ասել է Ռոհանին:

Այժմ խորհրդարանում մեծամասնություն են կազմում ռեֆորմիստները, որոնք սատարում են երկրի նախագահ Հասան Ռոհանիին: Սակայն մեծ է հավանականությունը, որ ռեֆորմիստները կարող են թուլացնել իրենց դիրքերը՝ զիջելով պահպանողականներին և կառավարության քաղաքականության հակառակորդներին:

Ընտրություններն անցնում են Իրանի համար բավական բարդ ժամանակահատվածում: Դեռ դեկտեմբերին Իրանում անդորրը խաթարեցին բենզինի համար իրականացվող հակակառավարական ցույցերը, ապա նաև ուկրաինական «Բոինգ» օդանավի խոցումից հետո տեղի ունեցած ակցիաները: Ընտրություններում որոշակի գործոն կարող է լինել նաև Իրանի գլխավոր ռազմավարներից մեկի՝ Իրանի պահապանների կորպուսի գեներալ Ղասեմ Սոլեյմանիի սպանությունը: Բացի դրանից՝ Ռոհանիի ղեկավարման այս ժամանակահատվածը հայտնի դարձավ նաև ԱՄՆ-ի հետ միջուկային ասպարեզում ձախողված հարաբերություններով, ուստի, այդ ամենը կարող է ազդեցություն ունենալ քվեարկության ելքի վրա:

Ավելի քան 7000 թեկնածու 290 մանդատի համար

Պատգամավորական 290 մանդատների համար պայքարում է ավելի քան 7100 թեկնածու, որից մոտ 800-ը կին է: 290 տեղից 5-ը նախատեսված է կրոնական փոքրամասնությունների համար: Հայ համայնքի համար նախատեսված է 2 տեղ: Ընտրություններին ընդհանուր առմամբ մասնակցում է 6 հայ թեկնածու:

Կորոնավիրուս. փորձաքար ընտրական Իրանի համար

Առանց այն էլ առկա քաղաքական ու տնտեսական խնդիրներին՝ Իրանն այժմ բախվել է կորոնավիրուսի տարածման դեպքերին: Առայժմ հաղորդվել է 5 դեպքի մասին, 2 մարդ մահացել է: Դեպքերը հայտնաբերվել են Ղոմ քաղաքում:

Ի դեպ, այն համարվում է շիա մահմեդականների գլխավոր սրբավայրերից մեկը, որտեղ ուխտի են գալիս նաև այլ վայրերից: Ուստի Իրանի առողջապահության նախարարությունը դիմել է իշխանություններին՝ Ղոմ քաղաքում ուխտատեղիներում աղոթել ցանկացողների մուտքը արգելելու կամ  սահմանափակելու պահանջով:

Սա արվում է զանգվածային կուտակումներ թույլ չտալու և կորոնավիրուսի տարածումը թույլ չտալու համար, սակայն նույն այդ ընթացքում երկրի իշխանությունները կոչ են անում ակտիվ մասնակցություն ունենալ զանգվածային կուտակումներ ենթադրող ընտրություններին:

Մինչ Իրանում այսպիսի միջոցներ են ձեռնարկում` Իրաքը փակել է Իրանի հետ սահմանը, իսկ Քուվեյթը դադարեցրել չվերթները դեպի Իրան: