Դատախազությունը ՃՈ-ում և ԴԱՀԿ-ում խախտումներ է հայտնաբերել

Վերահսկիչ պալատի խորհրդի կողմից ԴԱՀԿ ծառայությունում իրականացված՝ 2016-2017թթ. ընթացքում պետա­կան բյուջեից հատկացված միջոցների օգտագործման, բյուջետային մուտ­քերի ապահովման նկատմամբ վերահսկո­ղության արդյունքների ուսումնասիրությամբ հայտնաբերվել են ճանապարհային ոստիկանության և ԴԱՀԿ ծառայությունների աշխատակիցների կողմից թույլ տրված թերություններ և բացթողումներ, նրանց գործառույթների հետ կապված իրավական, ծրագրային և կազմակերպչական բնույթի խնդիրներ:

Դատախազության հանրային կապերի վարչությունից հայտնում են, որ ԴԱՀԿ ծառայու­թյան և ՊԵԿ-ի միջև էլեկտրո­նային փաստաթղթաշրջանառու­թյու­նում առկա են ինչպես իրավա­կան, այնպես էլ ծրագրա­յին բնույթի բացթողումներ և թերություն­ներ, որոնց հետևանքով կատարո­ղական վարույթներով բավականին խոշոր գումարներ հնարավոր չի եղել բռնագանձել պետբյուջե:

ԴԱՀԿ ծառայու­թյան և  ՊԵԿ-ի միջև էլեկտրո­նային փաստաթղթաշրջանառու­թյու­նը սահմանող արդարադա­տության նախարարի հրամանով ՊԵԿ-ից ֆիզիկական անձանց եկա­մուտների վերա­բերյալ տեղեկատվություն ստանալու պահանջ նախա­տես­ված չի եղել,  ինչի պատճառով նշված ժամանակաընթացքում տասնյակ հազարավոր պարտապաններ աշխատել են, ունեցել եկամուտ, սակայն հարկադիր կատարողները նրանց նկատ­­մամբ բռնագանձման ենթակա գումարով վարույթ­ներն ավար­տել են պարտապանի կողմից գույք կամ եկամուտ չունենալու, ինչպես նաև պարտապանի կամ նրա գույքի գտնվելու վայրը հայտնի չլինելու հիմքերով:

Բացի այդ, պարզվել է, որ ծառայության մշակած էլեկտրո­նային եղանակով հարցման համապատասխան ձևում խիստ թերի են սահմանված իրավաբանական անձանց հաշ­վար­կային հաշվեկշիռների վերաբերյալ տեղեկություններ պահանջելու, իսկ էլեկտրո­նային եղանակով ստացված պատասխաններում հիմնական և դրամական միջոց­ների, հումք-նյութերի և դեբիտորական պարտքերի մասին տեղեկություններ ներկա­յացնելու կարգերը: Դրա հետևանքով հնարավոր չի եղել տվյալներ ստանալ պարտա­պան կազմա­կերպու­թյունների հաշվապա­հա­կան հաշ­վեկշիռներում առկա դրամական ակտիվների վերաբերյալ և գումարների բռնա­գանձման ուղղությամբ իրակա­նաց­նել արդյունավետ կատարողական գործողություններ:

Ուսումնասիրությամբ պարզվել է նաև, որ 2016-2017թթ. ընթացքում Ճանապարհային ոստիկանության աշխատակիցները ԴԱՀԿ ծառայություն ուղարկված էլեկտրոնային հաղորդագրություն­ներում չեն ներառել կամ թերի են լրացրել կատարողական վարույթներ հարուցելու համար անհրաժեշտ, համապատասխան իրավական ակտերով նախատեսված պարտադիր տվյալները, կամ վարչական ակտերը կատարման են ներկայացվել ժամկետների խախտմամբ, ինչի հետևանքով էլեկտրոնային համակարգը մերժել է կատարողական վարույթների հարուցումը, և պետբյուջե չեն բռնագանձվել բավականին խոշոր չափերի գումարներ:

Քանի որ այս խնդիրները պետական շահերի պատշաճ պաշտպանությունն ապահովելու տեսանկյունից հրատապ լուծման անհրաժեշտություն են առաջացնում՝ գլխավոր դատախազը գրություններ է հասցեագրել արդարադատության նախարարին և ոստիկանապետին: