Կորոնավիրուսով պայմանավորված՝ ինչ իրավիճակ է Արցախում և ինչ միջոցառումներ են իրականացվում

Արցախի Հանրապետությունում հայտնաբերվել է կորոնավիրուսով վարակման 8 դեպք, որոնցից 6-ն արդեն առողջացել և դուրս է գրվել, 2 քաղաքացի շարունակում է բուժումը: Ընդհանուր արվել է 287 թեստավորում: Այս մասին մայիսի 1-ին կայացած ասուլիսի ժամանակ հայտնել է ԱՀ առողջապահության նախարարության աշխատակազմի պետական հիգիենիկ և հակահամաճարակային տեսչության պետ Օֆելյա Հարությունյանը:

«Մենք անում ենք հնարավոր ամեն բան, որ մեզ մոտ վիճակագրությունը, վիրուսով պայմանավորված, չվատթարանա: Մեր աշխատակիցները նաև հերթապահություն են իրականացնում հսկիչ-անցագրային կետերում: Այս պահին գործում է 3 սահմանային բժշկասանիտարական հսկիչ կետ` «Նոր Խարխափուտ», «Աղավնո» և «Խնձորեսկ»: Բոլոր աշխատակիցները ապահովված են անհրաժեշտ պաշտպանիչ միջոցներով: Այն աշխատակիցները, որ շուրջօրյա հերթապահում են, աշխատավարձից բացի, լրացուցիչ ֆինանսավորվում են»,- տեղեկացրեց Օֆելյա Հարությունյանը:

Նրա խոսքերով՝ եթե մինչ սահմանափակումները ամեն օր այդ անցակետերով անցնում էր մոտ 1500 մարդ, ապա հիմա այդ թիվը նվազել է` հասնելով 500-ի: Արցախի Հանրապետություն մուտք գործելիս բոլորի ջերմությունը չափվում է, բոլոր կետերն ապահովված են ջերմաչափերով: Եթե ջերմաստիճանը նորմայի սահմաններում է, տվյալ քաղաքացուն առաջարկվում է ժամանելուն պես ինքնամեկուսանալ 14 օրով, իսկ եթե ջերմությունը նորմայից բարձր է, քաղաքացին անհապաղ մեկուսացվում է, որտեղ հետևում են նրա առողջական վիճակին և թեստավորում են:

ԱՀ ոստիկանության անձնագրային և վիզաների վարչության պետ, ոստիկանության գնդապետ Ջիվան Ղահրամանյանն էլ տեղեկացրեց, որ Բակո Սահակյանի հանձնարարականով մարտի 13-ից ոստիկանությունը հսկողություն է սահմանել օտարերկրյա քաղաքացիների մուտքի վրա, անցակետերում ուժեղացվել են վարակի տարածումը կանխելուն ուղղված աշխատանքները:

«Անցակետերում կանգնեցվում են տրանսպորտային միջոցները, ստուգվում է սահմանը հատող անձանց փաստաթղթերը, բեռնափոխադրման փաստաթղթերը, Հայաստան մեկնող անձանց և ՀՀ տարածքում տեղաշարժվելու համար սահմանված տեղեկություն պարունակող թղթի առկայությունը և անհրաժեշտության դեպքում ծանոթացնում ենք նաև պարետի որոշումներին»,- ասաց Ղահրամանյանը:

Անձնագրային և վիզաների վարչության պետը նաև տեղեկացրեց, որ վարակման կանխարգելիչ միջոցառումների շրջանակներում հաստատված վարակով անձանց հետ հնարավոր շփում ունեցած ԱՀ «Աղավնո» հսկիչ անցագրային ծառայության կետում հսկողություն իրականացրած 4 աշխատակիցները ևս ինքնամեկուսացվել էին, թեպետ այդ պահին եղել են ձեռնոցներով և դիմակով: Ներկայումս նրանց ինքնազգացողությունը լավ է և արդեն անցել են ծառայության:

ԱՀ ԱԻՊԾ փրկարար ուժերի վարչության արագ արձագանքման հատուկ ստորաբաժանման հրամանատար, փ/ծ փոխգնդապետ Մեխակ Արզումանյանն էլ տեղեկացրեց, որ ախտահանվում են նաև հանրապետություն մուտք գործող տրանսպորտային միջոցները: Մասնավորապես, մայիսի 1-ին՝ ժամը 08։00-ի դրությամբ անցակետերում ախտահանվել է 6095, իսկ շրջիկ հենակետերում` 1958 տրանսպորտային միջոց:

Դիտարկմանը, թե Հայաստանում սահմանափակումների մեղմացում կա, արդյո՞ք Արցախում ևս սպասվում են մեղմացումներ, բանախոսները նշեցին, որ առայժմ նման որոշում չկա: