Հետագա շրջանը կախված է ՀՀ քաղաքացու պատասխանատվությունից. Ավինյան

«Սահմանափակումները հանվում են տնտեսական գործունեություն իրականացնող ընկրությունների մեծամասնության վրայից և, մասնավորապես, ամբողջությամբ բացվում է մշակող արդյունաբերության ոլորտը, բացվում է մանրամեծածախ առևտրի որոշակի հատված բացի խոշոր առևտրային կենտրոններից՝ մոլերից և խոշոր շուկաներից»,-ՀՀ վարչապետ Նիկոլ Փաշինյանի և ՀՀ առողջապահության նախարար Արսեն Թորոսյանի հետ հանդիպամն ընթացքում նշեց ՀՀ փոխվարչապետ և ՀՀ պարետ Տիգրան Ավինյանը:

Նա ասաց, որ բացվում են տարատեսակ տնտեսական գործունեության տեսակներ, և հիմա, փաստացի, ցանկում մնացել են բացառություններ՝ գործունեության սահմանափակ լինելու առումով: Նա հայտնեց, որ դրանք մոտավորապես 10-12-ն են:

«Շարունակում է սահմանափակ մնալ կրթական ոլորտի գործունեությունը. միայն  հեռավար կերպով է կազմակերպվում կրթությունը, շարունակում է փակ մնալ ամենացավալի հատվածը՝ տրանսպորտի ոլորտը, որը վարակի տարածման տեսանկյունից ամենավտանգավոր ոլորտներից մեկն է»,-նշեց փոխվարչապետը՝ հայտնելով, որ, այնուամենայնիվ, որոշակի կանոնների մշակումից և ադապտացումից հետո հնարավորություն կլինի բացելու տրանսպորտը:

Ավինյանը նաև նշեց, որ շարունակում են փակ մնալ մոլերը, որոնք մեծ թվով մարդկանց հավաքատելի կարող են դառնալ, որպեսզի կրկին վարակի տարածման հավանականությունը նվազեցվի:

Անդրադառնալով այն հարցին, թե ընդհանուր առմամբ ինչ օգուտ է տվել սահմանափակումների շրջանը՝ ասաց.

«Ի՞նչ տվեք սահմանափակումների շրջանը, ինչո՞ւ գնացինք այդ շրջանին: Կարծում եմ, որ պետք է ակնառու լինի այն երկրների փորձը, որոնք չգնացին սահմանափակումների. նրանք արձանագրեցին առողջապահական համակարգի փաստացի կոլլապս, որը մեզ մոտ տեղի չունեցավ: Առողջապահական համակարգը մենք հասցրեցինք կարողությունների առումով զարգացնել, ադապտացնել և թեստերի քանակի, և համապատասխան շնչառական սարքերի ավելացման և նոր  մասնագետների վերապատրաստման առումով: Մենք համոզված ենք, որ նվազագույնը ակտիվ դեպքերի որոշակի քանակի՝ մի քանի հազար հիվանդի, մենք կարող ենք սպասարկել: Սա շատ կարևոր արձանագրում է: Ինչ վերաբերում է արդեն վարակի հետագա զարգացման որոշակի ենթադրություններին, որոնք մենք ունեինք և մասնավորապես կապված ամառվա սեզոնի հետ, կրկին շատ երկրների փորձը ցույց է տալիս, որ բարձր ջերմաստիճանի դեպքում վարակը շարունակում է տարածվել, և նման փորձ ունեն տարբեր արաբական երկրները, որտեղ արդեն ջերմաստիճանը 35-40 աստիճան է, բայց օր օրի աճում է վարակակիրների թիվը»:

Ավինյանի կարծիքով՝ հետագա վիճակը մեծապես կախված է  ՀՀ յուրանաքանչյուր քաղաքացու պատասխանատվությունից և գիտակցությունից:

«Իրականում, սա մեզ համար թեստ է լինելու, որքանով կկարողանանք պահպանել հիվանդության տարածումը կանխող որոշակի կանոններ, և տնտեսական գործունեություն իրականացնողները որքանով կկարողանան պատասխանատվությամբ մոտենալ:

Իհարկե, մենք ունենք պատժիչ գործողություններ՝ կանոնները չպահպանելու համար նախատեսված:

Բայց, այնուամենայնիվ, պոստ ֆակտում այդ պատիժը իրականացվելու դեպքում այն ռիսկը, որ բռնկումներ չեն լինի, չի նվազի»,-ընդգծեց նա: