Ծիրանենիներն ու դեղձենիները տարածված հիվանդության «ճիրաններում են»

Հանրապետության մի շարք համայնքներից ահազանգում են, որ պտղատու ծառերի, հատկապես ծիրանենու դեպքում խնդիր է նկատվում:

SHANTNEWS.am-ը խնդիրը պարզելու նպատակով զրուցել է գյուղատնտեսական գիտությունների թեկնածու Գառնիկ Պետրոսյանի հետ: Նա ասել է, որ պտղատուների հիվանդության հետ գործ ունեն, ու այդ հիվանդությունը բնորոշ է հանրապետության ողջ տարածքին:

«Այս տարի բնակլիմայական պայմանները բացառիկ նպաստավոր են պտղատու ծառատեսակների սնկային հիվանդությունների զարգացման համար: Հատկապես խոսքը վերաբերում է կորիզավոր պտղատեսակների ծակոտկեն բծավորությանը, որը բոլոր պտղատեսակներն է վնասում, շատ խիստ տուժում են ծիրանենին, դեղձենին, կեռասենին»,- ասել է Գառնիկ Պետրոսյանը՝ հավելելով, որ այս օրերին հատկապես ծիրանենու դեպքում նկատելի է տերևաթափ, ծակոտիներ կան տերևների վրա, պտուղների վրա, սաղարթի հատկապես ստորին հատվածներում կարմրա-նարնջագույն բծեր են առկա:

Գառնիկ Պետրոսյանի խոսքերով՝ դեղձենու դեպքում էլ նկատելի գանգռոտություն հիվանդությունը, որը դարձյալ պայմանավորված է սառը ջերմաստիճանային ռեժիմով և հաճախակի դիտվող տեղումներով:

«Ի՞նչ է պետք անել: Շատ կարևոր է, որ այն այգիներում, որտեղ սնկային հիվանդությունների զարգացման վտանգ կա, դեռևս նախորդ տարվա աշնանից պետք է սկսեն պայքարի միջոցառումների իրականացումը: Մասնավորապես, ծակոտկեն բծավորության կամ գանգռոտության դեմ պետք է ուշ աշնանը՝ մինչև տերևաթափը, կատարել բարձր կոնցենտրացիաներով բուժում՝ պղինձ պարունակող պրեպարատներով:

Հաջորդ բուժումն արդեն տվյալ տարվա ընթացքում պետք է կատարվի՝ մինչև բողբոջների ուռչելը կամ բողբոջների ուռչելու սկզբնական հատվածում, այնուհետև ծաղկումից անմիջապես հետո, երբ պսակաթերթիկներն արդեն հարյուր տոկոսով թափվում են, պետք է նորից բուժում կատարել»,- հավելել է Պետրոսյանը ու նաև նշել, որ հատկապես ցածր ջերմաստիճանի գրանցման պայմաններում առավելագույնը տասն օրը մեկ պետք է բուժումը կրկնել: Այսինքն՝ վերջին շրջանում պետք էր հենց այդ մեթոդը կիրառել:

Ինչ վերաբերում է այն հանգամանքին, որ անընդհատ անձրևում է, ինչպե՞ս բուժել:

Պետրոսյանն ասել է, որ բացառիկ օրեր են եղել, երբ ողջ օրն է անձրևել, 3-4 ժամ ընդմիջումը բավական է, որպեսզի տերևների խոնավությունն անցնի և բուժումն իրականացվի: Գառնիկ Պետրոսյանը նաև նշել է այն պրեպարատների անվանումները, որոնք նպաստավոր են հիվանդության դեմ պայքարում.

«Հիմա վարակ կա հատկապես սաղարթի ստորին հատվածներում՝ տերևները թափվում են, պտուղներն են գունավորվել, բծերն ակնհայտ են, բայց միջին և հատկապես բարձր հատվածներում դեռևս հիվանդության ախտանիշներ չեն նկատվում, ուրեմն պետք է շարունակել բուժումները, որպեսզի գոնե այդ վերևի հատվածի պտուղները չվնասվեն, որովհետև վնասված պտուղները ընդհանրապես պիտանի չեն շուկա հանելու համար. դրանք լավագույն դեպքում կարող են վերամշակման նպատակով օգտագործել»:

Ըստ Պետրոսյանի՝ հիվանդությունը նորություն չէ, տասնյակ տարիներ ուղեկցում է մեզ, գյուղատնտեսական աշխատանքների պատշաճ կատարման, ճիշտ բուժման պարագայում հնարավոր կլինի բերքի մի մասը փրկել: