Պայմանագիր Մադուրոյին տապալելու համար. Washington Post-ի հրապարակումը

Ամերիկացի կասկածյալ նախկին զինվորականները 

Մայիսի 3-ին Վենեսուելայի իշխանությունները հայտնեցին, որ Կոլումբիայի կողմից մոտորանավակներով երկիր ներխուժելու փորձ անողներից երկուսը ամերիկացիներ են՝ նախկին զինվորականներ՝ 34-ամյա Լյուկ Դենմանը և 41-ամյա Էրին Բերրին, ապա հաղորդվեց, որ Վենեսուելա ներխուժման փորձի համար ձերբակալված ամերիկյան ռազմածովային ուժերի նախկին զինվորական Լյուկ Դենմանը խոստովանել է, որ իր համախոհների հետ մտադիր էր գրավել Կարակասի օդանավակայանը:

Դրանից հետո ամերիկյան ռազմական ինքնաթիռները պետք է վայրէջք կատարեին օդանավակայանում և առևանգեին Վենեսուելայի նախագահ Նիկոլաս Մադուրոյին:

34-ամյա Լյուկ Դենմանը

Երեկ արդեն Վենեսուելայի պետական հեռուստատեսությունը եթեր հեռարձակեց Էրին Բերիի հարցաքննությունից հատվածներ: Հրապարակված երկու տեսանյութերում նա հետևյալ մանրամասներն է հայտնում:

«Թիրախներն էին DGCIM-ը, SEBIN-ը, Miraflores-ը և օդանավակայանի կարգավարական աշտարակը»,- ասել է նախկին զինվորականը:

«Միրաֆլորեսը» Վենեսուելայի նախագահի նստավայրն է, որտեղից պետք է, ըստ հրապարակված խոստովանական ցուցմունքի, բռնեին և տանեին Նիկոլաս Մադուրոյին:

41 -ամյա էրին Բերրին

Ի պատասխան հարցման, թե ուր պետք է նա տարվեր, Բերրին պատասխանում է, որ, ամենայն հավանականությամբ, ԱՄՆ: Բայց թե ինչպես, նա հետևյալ պատասխանն է տալիս.

«Ես վստահ չեմ: Ես գիտեմ միայն անհրաժեշտը»:

Համաձայնություն դավադրության մասի՞ն

Էրինը ցույց է տվել նաև այն փաստաթուղթը, որը ստորագրվել է SilverCorp ամերիկյան մասնավոր ընկերության ղեկավարի, Վենեսուելայի ընդդիմության ներկայացուցիչների կողմից: Այդ փաստաթուղթը հրապարակել է ամերիկյան Washington Post թերթը:

Թերթը նշել է, որ համաձայնագրի պատճենները իրենց տրամադրվել են հենց վենեսուելական ընդդիմադիրների կողմից: Ընդդիմադիրների կողմից փաստաթուղթը ստորագրել է վենեսուելական, այսպես ասած, ընդդիմադիր խորհրդարանի պատգամավոր Սերխիո Վերգարը: Ընդդիմության ղեկավար Խուան Գուաիդոյի ստորագրությունը չկա, սակայն փաստաթղթում, ընդհանուր առմամբ, նրա անձը շոշափվում է:

«Ծառայություն մատուցողների խումբը պետք է խորհուրդներ տա և օգնի գործընկերային խմբին՝ բռնելու (գերեվարելու), հեռացնելու Նիկոլաս Մադուրոյին, վերացնելու գործող ռեժիմը և հաստատելու Վենեսուելայի ճանաչված նախագահ Խուան Գուաիդոյին»,- մեջբերել է Washington Post թերթը: 

Այս փաստաթղթի գոյությունը կտրուկ հարվածում է Վենեսուելայի ընդդիմության ղեկավարի հեղինակությանը, քանի որ մինչ այս նա կտրականապես հերքում էր իր առնչությունը «Սիլվերքորփ» ընկերության հետ:

Silvercorp. ինչո՞վ է զբաղվում ամերիկյան մասնավոր ընկերությունը 

Silvercorp-ը մասնավոր ընկերություն է, որը գործում է Ֆլորիդայում: Այն հիմնադրել է նախկին զինվորական, Իրաքում և Աֆղանստանում ծառայած վետերան Ջորդան Գուդրոն:

Silvercorp ընկերության հիմնադիր Ջորդան Գուդրոն

Նրա ստեղծած ընկերությունը զբաղվում է անվտանգության ոլորտում տեխնոլոգիական լուծումներ առաջարկելով:

https://www.instagram.com/p/BwR4rdDHEgr/

Բացի դրանից, ընկերությունը ամբողջ երկրում ծառայություններ է մատուցել աերոտիեզերական և միջուկային օբյեկտների անվտանգության ապահովման բնագավառում:

https://www.youtube.com/watch?v=fvI0YD0wIKA

Վենեսուելայի իշխանությունները պահանջել են ԱՄՆ-ից իրենց արտահանձնել Գուդրոյին:

Վենեսուելայի նախագահը պնդում է նաև, որ դավադրությունը համաձայնեցված է եղել Վաշինգտոնի հետ, սակայն ԱՄՆ նախագահը և պետքարտուղարը կտրականապես հերքում են իրենց առնչությունը տեղի ունեցածին:

Միաժամանակ, ԱՄՆ պետքարտուղար Մայք Պոմպեոն ասել է, որ եթե Վենեսուելայում ԱՄՆ քաղաքացիներ են պահվում, ապա իրենք ամեն գործիք կօգտագործեն վերադարձնելու նրանց: