Ջաջուռ գյուղի անօթևան ընտանիքներից մի քանիսը ԲԳՎ-ներից հրաժարվելու պահանջ է ներկայացնում

Շիրակի մարզի գյուղական բնակավայրերի անօթևան ընտանիքների բնակարանային խնդրի լուծման երկու տարբերակ է գործում։ Բնակարանների գնման վկայագիր ծրագրից բացի, այս տարի մարզի 8 գյուղերում նախատեսվում է 55 բնակարան կառուցել։

Շահառուներն այն ընտանիքներն են, որոնք հրաժարվել են վկայագիր ծրագրից։ Ջաջուռ գյուղում 21 անօթևան ընտանիքից միայն մեկն է բնակարանի կառուցման շահառու, մյուսներին տրամադրվել են վկայագրեր։ Վկայագիր ստացած ընտանիքներից 7-ը պատրաստվում է հրաժարվել  վկայագրերից: Այս մասին հայտնում է SHANTNEWS.am -ի թղթակիցը:

Բնակարանի գնման վկայագրին համաձայնություն տվել են բոլորով, բայց վկայագիր ստանալուց 5 ամիս անց ընտանիքներից 7-ը բողոք է ներկայացնում, որ վկայագրի գնով տուն չեն գտնում անգամ գյուղում։

«Կորցրել եմ 3 սենյականոց բնակարան, հիմա ինձ փոխհատուցում են 2 սենյակ ու գումար 4 մլն 400 հազար դրամ, որով ես չեմ կարող գտնել բնակարան»,- ասել է վկայագրից հրաժարված անօթևաններից մեկը:

Տների շուկայական ու կադաստրային արժեքները անհամապատասխան են, գյուղում վաճառքի տներ գրեթե չկան։ Այս խնդիրները՝ ինչպես են հաղթահարել վկայագիր ստացած մյուս 13 ընտանիքները, համագյուղացիների պատմելով՝ մի մասը վաճառքում եղած տուն գտել է գյուղում, մյուսներն էլ այլ բնակավայրերում են տներ գնել։ Իսկ իրենք չեն պատրաստվում գյուղից գնալ, որտեղ տնտեսություն են ստեղծել:

«Մենք մեր տնտեսությունները, որ թողնենք գնանք, քաղաք ապրենք, բա ով պիտի տիրություն անի, գյուղացիները բոլորը եթե գնան քաղաք ապրին, ըբը քաղցին ինչղ պիտի ապրի»,- ասել է ջաջուռցի 80 տարեկան, կինն ով նույնպես հրաժարվում է ԲԳՎ-ից:

Ջաջուռցիների բողոքը միայն տրամադրած  վկայագրի ու շուկայական գներից  չէ։Բնակարանների գնման վկայագիր ծրագրի սահմանած չափորոշիչները նույն են ինչպես Գյումրիում, այնպես էլ գյուղերում:  Բնակարան գնելուց հետո շահառուն պարտավորվում է ապամոնտաժել ժամանակավոր կացարանը՝ օժանդակ կառույցներով։ Այս պայմանին  ջաջուռցիները  չեն համաձայնում։ Ծրագրից օգտվող շահառուներին  նախապես ներկայացվել են  վկայագիր ծրագրի պահանջները, որոնց հետ համաձայն լինելու  գրավոր ապացույցը կնքված պայմանագրերն են:

Գյուղական անօթևանության հարցի լուծման երկու տարբերակն էլ գյուղում քննարկվել է, բնակարանաշինությանը կողմ չեն եղել։ Ըստ բողոքավորների՝ այդ ժամանակ իրենց հաշվարկներում սխալվել են և մտածել  են, որ Ջաջուռում էժան գնով տներ գտնելն ավելի հեշտ կլինի, քան կառուցելը: Ջաջուռցիների ներկայացրած պատճառաբանությունները լսել էր մարզպետը, ընտանիքները ժամանակ են խնդրել՝ դարձյալ քննարկելու ու կողմորոշվելու համար:

ԲԳՎ ծրագրի իրացման  ժամկետը 6 ամիս է, շահառուները մեկ ամիս ունեն հստակեցենլու անելիքները, մինչ ժամկետի ավարտը վկայագիր վերադարձնելու իրավունքն ուժի մեջ է։ Նման դեպքերում այդ ընտանիքները կմնան հերթացուցակում, բայց անորոշ ժամկետով, մինչև նոր ծրագրի մեկնարկ։