Գյումրիի Խրիմյան Հայրիկ 48 շենքի ամրացման հարցը չի լուծվում չիրականացվող փողոցաշինության պատճառով

Գյումրիի խիստ վթարային շենքերի ամրացման հարցը չի լուծվում արդեն 30 տարուց ավելի: Կառավարությունը 4 վթարայինների համար է ծրագիր կազմել, որը դեռ գործնական փուլ չի մտել: Այդ 4 շենքերի ցանկում չէ Խրիմյան Հայրիկ 48-ը: Այս շենքի համար մեկ այլ ծրագիր կա, որը մշակվել է դեռևս խորհրդային տարիներին ու մինչ օրս կյանքի չի կոչվում:

Շիրակացի և Խրիմյան Հայրիկ փողոցները կապող ճանապարհ պետք է կառուցվի, որն անցնելու է նախկին տեքստիլ կոմբինատի տարածքով: Ճանապարհի շինարարությանը վթարային շենքը խանգարում է, ու այն պետք է ապամոնտաժվի: Բայց արդեն 30 տարուց ավելի փողոցը չի կառուցվում, բնակիչների բնակարանային հարցն էլ չի լուծվում: Ըստ այդմ՝ բնակիչները շենքի տեխնիկական վիճակի նոր ուսումնասիրության համար են դիմել, մասնագետներն ուսումնասիրել են ու եկել այն եզրակացության, որ շենքը մասնակիորեն ամրացման ենթակա է:

Խրիմյան Հայրիիկ 48 հասցեի 5 հարկանի շենքը 88-ից առաջ կառուցված առաջին կոոպերատիվներից է: Բնակիչներն իրենք են ֆինանսավորել իրենց բնակարանների կառուցումը: Երկրաշարժի հետևանքով այն վթարային է դարձել, ու բնակիչները հարևանությամբ տեղադրված տնակներում են ապրել: Ամբողջ շենքում 20 ընտանիք է ապրել: Նրանց անօթևանության հերթացուցակում հաշվառել են, քանի որ շենքը ապամոնտաժելու որոշում կար: Վթարայինը դեռ իր տեղում է, իսկ 20 ընտանիքներից ոչ բոլորն են փոխհատուցում ստացել:

«Շենքի 12 բնակիչներ փոխհատուցում չեն ստացել: Չեն դիմել, չեն հետաքրքրվել, մնացել են օդի մեջ: Հիմա, եթե փողոցը կառուցվելու է, թող մեզ ապահովեն բնակարաններով կամ էլ շենքն ամրացնեն»,- SHANTNEWS-ի հետ զրույցում նշել են Խրիմյան Հայրիկ 48 շենքի բնակիչները:

Կոոպերատիվ շենքում բնակմակերեսն ավելի մեծ է եղել, քան այն հատուցումը, որ կառավարությունն է առաջարկել: Սա փոխհատուցումից հրաժարվելու հիմնական պատճառն է եղել:

Խրիմյան Հայրիկ 48 շենքը ապամոնտաժելու որոշումը բխել է քաղաքի գլխավոր հատակագծից,  համաձայն որի՝ այս տարածքը տրանսպորտային հանգույց է լինելու: Նախկին Տեսքտիլ կոմբինատի տարածքով դեպի Խրիմյան Հայրիկ փողոցին միացող ճանապարհ է կառուցվելու: Դրա համար էլ շենքը 2000-ականների սկզբին ամրացման ծրագրերից դուրս է մնացել: Այս տարիների ընթացքում ո՛չ փողոցն է կառուցվել, ո՛չ էլ շենքի ու բնակիչների հարցն է լուծվել:

«Գլխավոր հատակագիծը ռազմավարական ծրագիր է: Դա չի նշանակում, որ ամեն ինչ մեկ օրվա պետք է անել: Փողոցի հարցը դրված է , որպես դրույթ, քաղաքի տրանսպորտային հարցերից մեկը: Եթե այսօր չենք կարողանում այդ փողոցը կառուցել ՝ ելնելով ֆինանսական միջոցների բացակայությունից կամ ստեղծված քաղաքաշինական իրավիճակից, դա չի նշանակում,թե այդ փողոցի անհրաժեշտությունը չկա»,- SHANTNEWS․am-ին ասել է Գյումրիի գլխավոր ճարտարապետ Հենրիկ Գասպարյանը:

Թղթի վրա գրված փողոցաշինությունը, փաստացի, բնակիչներին ու շենքի ճակատագիրը անորոշության մեջ է պահում: Բազմաթիվ դիմում-բողոքներ են գրել այս ընթացքում:

Դրանցից մեկին քաղաքապետարանը պատասխանել է, որ շենքը ենթակա է ապամոնտաժման, մյուսին ի պատասխան` նշել է, որ առայժմ հստակ չէ, թե երբ է փողոց կառուցվելու, ըստ այդմ` շենքը չի խանգարում փողոցաշինությանը:

Եվս մեկ ու ամենաթարմ փաստաթուղթը՝ Շիրակի մարզպետի գրությունն է քաղաքապետարանին, որով առաջարկել է շենքի տեխնիկական վիճակի ուսումնասիրություն կատարել և ապամոնտաժման հարցը հանրային քննարկման ներկայացնել:

«Հանրային քննարկման մասին չեմ կարող որևէ բան ասել: Բայց սա ավելի շատ մասնագիտական խնդիր է, քան հանրության քննարկելու խնդիր: Կոնկրետ մասնագիտական եզրակացությունների հիման վրա պետք է որոշում կայացվի: Տնտեսական տեսանկյունից պետք է նայել՝ արդյոք արժե ծախս անել և երրորդ աստիճանի վնասվածություն ունեցող շենքը վերականգնել, թե լավ է այլ տեղ նոր շենք կառուցել»,- ասել է Հենրիկ Գասպարյանը:

Նաև մասնագիտական ուսումնասիրության նոր եզրակացություն կա: Օգոստոս ամսին են ԱԻՆ սեյսմիկ պաշտպանության տարածքային ծառայության մասնագետները շենքի տեխնիկական վիճակի գնահատական տվել: Համաձայն եզրակացության՝ վերևի երկու հարկերը ենթակա են ապամոնտաժման, իսկ առաջինից երրորդ հարկերը՝ ամրացման:

Ու նորից ժամկետներն անորոշ են, թե երբ ու ինչպիսի լուծում է առաջարկվելու շենքին ու տարիներով ծրագրված փողոցաշինությանը: Նախկին Տեքստիլ կոմբինատի տարածքում, որտեղով անցնելու է փողոցը, հողակտորներն օտարված են: Սա էլ առանձին պատմություն է, որին քաղաքապետարանն ու Քաղաքաշինության կոմիտեն պետք է լուծում գտնեն: