Ադրբեջանի կողմից կռվող սիրիացի վարձկանների մասին հերթական հոդվածը հայտնվել է The Guardian-ում

Ադրբեջանի կողմից սիրիացի վարձկանների կռվելու մասին հերթական հոդվածն է հրապարակել The Guardian պարբերականը` հետևյալ վերնագրով՝ «Լեռնային Ղարաբաղ. առնվազն 3 սիրիացի զինյալ է մահացել»։

Պարբերականը հայտնում է, որ Լեռնային Ղարաբաղի «վիճելի» տարածքում առնվազն 3 սիրիացի ընդդիմադիր զինյալ է մահացել, ինչը հաստատում է այն տեղեկությունները, որ Հայաստանի և Ադրբեջանի միջև բախումներում օտարերկրյա ուժեր են ներքաշված։ Սա, ըստ պարբերականի, ավելացնում է այն մտահոգությունները, որ կողմերի միջև բախումները կվերաճեն ավելի լայն տարածաշրջանային հակամարտության։

Պարբերականը նշում է, որ սիրիացիների, ամենայն հավանականությամբ, թուրքական անվտանգության ընկերությունների համար աշխատող վարձկանների ներկայությունը մարտի դաշտում ազդարարում է նոր ճակատ Անկարայի` ավելի ու ավելի պարտադրող արտաքին քաղաքականության համար:

Վերլուծաբանները նշում են, որ Թուրքիայի միջամտությունը հակամարտությանը, որն այլ երկրներn ավանդաբար փորձել են զսպել, վտանգավոր նոր գործոն է, որը սպառնում է ընթացող մարտերն ավելի երկար և արյունալի դարձնել: Դա նաև վտանգ է ներկայացնում այն առումով, որ կարող է հակամարտությունում ներառել տարածաշրջանի այլ դերակատարների՝ բացելով երրորդ թատերաբեմ Թուրքիայի և Ռուսաստանի միջև հակասություններում, որոնք դրսևորվել են Սիրիայում և Լիբիայում հակամարտությունների հակառակ կողմերին աջակցությամբ, ինչպես նաև ահազանգեր բարձրացնելով հարևան Իրանում։

The Guardian-ը հիշեցնում է, որ Թուրքիան հայտարարել է իր լիակատար աջակցությունը Ադրբեջանին, մինչդեռ Ռուսաստանը ռազմական դաշինք ունի Հայաստանի հետ, սակայն կապեր ունի և զենք է վաճառում երկու կողմերին էլ:

Թուրքիան և Ադրբեջանը հերքում են այն լուրերը, որ սիրիացիները ներգրավված են Լեռնային Ղարաբաղի մարտերում։ Նրանք Հայաստանին մեղադրել են քուրդ զինյալների հավաքագրելու մեջ, սակայն ապացույցներ չեն ներկայացրել։

The Guardian-ը նշում է, որ Սիրիայի Իդլիբի նահանգից մի քանի զինյալներ պատմել են այն մասին, որ զինվորական հրամանատարները և միջնորդներն իրենց առաջարկել են մեկնել Ադրբեջան՝ դիտակետերը և նավթի և գազի օբյեկտները պահպանելու։ Պայմանագիրը կնքվել է 3-6 ամսով, ամսական 700-1000 դոլար վարձատրության դիմաց, ինչը համեմատաբար մեծ գումար է Սիրիայի համար։

Աթարիբ քաղաքից մահացած զինյալ Մուհամեդ Շալանի զարմիկը՝ Օմար Աբդոն, ասել է, որ նրա զորամասից մի քանիսը կապվել են իրենց հետ և հայտնել Շալանի մահվան մասին:

«Սեպտեմբերի 20-ին նա մեզ ասաց, որ մեկնում է Ադրբեջան: Մենք չգիտենք նրա մահվան հանգամանքները։ Մեզ ասացին, որ այս պահին դժվար է նրա դիակը բերել, բայց նրանք կփորձեն», – հայտնել է մահացածի զարմիկը:

Աին Ջարա գյուղից Հուսեին Թալհայի և Ալ Քարիմից Սադամ Ազիզ Ազկորի ընտանիքները նույնպես ասում են, որ երեքշաբթի օրն իրենց զանգահարել են ստորաբաժանման հրամանատարները և հայտնել են իրենց հարազատների մահվան մասին։ Տեղական լրատվամիջոցները հայտնում են ևս երեք սպանվածի մասին:

Պարբերականը հայտնում է, որ չնայած դիտորդները կասկածի տակ են առնում, թե ինչու պետք է Բաքվի լավ պատրաստված և լավ զինված ռազմական ուժերը սիրիացի վարձկանների օգնության կարիքն ունենային, սակայն սիրիացիների արագ հավաքագրումը դեպի առաջնագիծ, ինչպես նաև այն փաստը, որ սիրիացի կամավորներն ասում են, որ հավաքագրումը սկսվել է մեկ ամիս առաջ, ցույց են տալիս, որ Ադրբեջանը որոշ ժամանակ պլանավորել է իր ռազմական արշավը:

Ըստ Carnegie Europe-ի ավագ գիտաշխատող Թոմաս դե Վաալի՝ մարտերն ամենադաժանն են տարածաշրջանում1994թ.-ի պատերազմից ի վեր, «սակայն սա դեռ լայնամասշտաբ ռազմական հարձակման չի նմանվում»։

«Մինչև այժմ ռազմական գործողություններն ընթանում են երկու կամ երեք ճակատներում: Դրանք փոքր երկրներ են և չեն ցանկանում մարդկային կորուստներ ունենալ, ինչն էլ, հավանաբար, բացատրում է սիրիացիների ներգրավումը։ Ադրբեջանը չի ցանկանում զոհաբերել երիտասարդ ադրբեջանցիների կյանքեր», – ասել է վերլուծաբանը:

Թոմաս դե Վաալը նշել է, որ այլ տերություններ, ինչպիսիք են Ռուսաստանը և Իրանը, չեն ցանկանա բացահայտորեն իրենց ուժը նետել Հայաստան։

«Ռուսաստանի ձեռքերը կապված են, քանի որ այն երկու կողմերի հետ էլ հարաբերություններ ունի։ Ռուսաստանն ու Իրանը կարող են միայն փորձել հրադադարի հասնել: Նրանցից ոչ մեկը չի ցանկանում հակամարտությանը խառնվել մարտի դաշտում», – ասել է Վաալը։

The Guardian-ը հավելում է, որ սիրիացիների ներգրավմամբ Թուրքիան, գուցե, փորձում է կրկնել այն ռազմավարությունը, որն այս տարվա սկզբին լավ գործեց Լիբիայում: Անկարայի հովանավորությամբ հյուսիսաֆրիկյան պետության ռազմաճակատներ էր մեկնել առնվազն 10 հազար սիրիացի, որոնք օգնեցին պատերազմի ընթացքը փոխել՝ ի օգուտ ՄԱԿ-ի աջակցությամբ գործող կառավարության, որը կռվում էր գեներալ Խալիֆա Հաֆթարի դեմ:

Ավելի վաղ Ադրբեջանի կողմից ռազմաճակատում կռվող սիրիացի վարձկանների մասին հոդվածներ էին հրապարակել նաև BBC-ն և Reuters-ը։