Ինչպիսի՞ն կլինեն 7-րդ նախագահական ընտրությունները

Հայաստանում պատրաստվում են հերթական՝ 7-րդ  նախագահական  ընտրություններին:  Հերթականը, սակայն, չի լինի այնպիսին, ինչպիսին անցած 6 ընտրություններն էին: Նախ հիշենք, թե երբ  են եղել դրանք.  1991, 1996, 1998, 2003, 2008, 2013 թվականներին: Առաջին երկուսում հաղթել է Լևոն Տեր-Պետրոսյանը, 3-րդ և 4-րդում՝ Ռոբերտ Քոչարյանը, 5-րդ և 6-րդ ընտրություններում՝ գործող նախագահ Սերժ Սարգսյանը: Ստացվում է՝ յուրաքանչյուրը երկու անգամ:  3 նախագահ, 6 ընտրություն: 

Իսկ 7-րդ ընտրություններում ընտրվելու է երկրի չորրորդ նախագահը, քանի որ Սերժ Սարգսյանը չի կարող առաջադրվել երրորդ ժամկետով։ Գործող նախագահի լիազորությունները կավարտվեն ապրիլի 9-ին:  Իսկ  7-րդ ընտրությունները նախատեսվում են  անցկացնել մարտի 1-10-ն ընկած հատվածում։ Առավել հավանական օր նշվում է մարտի 2-ը: Այն սովորական աշխատանքային օր է՝ ուրբաթ:

                                          Միայն մեկ անգամ, բայց 7 տարով 

Առաջին անգամ Հայաստանի Հանրապետության Նախագահը կընտրվի ոչ թե Հայաստանի քաղաքացիների կողմից՝ ուղղակի ընտրությամբ, այլ ՀՀ Ազգային ժողովի կողմից։ Այդպիսով Հայաստանն անցում է կատարում խորհրդարանական կառավարման: Սահմանադրական փոփոխությունները  ընդունվեցին հանրաքվեով՝ 2015 թվականի դեկտեմբերի 6-ին: Սահմանադրության փոփոխությունների համաձայն՝ հանրապետության նախագահ կարող է ընտրվել քառասուն տարին լրացած, վերջին վեց տարում միայն Հայաստանի Հանրապետության քաղաքացի հանդիսացող, վերջին վեց տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր քաղաքացի։  Նույն անձը հանրապետության նախագահ կարող է ընտրվել միայն մեկ անգամ և 7 տարով: 

                                     ԻՆՉՊԻՍԻ՞Ն ՊԵՏՔ է ԼԻՆԻ ՆԱԽԱԳԱՀԸ ԸՍՏ ԳՈՐԾՈՂ ՆԱԽԱԳԱՀԻ  

Երկրի գործող ղեկավարը թվարկել է այն հատկանիշները, որոնցով պետք է օժտված լինի նոր նախագահը. նա պետք է լինի հեղինակավոր մարդ, ունենա  ճանաչում նաև արտերկրում, կարողանա ըստ արժանվույն ներկայացնել մեր երկիրը: Ապագա նախագահը, Սերժ Սարգսյանի բնութագրմամբ, պետք է տիրապետի օտար լեզուների, ունենա լայն կապեր և՛ Հայաստանում և՛ սփյուռքում: Նախագահի  այս անդրադարձից հետո սկսեցին համապատասխան չափորոշիչներով թեկնածուների ցուցակներ, որոնցում հիմնականում մշակութային, հասարակական գործիչներ են և հայտնի մարզիկներ: Շրջանառվում են նաև շատ կոնկրետ թեկնածուների անուններ, ավելի ճիշտ՝ անուն: Ամեն ինչ պարզ կլինի շատ շուտով: Իսկ մինչ այդ հիշեցնենք, թե ինչպես է կայանալու ընտրությունը:

                                                                   ԱՌԱՋԻՆ ՓՈՒԼ 

Հանրապետության նախագահի թեկնածու առաջադրելու իրավունք ունի պատգամավորների ընդհանուր թվի առնվազն մեկ քառորդը։ Առաջին փուլում հանրապետության նախագահ է ընտրվում այն թեկնածուն, ով ստացել է պատգամավորների ընդհանուր թվի ձայների առնվազն երեք քառորդը։  Հաշվարկների  համար հիշենք պատգամավորների թիվն ըստ խմբակցությունների.

ՀՀԿ՝ 58 

«Ծառուկյան» խմբակցություն՝ 31

«Ելք»՝  9

 ՀՅԴ՝  7 

Առնվազն երեք քառորդ նշանակում է 79  պատգամավոր: Կոալիցիա կազմած ՀՀԿ-ն ու ՀՅԴ-ն միասին կազմում են 65 պատգամավոր: Ընտրությունները առաջին փուլով ավարտելու համար պետք է ևս 14 ձայն:   

                       պատգամավորների 3/4=(105 * 3)/4=79 պատգամավոր   

                        ՀՀԿ+ՀՅԴ=65 պատգամավոր 

                       անհրաժեշտ է ևս (79-65)=14 պատգամավոր

Այս տարբերականը քիչ հավանական չէ՝ հաշվի առնելով նաև «Ծառուկյան» խմբակցության» ղեկավարի վերջին հարցազրույցում արված շեշտադրումները: Այնուամենայնիվ, եթե դա տեղի չունենա կլինի երկրորդ փուլ:   

                                                                     ԵՐԿՐՈՐԴ ՓՈՒԼ 

Երկրորդ փուլին կարող են մասնակցել առաջին փուլի բոլոր թեկնածուները։ Երկրորդ փուլում կհաղթի նա, ով ստացել է պատգամավորների ընդհանուր թվի ձայների առնվազն երեք հինգերորդը։ Խորհրդարանի 3/5-ը 63 պատգամավոր է: Այս դեպքում ՀՀԿ-ի եվ ՀՅԴ-ի ձայները միասին վերցված բավարար կլինեն, դեռ մի բան էլ շատ: 

                      պատգամավորների 3/5 = (105*3)/5=63 պատգամավոր     

                         ՀՀԿ+ՀՅԴ=65 պատգամավոր

                                                                              ԵՐՐՈՐԴ  ՓՈՒԼ   

Կա նաև գործնականում գրեթե զրոյական հավանականությամբ երրորդ փուլ, որին կարող են մասնակցել երկրորդ փուլում առավել ձայներ ստացած երկու թեկնածուները։ Այս փուլում հաղթում է նա, ով ստանում է պատգամավորների ընդհանուր թվի ձայների մեծամասնությունը, այսինքն առնվազն 53 ձայն։ Այս դեպքում հաղթելու համար հարապետականը անգամ կոալիցիոն գործընկերոջ կարիքը չի ունենա: 

                                                                             (ՀՀԿ) 58>53  

Բայց սա էլ դեռ ամբողջը չէ:

                                                                      ՎԵՐՋԻՆ ՏԱՐԲԵՐԱԿ   

2018 թ. ընտրությունների համար արված է վերապահում՝ հանրապետության նախագահի ընտրության երրորդ փուլում նախագահ է ընտրվում առավել ձայներ ստացած թեկնածուն։ Սա էլ նշանակում է, որ խորհրդարանական մեծամասնություն կազմող ուժը կարող է հաղթել անգամ ոչ լրիվ կազմով քվեարկությանը մասնակցելով: