ԵԱՏՄ-ում ապագայում կստեղծվի միասնական ֆինանսական շուկա. Պուտին

Ռուսաստանի Դաշնության նախագահ Վլադիմիր Պուտինի՝ ԵԱՏՄ անդամ պետությունների ղեկավարներին ուղղված ուղերձում, որը հրապարակվել է 2018թ. հունվարի 1-ից Բարձրագույն Եվրասիական տնտեսական խորհրդում, Եվրասիական միջկառավարական խորհրդում և Եվրասիական տնտեսական հանձնաժողովի խորհրդում Ռուսաստանի նախագահությունը ստանձնելու կապակցությամբ, ասվում է, որ Ռուսաստանը հանդես է գալիս Եվրասիական տնտեսական միությունում միասնական տնտեսական տիրույթի ձևավորման ճանապարհին առկա խոչընդոտների վերացման օգտին: Այս մասին հայտնում է TASS-ը:

«Կարևոր է շարունակել գործընկերների հետ միասին վերացնել առկա արգելքները, սահմանափակումները, որոնք խոչընդոտում են միասնական տնտեսական տիրույթի ձևավորմանը:

Պետք է ակտիվացնել ջանքերն ապրանքների և ծառայությունների միասնական շուկաների ստեղծման ուղղությամբ, պայմաններ ապահովել կապիտալի և աշխատուժի ազատ տեղաշարժի համար»,- ասվում է Պուտինի ուղերձում:

ՌԴ նախագահը կոչ է արել ձգտել համաձայնեցված քաղաքականություն վարել արդյունաբերական և գյուղատնտեսական ոլորտներում, զարգացնել տեխնոլոգիական և արտադրական կոոպերացիաները, իրականացնել խոշոր նախագծեր՝ արդիականացնելու տրանսպորտային ենթակառուցվածքները, կառուցել արդյունավետ լոգիստիկ շղթաներ ու բարձրացնել Միության տարանցման պոտենցիալը:

«Կարևոր է շարունակել Եվրասիական տնտեսական միության անդամ երկրների ֆինանսաարժութային և դրամավարկային քաղաքականության սերտացման քաղաքականությունը և հեռանկարում ստեղծել միասնական ֆինանսական շուկա»,- ասել է Պուտինը՝ կոչ անելով առանձնահատուկ ուշադրություն հրավիրել «բանկային ոլորտում վստահության մակարդակի բարձրացման» վրա:

Ռուսաստանի նախագահը կարևորել է ԵԱՏՄ անդամ երկրների ստանձնած պարտավորությունների «համընդգրկուն և անխոս» կատարումը, անգամ եթե դա «ենթադրում է ազգային օրենսդրությունների փոփոխություն»:

Նրա խոսքով՝  միայն նորմատիվային-իրավական բազայի միասնականացմամբ է հնարավոր հասնել նրան, որ «միասնական շուկաները ճիշտ և արդյունավետ գործեն, երաշխավորվի ապրանքների, ծառայությունների և աշխատուժի տեղաշարժման ազատությունը»:

«Ռուսաստանը հանդես է գալիս Միության անդրազգային պոտենցիալի ամրապնդման, մասնավորապես, այդ համատեքստում՝ Եվրասիական տնտեսական հանձնաժողովի լիազորությունների ընդլայման օգտին: Չէ՞ որ դրանով մենք խթանում ենք Միության երկրների տնտեսությունների հետագա մերձեցումը և առավելագույնս գործի ենք դնում նրանց հնարավորությունները ընդհանուր ինտեգրացիոն խնդիրների լուծման համար»,- արձանագրել է ՌԴ նախագահը:

Պուտինը կարծում է, որ գոյության 3 տարում ԵԱՏՄ-ն ապացուցել է իր արդյունավետությունը՝ ավելանում են ներքին առևտրաշրջանառության և առևտրի ցուցանիշները, լավանում է արտահանման կառուցվածքը, ստեղծվում են նոր համատեղ ձեռնարկություններ, գործարկվում են հեռանկարային ներդրումային նախագծեր, ավելանում են Միության տարածքում արտադրվող ապրանքատեսակները, ինչը «սպառողներին հնարավորություն է ընձեռում ավելի որակյալ և էժան ապրանքներ և ծառայություններ ձեռք բերել»:

«Վստահ եմ, որ մենք կարող ենք ոչ միայն պահպանել աճի ներկայիս տեմպերը, այլև ապահովել Եվրասիական տնտեսական միության հետագա զարգացումը»,- հայտարարել է Պուտինը՝ նշելով, որ դրա համար անհրաժեշտ է իրականացնել հավակնոտ ինտեգրացիոն խնդիրներ, յուրացնել նոր ուղղություններ և համագործակցության ոլորտներ: