Շիրակի մարզպետարանը ճշտում է մարզում մշտական բնակություն հաստատելու ցանկություն ունեցող արցախցիների թիվը

Շիրակի մարզպետարանը հաշվառում է սկսել՝ հասկանալու համար, թե արցախցիներից ովքեր են մտադիր Գյումրիում և Շիրակի մարզում մշտական բնակություն հաստատել, ինչպես են լուծվելու նրանց բնակարանային ու զբաղվածության հարցերը: Արցախ վերադարձող, նորից Հայաստան տեղափոխվող և մարզից մարզ բնակություն հաստատողների թիվն անընդհատ փոփոխվում է:

Սեպտեմբերի 27-ից մինչ օրս Շիրակի մարզ է տեղափոխվել 2500 արցախցի, նրանցից մոտ 1000-ն է վերադարձել:

Շիրակի տարածքային մանկավարժահոգեբանական կենտրոնի՝ նախկին թիվ 3 հատուկ-օժանդակ դպրոցի կահավորված ննջասենյակները, խոհանոցը, հանգստի սենյակները 4 ամիս է օգտագործվում են  Արցախից Գյումրի տեղափոխված բազմաթիվ ընտանիքների կարիքներն ապահովելու  համար:

«Հիմա մեր առջև խնդիր է դրված`դարձյալ հասկանալ այդ մարդկանց տրամադրվածությունը, հնարավորությունները: Արդյո՞ք ունեն հնարավորություն ինչ-որ բան ինքնուրույն անելու, եթե չունեն՝ մենք ինչ միջոցներով և ինչպես կարող ենք նրանց աջակցել: Հիմա կապ ենք հաստատում այն ընտանիքների հետ, որոնք այս պահին բնակվում են Շիրակի մարզում՝ հասկանալու համար՝ նրանք հիմնավորապես որոշե՞լ են ապրել Գյումրիում, Շիրակի մարզում, թե՞ որոշել են գնալ այլ բնակավայրեր»,- Shantnews․am-ի հետ զրույցում  ասել է Շիրակի մարզպետարանի  ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը:

Կենտրոնում ապաստանած ընտանիքների մեծ մասը ժամանակավոր Արցախ է վերադարձել, հաշվառում են անցնելու, աջակցության ծրագրերով իրենց հասանելիքն են ստանալու ու նորից Գյումրի են վերադառնալու, Արցախում ապրելու տեղ չունեն:

Շիրակի մարզ տեղափոխված արցախցիների մի խումբ էլ մարզի նախկին բնակիչներն են, որոնք 90-ականներին վերաբնակվել  են Արցախի տարբեր բնակավայրերում, հիմա իրենց ծննդավայր են վերադարձել, բայց այստեղ արդեն տուն չունեն, կամ դրանք բնակության համար պիտանի չեն:

Եվս մեկ հաշվառում  Արցախից Շիրակի մարզ տեղափոխված դպրոցահասակ երեխաներին է վերաբերում: Ծնողների տեղից տեղ տեղափոխվելու հետևանքով կան երեխաներ, որոնք հանրակրթությունից դուրս են մնացել:

«Դպրոցահասակ երեխաների և դպրոց ընդգրկված երեխաների թիվը չի համապատասխանում, այսինքն՝ մենք ունենք անելիք: Կան ընտանիքներ, որտեղ երեխաները դեռևս ընդգրկված չեն հանրակրթության մեջ, կամ ընդգրկվել են հանրակրթություն, բայց 1-2 շաբաթ դպրոց գնալուց հետո ծնողները պատճառաբանել են, որ տեղափոխվում են այլ մարզ և դուրս են եկել հանրակրթությունից»,- նշել է  Լիլիթ Գորգինյանը:

Այլ մարզերից Շիրակ, այստեղից Արցախ տեղափոխվողների թիվն անընդհատ փոփոխվում է: Տոնական օրերին իրենց բնակավայրեր վերադարձել են հիմնականում իրենց տրանսպորտային միջոցներով: Շիրակի մարզպետարանը դեպի Արցախ վերջին ուղևորափոխադրումը Ամանորից առաջ է կատարել:

Այժմ վերադառնալու ցանկություն հայտնողների թիվը բավարար չէ՝ անգամ մեկ միկրոավտոբուս Արցախ ուղևորելու համար: