Ջերմոցային գազերի պարունակությունը Երկրագնդի մթնոլորտում 2003 թվականից ի վեր հասել է առավելագույնին

Երկրագնդի մթնոլորտում այնպիսի գազերի ծավալն, ինչպիսիք են մեթանը (CH4) և ածխաթթվական գազը(CO2), 2021 թվականին ռեկորդային մեծությունների է հասել 2003 թվականից ի վեր և շարունակում է ավելանալ: Ապրիլի 22-ին այդ մասին ասված է Copernicus արբանյակային դիտազննման ծրագրի հաշվետվությունում, տեղեկացնում է «Արմենպրես»-ը:

«Մթնոլորտում այնպիսի ջերմոցային գազերի պարունակությունը, ինչպիսիք են ածխաթթվական գազը և մեթանը, երկար ժամանակ շարունակել է աճել և 2003 թվականից ի վեր հասել է առավելագույնին, երբ սկսվել են արբանյակային դիտարկումները»,- ասված է փաստաթղթի մեջ:

Մասնագետների գնահատումներով՝ ածխաթթվական գազի պարունակությունը 2010 թվականից ի վեր ավելացել է 0,6 տոկոսով, իսկ մեթանինը՝ գրեթե 0,4 տոկոսով: Հաշվետվության հեղինակները նաև նշում են, որ 2020 թվականին դիտվել է ածխաթթվական գազի արտանետումների նվազում նոր տիպի կորոնավիրուսի համավարակի ժամանակ տնտեսական ակտիվության նվազման պատճառով: Հետազոտողները նշում են, որ մարդու գործունեությունը հանգեցրել է կլիմայի ավելի արագ փոփոխմանը մթնոլորտ ջերմոցային գազերի արտանետման պատճառով, որոնք արտադրվում են, այլ բաների թվում, էներգիայի ստացման համար հանածո վառելիքի այրման, անտառների հատման, գյուղատնտեսության մեջ պարարտանյութերի օգտագործման ժամանակ, անասնապահության մեջ: 2020 թվականը դարձել է երեք ամենաշոգ տարիներից մեկը դիտարկումների պատմության ընթացքում: Այսպես, օրինակ՝ ձմեռը Եվրոպայում եղել է Ցելսիուսի 3,4 աստիճանով ավելի տաք, քան միջին հաշվով 1981-ից մինչև 2010 թվականն ընկած ժամանակամիջոցում: Սիբիրում ձմեռը 6 աստիճանով տաք է եղել տարեկան միջին նորմայից, ինչը, գիտնականների կարծիքով՝ 2020 թվականի խոշորագույն ջերմաստիճանային անոմալիան է: Այժմ, ինչպես երբեք, կարևոր է օգտագործել առկա տեղեկատվությունը և գործել՝ կլիմայի փոփոխման հետևանքների մեղմացման համար և գործադրելու ավելի շատ ջանքեր՝ ապագա ռիսկերը նվազեցնելու համար»,- կարծում է Copernicus արբանյակային դիտազննման ծրագրին կից կլիմայի փոփոխման ծառայության տնօրեն Կառլո Բուոնտեմպոն:

Ապրիլի 22-ին՝ Երկիր մոլորակի միջազգային օրը, Վաշինգտոնում աշխատանքն է սկսում կլիմայի միջազգային գագաթնաժողովը, որը կազմակերպել է Միացյալ Նահանգները: Խորհրդաժողովում, որը տեղի կունենա երկու օր, պլանավորված է աշխարհի 40 ղեկավարների մասնակցությունը: Հանդիպման գլխավոր թեմաներից մեկը կդառնա խոշորագույն երկրների ջանքերի համախմբումը շրջակա միջավայր վնասակար արտանետումների կրճատման ուղղությամբ՝ մինչինդուստրիալ դարաշրջանի համեմատությամբ գլոբալ տաքացումը Ցելսիուսի 1,5 աստիճանի սահմաններում պահելու և այդ կերպ Փարիզի կլիմայի համաձայնագրի հանգուցային կետը կատարելու համար, համաձայնագիր, որին վերադառնալու մասին հայտարարել է Ջո Բայդենն ԱՄՆ-ի նախագահի պաշտոնն ստանձնելու օրը, հաղորդել է ՏԱՍՍ-ը: