Աժ-ում այսօր ևս շարունակվել են ԸՕ-ում փոփոխություններ կատարելու մասին քննարկումները

Աժ-ում այսօր ևս շարունակվել են Ընտրական օրենսգրքում փոփոխություններ կատարելու մասին քննարկումները: «Բարգավաճ Հայաստան» կուսակցության պատգամավոր Սերգեյ Բագրատյանը ներկայացրեց կուսակցության առաջարկած մոդելը, որը նախատեսում է վերացնել բաց ցուցակները և ընտրական գործընթացը կազմակերպել փակ համամասնական ընտրական համակարգի միջոցով: Պատգամավորի կարծիքով՝ այսկերպ ընտրությունները չեն անձնավորվի:

Իսկ մարզերի թեկնածուներին առաջարկվեց, որ տվյալ կուսակցությունը յուրաքանչյուր մարզից մեկական թեկնածու ընտրի համապետական ընտրական ցուցակով:  Եթե տվյալ պատգամավորը մանդատից հրաժարվի, ապա  համապետական ընտրական ցուցակով հաջորդը կլինի:

«Բարգավաճ Հայաստան» կուսակցության պատգամավոր Նաիրա Զոհրաբյանն էլ իր հերթին ասաց, որ եթե մարզերից առաջադրված բոլոր պատգամավորները հրաժարվում են, ապա այդ ուժը խորհրդարանում չի լինում:

«Համապետական ընտրական ցուցակները կազմվելու են ըստ մարզերի բնակչության մեծամասնության, իսկ մարզերի ցուցակներում պատգամավորների հերթը ներքին կուսակցական ռեյտինգային սկզբունքով կկազմվի»,- նշեց Նաիրա Զոհրաբյանը:

Իր հերթին, Հանրապետական կուսակցության պատգամավոր Վիգեն Սարգսյանը թերահավատորեն վերաբերվեց այս մոդելին, քանի որ պնդում է, որ այսպիսով փոքր մարզերը մնում են ստվերում, և որպեսզի բոլոր մարզերը ներգրավված լինեն, պիտի տվյալ ուժը խորհրդարանում բացարձակ մեծամասնություն ստանա, որ փոքր մարզը հույս ունենա ներկայացված լինել գոնե 1 հոգու տեսքով:

ՀՅԴ պատգամավոր Սպարտակ Սեյրանյանը պնդեց, որ այս դեպքում չափորոշիչը չպիտի լինի միայն բնակչության թիվը, քվոտավորման չափանիշները պետք է լավ քննարկվեն, որ քաղաքական ուժերին արհեստական պարտադրանքի մեջ չմտցնեն:

ՀՅԴ խմբակցության ղեկավար Արմեն Ռուստամյանի խոսքերով՝ բաց ցանկերի ձևը փորձված է, փակը՝ արհեստական: Պատգամավորի խոսքերով՝ բաց ցանկերի դեպքում ժողովուրդն է որոշել մարզերից կամ Երևանից ով ու ինչ քանակով ներգրավված կլինի, իսկ փակի դեպքում պատգամավորներն են որոշելու, թե ինչպես ներկայանան մարզերը:

«Բարգավաճ Հայաստան» կուսակցության անդամների ասած տվյալների համաձայն՝ նախորդ ընտրություններին օգնել են տեսողության խնդիր ունեցող 79500 մարդու, մինչդեռ 15000-ը դրա կարիքը ուներ, պատգամավորները որոշեցին այս հարցը հետագայում ավելի մանրամասն քննարկել և փաստական տվյալներով խոսել:

«Բարգավաճ Հայաստան»-ի կողմից  առաջարկվեց նաև զիվորական քվեարկության ժամանակ արգելել վերադաս սպայի ներկայությունը, քանի որ դա զինվորի վրա հոգեբանորեն ազդում է:

ՀՀԿ պատգամավոր Վիգեն Սարգսյանը այս առաջարկը անվանեց «կյանքի հետ աղերս չունեցող», քանի որ վստահ է, որ սպան քվեախցիկի մոտ չի հետևում զինվորի քվեարկությանը, պատգամավորը վստահ է, որ այս առաջարկը բարդացնում է գործընթացը:

Այս ամենին ի պատասխան՝ «Բարգավաճ Հայաստան» կուսակցության անդամները սկսեցին օրինակներ բերել, թե ինչպես են վերադասները ճնշել զինվորներին նախորդ ընտրությունների ժամանակ:

Պատգամավորների կողմից որոշվեց հետագա քննարկումների ընթացքում գտնել մի ընդհանուր ձևակերպում, որի դեպքում խնդիրը  կլինի ոչ թե վերադաս սպայի, այլ ցանկացած մարդու՝ ընտրական գործընթացներին չխառնվելու մասին: Քննարկվեցին նաև ընտրությունների արդյունքների ստուգման մեխանիզմները: