Ֆրանսիայի նախագահը Արցախ կժամանի, երբ ամեն ինչ կարգավորված կլինի. հարցազրույց Արա Թորանյանի հետ

Ֆրանսիայի նախագահ Էմանուել Մակրոնը հունվարի 30-ին մասնակցել է Ֆրանսիայի հայկական կազմակերպությունների համակարգող խորհրդի կազմակերպած ամենամյա ընթրիքին:

Ինչպես տեղեկացրել ենք, Փարիզի քաղաքապետ Անն Իդալգոյի, Ֆրանսիայի խորհրդարանի պատգամավորների, այդ թվում՝ հայազգի պատգամավոր Պատրիկ Դևեջյանի, Լիոնի քաղաքապետ Ժորժ Կեպենեկյանի, Ֆրանսիայի հայկական և հրեական համայնքների ներկայացուցիչների ու Թուրքիայի Մեջլիսի պատգամավոր Կարո Փայլանի հետ Ֆրանսիայի նախագահ Մակրոնը խոսել է հայ-ֆրանսիական հարաբերությունների, իր նախընտրական խոստումների ու աշխարհաքաղաքական, տարածաշրջանային խնդիրների մասին:

SHANTNEWS-ի հետ զրույցում Ֆրանսիայի հայկական կազմակերպությունների համակարգող խորհրդի համանախագահ Արա Թորանյանը պատմեց, որ Էմանուել Մակրոնը ընթրիքի ժամանակ ելույթ ունենալիս անդրադարձել մի քանի հիմնական հարցի:

«Մեզ համար մեծ պատիվ էր, որ Մակրոնը մասնակցեց ընթրիքին և բաց զրույց ունեցավ մարդկանց հետ: Մակրոնը խոստացավ, որ ֆրանսիական պետական օրացույցում ավելացնելու է Հայոց ցեղասպանության հիշատակման օրը՝ կատարելով իր նախընտրական խոստումը»,- նշեց Արա Թորանյանը:

Թորանյանի խոսքով՝ Փարիզի հյուրանոցներից մեկում կազմակերպված միջոցառմանը մասնակցել է հայ համայնքի ավելի քան 500 ներկայացուցիչ:

«Նախագահ Մակրոնը հայտարարեց, որ արդարության և ճանաչման համար պայքարը մեր պայքարն է: Մենք տանում ենք այդ պայքարը՝ հիշելով և հանրապետության օրացույցում ցեղասպանության հիշատակման օր ավելացնելով, նա ասաց, որ օրենսդիրները այդ հարցին կանդրադառնան առաջիկա ամիսներին»,- տեղեկացրեց նա:

Արա Թորանյանը նաև նշեց, որ իրենք Էմանուել Մակրոնին կոչ են արել դատապարտել Թուրքիային՝ ազգային փոքրամասնություններին անվտանգությանը սպառնալու համար, սակայն Մակրոնն ասել է, որ ինքը Թուրքիայի նախագահ Ռեջեփ Էրդողանի հետ պարբերաբար երկխոսություն է ունենում, և այդ երկխոսությունն արդյունք է տվել:

«Մակրոնն ասաց, որ ահաբեկչության և միգրացիոն ճգնաժամի հարցերում Ֆրանսիային անհրաժեշտ են դաշնակիցներ, ներառյալ՝ այնպիսի դաշնակիցներ, որոնք չեն կիսում մեր արժեքները»,- նշեց Արա Թորանյանը՝ ավելացնելով, որ Ֆրանսիայի նախագահն առանձնահատուկ ջերմությամբ է ողջունել Կարո Փայլանին՝ շեշտելով նրա խիզախ պահվածքը Թուրքիայում:

«Մենք Ֆրանսիայի նախագահին կոչ արեցինք այցելել Արցախ, սակայն նա հրաժարվեց՝ ասելով, որ այդկերպ Ֆրանսիան կկորցնի իր չեզոքությունը: Նա ասաց, որ մեզ չի ուղեկցի Լեռնային Ղարաբաղ այցի ընթացքում, քանի որ Ֆրանսիան կկորցնի իր դերն այս հակամարտությունում և չի կարող միջնորդ և լսելի լինել երկու կողմերի համար: Թեև դա մեզ համար ցանկալի պատասխան չէր, բայց հասկանում ենք, որ Ֆրանսիան էլ իր շահերն ու ծրագրերն ունի»,- նշեց Ֆրանսիայի հայկական կազմակերպությունների համակարգող խորհրդի համանախագահը՝ ավելացնելով, որ Մակրոնն ասել է, թե հուսով է, որ մի օր Արցախ կգնա, երբ ամեն ինչ կարգավորված կլինի: