Կառավարությունը հավանություն չտվեց «Ծառուկյան» խմբակցության առաջարկած օրենքի նախագծին

Կառավարության այսօրվա նիստի ժամանակ Աշխատանքի և սոցիալական հարցերի նախարար Մանե Թանդիլյանը զեկուցեց «Ծառուկյան» խմբակցության պատգամավորների կողմից առաջարկված ՀՀ աշխատանքային օրենսգրքում լրացումներ և փոփոխություններ կատարելու մասին օրենքի նախագիծը, որում առաջարկվում է աշխատանքի էական պայմանները փոփոխելու դեպքում աշխատանքային պայմանագրի լուծման, աշխատանքային օրենսգրքի 109-րդ հոդվածի առաջին մասի 9-րդ կետով նախատեսված առանձին հիմք:

«Օրենսգրքի 109-րդ հոդվածի առաջին  մասով պայմանավորված՝ հիմքերից որևէ մեկի առկայության դեպքում, անհրաժեշտությունից ելնելով, գործատուն նախաձեռնում է աշխատողի աշխատանքի էական պայմանների փոփոխություն, այլ ոչ թե աշխատանքային պայմանագրի լուծում: Եվ այդ մասին նախապես ծանուցում է աշխատողին նոր պայմաններում աշխատելու և դրա հիման վրա աշխատանքային պայմանագրում համապատասխան փոփոխություն իրականացնելու համար: Այս պարագայում աշխատանքային պայմանագրի լուծումը պայմանավորվորում է նոր աշխատանքային  պայմանագրում աշխատողի անհամաձայնության հանգամանքով, այլ ոչ թե գործատուի նախաձեռնությամբ»,- զեկուցեց Մանե Թանդիլյանը:

Նշվածից բացի, երբ գործատուն, որևէ պատճառներից ելնելով, առաջարկում է փոխել աշխատանքի էական պայմանները, գործող օրենսդրությամբ աշխատողին առաջարկվում են գրեթե այնպիսի երաշխիքներ, ինչպիսիք նախատեսված են գործատուի նախաձեռնությամբ աշխատանքային պայմանագրի լուծման դեպքերի համար.

«Մասնավորապես նախատեսված է աշխատանքի էական պայմանների փոփոխության դեպքում աշխատողին  նախապես ծանուցելու, այդ ծանուցման ժամկետները խախտելու դեպքում տուժանք վճարելու, ինչպես նաև արձակման նպաստ վճարելու պահանջ: Հարկ է նշել, որ նախագծով առաջարկվող կարգավորումը կարող է բացասաբար անդրադառնալ աշխատողի աշխատանքային պայմանների բարելավման վրա: Օրինակ, գործատուն ունենալով բավարար հնարավորություն և ցանկություն՝ բարձրացնելու աշխատողի աշխատավարձը, կարող է զերծ մնալ նման գործողություններ իրականացնելուց՝ նկատի ունենալով, որ եթե կազմակերպությունում որևէ փոփոխություն տեղի ունենա էական պայմանների ծավալների, տնտեսական կամ տեխնոլոգիական, ապա այդ պայմաններում նա չի կարողանա կատարել գործողություններ, հետևաբար, նպատակահարմար չի գտնի բարելավել աշխատողի աշխատանքի էական պայմանները»,- զեկույցում ասաց Մանե Թանդիլյանը և հավելեց, որ նման պայմաններում գործատուները ընդհուպ կարող են ճկունություն դրսևորելու նպատակով չգրանցել իրենց աշխատողներին, ինչը հետագայում խնդիրներ կառաջացինի:

Մանե Թանդիլյանն իր զեկույցի վերջում նշեց, որ, հաշվի առնելով հանգամանքները, Աշխատանքային օրենսգրքի տվյալ կետերի փոփոխության կարիք չկա:

Կառավարությունը հավանություն չտվեց «Ծառուկյան» խմբակցության  պատգամավորների առաջարկած Աշխատանքային օրենսգրքի փոփոխության նախագծին: