Պուտինի կրքոտ մրցակցուհին դուրս է եկել ընտրապայքարից. ԼՈՒՍԱՆԿԱՐՆԵՐ

ՌԴ նախագահական ընտրություններում «Բարի Գործերի» կուսակցության կողմից որպես թեկնածու առաջադրված լրագրող, երգչուհի, դերասանուհի և վերջապես իրավապաշտպան Եկատերինա Գորդոնը որոշել է չմասնակցել ընտրություններին ու ինքնաբացարկ է հայտարարել: 

Օրեր առաջ Եկատերինան հայտարարել է, որ չի ուզում այլևս մասնակցել Ռուսաստանում տեղի ունեցող «Շոուին և Ֆարսին»

Հիշեցնենք, որ ՌԴ օրենսդրությամբ ԿԸՀ-ում նախնական գրանցում անցած և կուսակցությունների կողմից առաջադրված թեկնածուները մինչև հունվարի 31-ը ընտրական հանձնաժողով պետք է ներկայացնեին 100 հազար ընտրողի ստորագրություն՝ առաջադրվելու համար: 

Գորդոնը հայտարարել է, որ պահանջվող 100 հազարի փոխարեն հավաքել է 105 հազար ստորագրություն, սակայն այլևս չի ուզում շարունակել մրցապայքարը ու դուրս է գալիս խաղից: Ի դեպ, նա հրապարակել է ոչ թե ստորագրված ցուցակների լուսանկարը, այլ արկղերի լուսանկար, որտեղ ենթադրաբար հավաքված ստորագրություններն են: 

Հիշեցնենք, որ հայտնի երգչուհի-իրավապաշտպանը ՌԴ նախագահական ընտրություններում առաջադրված այն թեկնածուներից էր, որին ճանաչում էին ոչ թե իր քաղաքագիտական հանճարեղ մտքերով ու իրավապաշտպան գործունեությամբ, այլ սկանդալային պատմություններով, մերկ ու կիսամերկ լուսանկարներով: 

Ի դեպ, շատ վերլուծաբանների կարծիքով, Եկատերինա Գորդոնը Քսենիա Սոբչակի հետ միասին  համարվում էին  նախագահական ընտրությունների «գլխավոր աղը», քանի որ թե Գորդոնը և թե Սոբչակը հայտնի են իրենց էքսցենտրիկ ու էմոցիոնալ պահվածքով և նախագահական ընտրությունների քարոզարշավը Ժիրինովսկու հետ միասին կարող էին վերածել իսկական շոուի:

Հատկանշական է, որ Եկատերինան վատ հարաբերություններ ուներ նաև Քսենիայի հետ: 2008 թվականին ռուսական «Մայակ» ռադիոկայանի ուղիղ եթերում Քսենիան և Եկատերինան լեզվակռիվ էին սկսել, որի արդյունքում Գորդոնը թեև մեծ ճանաչում ձեռք բերեց, բայց հեռացվեց աշխատանքից: 

Եկատերինա Գորդոնը նաև ամուսնական կյանքում հարուստ, բայց միևնույն ժամանակ չհաջողված կենսափորձ ունի:

Ներկայիս ազգանունը Եկատերինան Ժառանգել է առաջին ամուսնուց՝ հայտնի լրագրող ու հեռուստամեկնաբան Ալեքսանդր Գորդոնից: 6 տարվա համատեղ կյանքից հետո զույգերը բաժանվեցին առանց սկանդալի, դատ ու դատաստանի:

Երկրորդ ու երրորդ ամուսինը հայտնի իրավաբան Սերգեյ Ժորինն էր: Ամուսնացան 2011 թվականի ամռանը, մեկ ամիս անց՝ ընտանեկան ծեծկռտուքի արդյունքում  Եկատերինան ուղեղի ցնցումով հայտնվեց հիվանդանոցում: Գործը հասավ ապահարզանի:

2014 թվականին Ժորինն ու Գորդոնը հաշտվեցին ու կրկին ամուսնացան, բայց մեկ ամիս անց նորից բաժանվեցին:

Չորրորդ անգամ Եկատերինան բախտը փորձեց 2017 թվականին: Նրա նոր ընտրյալը գործարար Իգոր Մացինյուկն է: 

Ինչևէ, ինքնաբացարկ հայտնելուց հետո Եկատերինա Գորդոնը որոշել է, այնուամենայնիվ, դուրս չգալ մեծ քաղաքականությունից: Մտադիր է հիմնել Սահմանադրա-ժողովրդավար նոր կուսակցություն, որի նպատակն է լինելու պաշտպանել ՌԴ Սահմանադրությունը և Ռուսաստանը դարձնել «Սոցիալական պետություն»: