Բոլորը ժիգուլիներո՞վ են կատարել այդ խախտումները,  էն թանկարժեք՝ 50.000-անոց մեքենաներով չե՞ն կատարել. ՀՀԿ-ականները համաներման նախագծի շուրջ մտահոգություններ ունեն

ԱԺ-ում այսօր քննարկում էին մի շարք վարչական իրավախախտումների համար կիրառված տուգանքների համաներման մասին օրենքի նախագիծը, որով առաջարկվում է համաներում իրականացնել վարչական իրավախախտում կատարած վարորդների նկատմամբ։ ԱԺ ՀՀԿ խմբակցության անդամ Միհրան Պողոսյանն առաջարկել էր, որ ներվեն ոչ միայն գումարները չվճարածները, այլև բարեխիղճ վճարածները: Կառավարությունը պատգամավորի առաջարկը չէր ընդունել:

«Մենք պետք է հավասարություն դնենք այն վարորդների միջև, որոնք վճարել են այդ տուգանքների համար, և նրանց, ովքեր չեն վճարել»,- Ազգային ժողովի արտահերթ նիստում հայտարարեց Միհրան Պողոսյանը։

Պատգամավորի խոսքերով՝ եթե պետությունը 13.5 միլիարդ դրամ կարող է հատկացնել դրա համար, պետք է այդքան էլ հատկացվի այն վարորդների համար, որոնք վճարել են: Նրա կարծիքով՝ սա բարեխիղճ վարորդների նկատմամբ ոչ համարժեք, ոչ ճիշտ մոտեցում է։

Իսկ նույն խմբակցության անդամ Խոսրով Հարությունյանն էլ ասաց, թե խոսքը չի կարող լինել համաներման մասին, խոսքը կարող է գնալ պարտքը զիջելու մասին։

«Պետությունը որոշում է կայացրել պարտք զիջել, համաներում չկա ու չէր էլ կարող լինել։ Հետևաբար՝ այդ պարտքի զիջման ընթացքում կարող են լինել տարբեր մոտեցումներ։ Բոլոր դեպքերում բարեխիղճ վճարողների հարցը նույնպես պետք է արձանագրված լիներ»,- ասաց Հարությունյանը։

Նա համոզված է, որ այդ քայլն անրաժեշտ էր անել, բայց համոզված չէ, որ դրանով բուժում են հիվանդությունը։

«Եթե մենք շատ կտրուկ, համակարգային փոփոխություններ չանենք, այս նույն երևույթը կմնա»,- նշեց նա։

Նա նաև հայտարարեց, որ այսօր փողոցներում ամենաանկարգ վարորդները տաքսիստներն են: Պատգամավորի խոսքերով՝ ՃՈ տուգանքների պարտքի մոտ 70-80 տոկոսի տերերը տաքսիստներն են: Նա առաջարկեց կառավարությանը ՃՈ տուգանքների համաներմանը զուգահեռ նախաձեռնել նաև համապատասխան քննարկումներ տուգանքների չափերը վերանայելու, ինչպես նաև 1,2,3 անգամ խախտումը կրկնվելուց հետո 4-րդի դեպքում մարդուն վարորդական իրավունքից զրկելու մասին:

Իսկ պատգամավոր Հայկ Բաբուխանյանն չի հասկանում կառավարության և ԱԺ-ի շտապողականությունը: Նա առաջարկեց հնարավորություն ստեղծել՝ հարցերը նորմալ քննարկելու և վիճակը վերլուծելու համար: Նրա խոսքերով՝ երբ կառավարությունը նման  կարևոր նախագիծ է բերում, պետք է նաև վիճակագրություն ներկայացվի՝ այդ խախտողներից քանիսն են աղքատ, քանիսն են հարուստ, ինչ մեքենաներով են կատարել այդ խախտումները:

«Բոլորը ժիգուլիներո՞վ են կատարել այդ խախտումները,  էն թանկարժեք՝ 50.000-անոց, 10.000-անոց, 150.000-անոց մեքենաներով չե՞ն կատարել։ Բերեք, նորմալ ձևով ներկայացրեք հարցը, որ մենք էլ կարողանանք վերլուծենք։ Հիմա մենք սրանով ասում ենք՝ ժողովուրդ, որ չեք վճարել՝ ոչինչ, իսկ ով վճարել է՝ էլի ոչինչ։ 50.000-անոց մեքենայով խախտում են անում, ասում են՝ ես փող չունեմ վճարելու, կամ՝ ես լավ տղա եմ, չեմ ուզում վճարել»,- ասաց Բաբուխանյանը։

Նա ևս մեկ անգամ բարձրաձայնեց իր առաջարկի մասին՝  նրանք, ովքեր վճարել են, տան վաուչերներ: