Գյումրիի ինֆեկցիոն հիվանդանոցում աղիքային ինֆեկցիաներով և շնչուղիների ախտահարումներով հոսպիտալացվածների թիվն ավելացել է

Գյումրիի ինֆեկցիոն հիվանդանոցի մանկական ու մեծահասակների բաժանմունքներում հոսպիտալացումների թիվն ավելացել է։ Տարբեր ախտանշաններով հիվանդանոց տեղափոխվածների մեջ մեծ թիվ են կազմում երեխաները, շատերը  բուժհաստատություն են դիմել սուր աղիքային ինֆեկցիաներով ու վերին շնչուղիների ախտահարումներով: Ըստ մասնագետների, սա աշնան  վիրուսային սեզոնին բնորոշ կանխատեսելի ակտիվացում է, իսկ կլինիկական նշաններն ու գանգատները շատ դեպքերում նման են լինում COVID-19-ին։ Այս պարագայում բոլոր հիվանդները պարտադիր թեստավորվում են:

Երկու շաբաթների ընթացքում ինֆեկցիոնի մանկական բաժանմունքում հոսպիտալացված գրեթե բոլոր երեխաների մոտ նույն ախտանշաններ են ի հայտ եկել՝ սուր աղիքային ինֆեկցիա, թոքաբորբ և վերին շնչառական ուղիների ախտահարումներ։

«Հիվանդների 90 տոկոսը կարելի է ասել երեխաներ են, հիմնականում դիմում են աղիքային խնդիրներով։ Ինչպես գիտեք, ամառն աղիքային վարակների  սրացման սեզոն է համարվում։ Վերջին երկու ամիսների ընթացքում ավելի շատ  հանդիպում են վիրուսային վարակները, այսինքն՝ բացի աղեստամոքսային  տրակտի խանգարումներից, բալիկների մոտ առկա է նաև սուր շնչառական հիվանդության պատկեր՝ երկարատև ջերմություն, հազ, երբեմն նաև թոքաբորբ»,- SHANTNEWS.am-ի հետ զրույցում նշել է Գյումրիի ինֆեկցիոն հիվանդանոցի բժիշկ-վարակաբան Հեղինե Հունանյանը։

Ծանր դեպքեր կամ շնչառական սարքերին միացված  հիվանդներ չունեն, բայց ունեցել են այնպիսի դեպքեր, երբ հիվանդի մոտ  արտահայտված կլինիկական նշանները   առաջացրել են COVID-19-ով վարակված լինելու կասկած, դրա համար բոլորն ուղարկվել են թեստավորման, դրական հաստատումներ երեխաների մոտ չկան։

Անհրաժեշտության դեպքում, Գյումրիի ինֆեկցիոն հիվանդանոցում թեստավորվում են նաև մեծահասակների բաժանմունքում ստացիոնար բուժում ստացող հիվանդները, նրանցից շատերի մոտ ախտորոշվել է երկկողմանի թոքաբորբ, ինչը շատ դեպքերում համարվում է կորոնավիրուսին բնորոշ ախտանշան։

Թոքաբորբով հիվանդներից բացի, մեծահասակների բաժանմունքում  բուժում են ստանում  աղիքային ինֆեկցիաներով, սուր վիրուսային հեպատիտ ախտորոշումներով քաղաքացիներ։ Եվս  մի քանիսն էլ մեծահասակների բաժանմունք են դիմել Արագածոտնի մարզից, որոնց մոտ հաստատվել է  բրուցելոզ հիվանդություն։ Այս պահին հիվանդներից մեկը շարունակում է բուժումը։

«Բրուցելոզով հիվանդները նշում են, որ վարակը տարածվել է  չմշակված կաթնամթերքի միջոցով։ Այս պահին բաժանմունքում ունենք մեկ հիվանդ, բավականին ծանր վիճակում էր  դիմել, հիմա վիճակը կայուն է»,-նշում է Հեղինե Հունանյանը։

Հիվանդանոցի մանկական ու մեծահասակների բաժանմունքներում թեև հոսպիտալացումները ավելացել են, բայց բժիշկները սա համարում ամենաթեթև վիճակը։ Հիվանդների հոսքի ակտիվացման սպասում են աշնան սկզբին, երբ շնչառական վիրուսները գլուխ կբարձրացնեն, այդ թվում և COVID-ը՝ իր նոր տեսակներով։ Կորոնավիրուսային հիվանդությամբ ծանր դեպքերի ավելացման դեպքում, հիվանդանոցը նախատեսվում է կրկին վերապրաֆիլավորել։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։