Հստակ տարանջատել ենք ֆինանսների նախարարության և ՊԵԿ գործառույթները. Դավիթ Անանյան

Մաքսային վարչարարության ոլորտում հիմնական փոփոխությունները կամ նորամուծությունները, որոնք ըստ էության վերաբերում են նոր մշակույթի ձևավորմանը, իրականացվել են վերջին երկու ամսվա ընթացքում: Այս մասին հուլիսի 13-ին լրագրողների հետ հանդիպմանը նշեց ՊԵԿ նախագահ Դավիթ Անանյանը: Նա ասաց, որ հստակ փոփոխություն են նախատեսել և իրականացնում իրենց վարքագծի մեջ, իսկ թե որքանով է դա հաջողվել՝ ձեռնպահ մնաց որևէ գնահատական տալուց:

«Մենք նոր մշակույթ կերտելու ճանապարհին ենք և հետագայում ավելի լավ արդյունքներ ենք ունենալու բնականաբար: Այս պահին մենք կարող ենք մի քանի հարցերի վերաբերյալ հանրությանը հաշվետվություն ներկայացնել որ, օրինակ, հստակ տարանջատում պետք է մտցնենք ինվոյսային և հսկիչ գների կիրառման մշակույթի փոփոխության արմատավորման մեջ: Վիճակագրական առումով հսկիչ գների վերաբերյալ մեր շտեմարանները թարմացման կարիք ունեն. տեղեկատվությունը շատ դեպքերում շուկայական գների հետ այնքան էլ համադրելի չէ: Մենք պետք է արագ մեր շտեմարանները թարմացնենք, ունենանք շուկայականին համահունչ գներ»,- ասաց նա:

Անանյանը նշեց, որ մաքսային հսկողության օրակարգում մի կարևոր հարց էլ են դրել, այն է՝ քննարկվում է նախաբացթողումային՝ նախկինում առկա վարչությունը վերաբացելու հարցի նպատակահարմարությունը: ՊԵԿ նախագահի խոսքերով՝ այսօր աշխարհը գնում է հետբացթողումային գործառույթների ուժեղացմանը, և նախաբացթողումային գործառույթներ ունենալն այնքան էլ հրամայական չէ, բայց սա այն դեպքում, երբ երկիրն ունի հստակ մաքսային հսկողության կանոններ:

ՊԵԿ նախագահն անդրադարձավ նաև նախկինում լայնորեն կիրառվող մի պրակտիկայի, այն է՝ կիրառվում էր որևէ հոդվածով նախատեսված սանկցիայի առավելագույն տուգանքը և դա մատուցվում էր իբրև կոռուպցիոն ռիսկերից խուսափելու կամ այդ ռիսկերը մեղմելու համար է, որ հայեցողական որոշում չկայացվի:

«Մենք գնում ենք այլ ճանապարհով և տվյալ հոդվածով սահմանված իրավախախտումը կատարելու արդյունքում, եթե առաջին անգամ է այդ իրավախախտումը, կիրառում ենք նվազագույն տուգանքը, ապա ձևավորում ենք միևնույն փաստական հանգամանքների շրջանակներում միանման վարչարարության կիրառման մեր պարտականությունը: Մենք նաև սահմանելու ենք, թե տվյալ իրավախախտման դեպքում և միատեսակ կիրառման առումով ինչքան տուգանք պետք է կիրառվի»,- նշեց Անանյանը:

Նա նաև տեղեկացրեց՝ հարկային վարչարարության մեթոդաբանության գծով մի շատ կարևոր բան են իրականացրել՝ հստակ տարանջատել են ֆիննախի և ՊԵԿ գործառույթները՝ հարկային, մաքսային քաղաքականության ոլորտում, այսինքն՝ մի շատ կարևոր սկզբունք կա՝ ՊԵԿ-ը հարկային և մաքսային քաղաքականությամբ պետք է չզբաղվի, վարչական իրականացնող մարմինն այն պետք է իրականացնի առկա իրավակարգավորումների շրջանակներում. օրենսդրության հետ կապված խնդիրները վեր են հանվում, ներկայացվում քաղաքականություն իրականացնող մարմնին՝ ֆինանսների նախարարությանը, որն էլ իր գործառույթներն է իրականացնում: