Ադրբեջանում նշանակվել են արտահերթ նախագահական ընտրություններ

Իլհամ Ալիևի այսօրվա հրամանագրով՝ Ադրբեջանում անցկացվելու են նախագահական արտահերթ ընտրություններ։ Հոկտեմբերին նախատեսված հերթականի փոխարեն արտահերթ ընտրությունները կանցկացվեն այս տարվա ապրիլի 11-ին։

13:58. Իլհամ Ալիևի թեկնածությունն առաջադրվեց

Ադրբեջանի արհմիությունների կոնֆեդերացիան, որին կոչ էին արել ընտրությունների ժամանակ աջակցել գործող նախագահին, արտահերթ ընտրությունների համար առաջադրել է հենց Իլհամ Ալիևի թեկնածությունը։ Ընտրվելու դեպքում սա կլինի Իլհամ Ալիևի 4-րդ ժամկետը նախագահի պաշտոնում․ նա այդ պաշտոնում է 2003 թվականից։ 2016 թվականին անցկացված սահմանադրական փոփոխությունների արդյունքում երկարացվել է նաև նախագահի պաշտոնավարման ժամկետը․ այս անգամ ընտրվելու դեպքում Իլհամ Ալիևը կպաշտոնավարի 7 տարի՝ մինչև 2025 թվականը։

12:24. Ընդդիմությունը դեմ է արտահայտվում

Ադրբեջանից ընդդիմադիր գործիչ Ալի Քերիմլին քննադատել է արտահերթ նախագահական ընտրությունների նշանակումը։

«Հայր ու որդի երկիրը ղեկավարում են 45 տարի, ինչը հակասում է հանրապետության սկզբունքներին։ Իլհամ Ալիևը գիտեր, որ մինչև հոկտեմբեր ընդդիմությունը կարող էր երկարաժամկետ արշավ կազմակերպել ընտրակեղծիքների դեմ։ Այդ պատճառով նա տեղափոխել է օրը, որպեսզի խուսափի ցույցերից ու ընդդիմության՝ թափանցիկ ու դեմոկրատական ընտրություններ անցկացնելու պահանջներից»։

Ադրբեջանցի մեկ այլ ընդդիմադիր գործիչ՝ Ջամիլ Հասանլին, պնդում է, որ երեք շաբաթ առաջ էր եղել հայտարարություն, որ հերթական ընտրություններն անցկացվելու են հոկտեմբերին, և արտահերթ ընտրությունների նշանակումը փաստում է գաղտնի մտադրությունների մասին։

12:16. Ալիևը հանկարծակիի է բերում ընդդիմությանը

Ադրբեջանական ընդդիմադիր Contact.az կայքի վերլուծության համաձայն՝ նախագահական ընտրությունները հոկտեմբերից ապրիլ տեղափոխելը հատուկ է արվում՝ ընդդիմությանն ու միջազգային հանրությանը հանկարծակիի բերելու համար։ Վերլուծության համաձայն՝ մինչև արտահերթ նախագահական ընտրություններ ընկած երկու ամսվա ընթացքում ընդդիմությունը չի կարողանա համախմբվել ու վճռական մրցակցության մեջ մտնել Իլհամ Ալիևի հետ։ Մյուս կողմից՝ միջազգային հանրությունն էլ չի հասցնի ադեկվատ արձագանքել ու ընդդիմանալ Ալիևի ընտրությանը։

12:12. Կոչ արհմիություններին՝ աջակցել Իլհամ Ալիևին

Ադրբեջանի նախագահի օգնական Ալի Հասանովը երկրի արհմիությունների կոնֆեդերացիայի հավաքի ժամանակ հայտարարել է, որ արհմիություններն ընտրությունների ժամանակ մշտապես աջակցել են հենց Իլհամ Ալիևին և հույս է հայտնել, որ այս անգամ ևս կաջակցեն նրան։

11:56. Ադրբեջանում անհասանելի են եղել հեռուստաալիքները

10:50. Հրապարակվում է արտահերթ ընտրությունների մասին հրամանագիրը

Իլհամ Ալիևի ստորագրած հրամանագրով՝ Ադրբեջանի նախագահի արտահերթ ընտրությունները նշանակվում են 2018 թվականի ապրիլի 11-ին։