«Պահեստային կանցլեր», բազմազավակ մայրը և Գերմանիայի պաշտպանության նախարարը

«Ապագան սկսվում է ընտանիքից»:

Ուրսուլա վոն դեր Լեյեն

Մասնագիտությամբ բժիշկ, նախկինում Գերմանիայի Սոցիալական գործերի և աշխատանքի նախարար, 2013-ից  մինչ օրս Գերմանիայի պաշտպանության նախարար, ընդ որում, առաջին կինը այս պաշտոնում: Ուրսուլա վոն դեր Լեյենի կարիերան և կյանքը ուղղակի գլխապտույտ են առաջացնում և այսքանին զուգահեռ նա նաև 7 երեխաների մայր է: Սկզբում մամուլում շատ էին կատակում վոն դեր Լեյենի պաշտոնի մասին՝ ասելով . «Գերմանիայի բանակը լսում է սոպրանո հրամաններ», իսկ շատերն էլ  նրան անվանում էին «պահեստային կանցլեր»:

SHANTNEWS-ը այս անգամ անդրադառնում է աշխարհում հզորությամբ 9-րդ բանակի հրապանատարին՝ Գերմանիայի պաշտպանության նախարար Ուրսուլա վոն դեր Լեյենի կյանքի պատմությանը:

Ուրսուլայի բազմաժանր ընտանիքը

Ուրսուլա վոն դեր Լեյենը ծնվել է 1958 թվականին Գերմանիայի հարևան Բելգիայում՝ Բրյուսել քաղաքում։ Նրա ընտանիքի անդամների մասին Վիկիպեդիայում մի շարք նյութեր կարելի է գտնել: Նրա ապուպապը միլիոնատեր է եղել 19-րդ դարում  բամբակի վաճառքով աշխարհում երկրորդ վաճառականն է համարվել: Պապը հայտնի հոգեբան և փիլիսոփա է եղել, հորեղբայրը՝ հայտնի դիրիժոր, իսկ Ուրսուլայի հորը՝ Էրնստ Ալբրեխտին ճանաչել են ամբողջ Գերմանիայում:  Էրնստ Ալբրեխտը եղել է Ներքին Սաքսոնիայի վարչապետը և ներկայացրել է Քրիստոնյա Դեմոկրատական կուսակցությունը: 4 տարի անց իր թեկնածությունն է դրել Գերմանիայի կանցլերի պաշտոնում, սակայն պաշտոնը զբաղեցնում է նրա հակառակորդը:

Տնտեսագիտությունից բժշկություն

Դպրոցն ավարտելուց հետո 1977-ին Ուրսուլա վոն դեր Լեյենին առաջակեցին ընդունվել Գյոթինգենի համալսարան, որտեղ նա տնտեսագիտություն է սովորել, իսկ 1978-ին հաճախել է Լոնդոնի տնտեսագիտության և քաղաքական գիտությունների դպրոց: Շուտով նա թողնում է տնտեսագիտությունը և ի զարմանս բոլորի ընդունվում է Հաննովերի բժշկական համալսարան, 1987-ին՝ 30 տարեկանում ավարտում է համալսարանը և ստանում է իր առաջին աշխատանքը , որպես բժշկի օգնական: Նույն տարում ամուսնանում է բժիշկ Հեյկո վոն դեր  Լեյենի հետ, շուտով ծնվում է նրանց առաջնեկը և Ուրսուլայի մայրը մտածում է, որ աղջկա կարիերան այսքանով ավարտվեց:

«Մի վախեցեք առաջին քայլը անելուց: Իմ ապագա ամուսնուն առաջինը ես եմ նկատել համալսարնում, սակայն  պատկերացում չունեի ինչպես նրան ավելի մոտ լինեմ կամ ինչպես նրա հետ շփվեմ: Մի օր ես նրան տեսա համալսարանի բակում, նա փորձում էր փոխել մեքենայի անվադող: Ես ուղղակի մոտեցա և առաջարկեցի օգնել, չնայած բացարձակ գաղափար չունեի, թե ինչպես են փոխվում մեքենաների անվադողերը»,- պատմել է Ուրսուլան:

Մոր հետ կոնֆլիկտը խորացավ այն բանից հետո, երբ Ուրսուլան հրաժարվեց թեզը պաշտպանելուց  և որպես գինեկոլոգ մասագիտանալուց: Փոխարենը ամուսնու հետ մեկնում է ԱՄՆ, քանի որ այդ ժամանակ նրա ամուսնուն առաջարկել էին դասավանդել Սթենֆորդի համալսարանում: Մեկնում են երեք երեխայի հետ, վերադառնում են 5-ի հետ:

1999 թվականին 41-ամյա Ուրսուլայի կյանքը մոտավորապես այս տեսքն ուներ՝ 7 երեխա, ընդհատված բժշկական կարիերա և չիրացված մի շարք ամբիցիաներ:

Չորս «K-երի» մարտավարություն

Ուրսուլայի քաղաքական գործունեությունը ոչ թե մարաթոն էր, այլ սպրինտ: Նա կարճ ժամանակահատվածում միանգամից բացարձակ ճիշտ քայլերով բարձրացավ կարիերայի աստիճաններով:

2001-ին նա Իլթեն քաղաքի քաղաքապետն էր, որից հետո տարածաշրջանային խորհրդի անդամ է դառնում: 2003-ին Ներքին Սաքսոնիայի խորհրդարանի անդամ: 2003-ից 2005-ը աշխատել է Ներքին Սաքսոնիայի կառավարության Քրիստինա Վուլֆի գրասենյակում, զբաղվել է սոցիալական հարցերով, ինչպես նաև կանանց խնդիրների, ընտանիքի և առողջապահության հարցերով: Իսկ արդեն 2005-ին Անգելա Մերկելի կողմից նշանակվել է Ընտանիքի, կանանց, ծեր քաղաքացիների և երիտասարդության գործերով դաշնային նախարար:  Այս նախարարությունը զբաղվում է երկրում գենդերային հավասարության և անաշխատունակ քաղաքացիների ապահովման հարցերով: 2009-ին ընտրվել է Բունդեսթագի պատգամավոր, իսկ 2010-ին առաջադրել է իր թեկնածությունը Գերմանիայի նախագահի պաշտոնում: 2013-ին նշանակվել է Գերմանիայի պաշտպանության նախարար:

Ուրսուլա վոն դեր Լեյենը առաջնորդվում է 4 «K-երի» քաղաքականությամբ՝ Kinder- երեխաներ, Kueche-խոհանոց, Kirche-եկեղեցի, իսկ վերջին տարիների ընթացքում էլ ավելացել է չորրորդ տարբերակը՝ K-կարիերան:

Իր հարցազրույցներից մեկում նա նշել է, որ այս նույն մարտավորությունը առաջարկում է իր աշխատողներին և գերմանական բանակում ծառայող զինվորներին:

«Բոլորն էլ կարող են ժամանակ գտնել  ընտանիքի, երեխաների,  հարազատ տան և աշխատանքի համար: Ես իմ աշխատողներին տալիս եմ ամեն ինչ բալանսավորելու հնարավորությունը»:

«Պահեստային կանցլեր» կամ Մերկելի աջ ձեռքը

Գերմանական և արևմտյան լրատվամիջոցները բազմիցս գրում են, որ Ուրսուլա վոն դեր Լեյենի և Անգելա Մերկելի համագործակցությունը նման է գերմանական ֆուտբոլի՝ նրանց դեպքում նույնպես գործում է գերմանական հստակ մեխանիզմը, որի արդյունքում նրանք միմյանց լրացնում են:

Մերկելը չունի երեխաներ, իսկ Ուրսուլան 7 երեխա ունի: Առաջինը հստակ է իր ժեստերում և միմիկաներում, իսկ երկրորդը ավելի էներգետիկ է և ավելի շատ է խոսում ու մեկնաբանություններ տալիս: Նրանք երկուսն էլ պրագմատիկ են և ճշգրիտ գիտություններ են ուսումնասիրել:

Մեդալի հակառակ կողմը

Ուրսուլա վոն դեր Լեյենին լրատվամիջոցները հաճախ անվանում են սեփական PR-ի նախարար: Սկզբնական շրջանում շատերը հիանում էին նախարարի կերպարով, սակայն ժամանակի ընթացքում չար լեզուները սկսեցին խոսել, որ Գերմանիայի պաշտպանության նախարարը չի հասկանում ոչնչից, նա զբաղվում է  սեփական PR-ով:

Ինչպես նաև նշում են, որ նրա վարած քաղաքականությունը կրում է «Բոլորի և ամեն ինչի դիմաց» կարգախոսը, նա ձգտում է կոտրել բոլոր եղած և չեղած կարծրատիպերը և աշխատում է միայնակ: Իսկ շատ հաճախ ասում են, որ Ուրսուլան չափազանց կեղծ է և ձևական:

Իսկ քննադատությունների նոր ալիքները բարձրացան այն բանից հետո, երբ նա Բունդեսթագում օրենքի աբսուրդ նախագիծ առաջարկեց մանկական պոռնոգրաֆիայի տարածման արգելքների մասին: Այս նախագծից հետո Ուրսուլան մի շարք թոք շոուների մասնակցեց և շատ քննադատութունների արժանացավ:

Այսքանից հետո նաև համացանցում մեծ քննարկումների ալիք բարձրացրեց նրա ու Ջորջ Քլունիի համբույրը և Հյու Ջեքմանի հետ գրխառնությունը: Քաղաքագետները փաստում են, որ Ուրսուլան ավելի շատ դեղին մամուլում է հայտնվում, իսկ լուրջ թերթերը հազվադեպ են իրեն հիշում: