Շիրակի մարզում հանցագործության դեպքերի թիվը նվազել է, սպանության չբացահայտված դեպքեր չկան․ Շիրակի մարզի դատախազ

Այսօր լրագրողների հետ հանդիպմանը Շիրակի մարզի դատախազ Գուրգեն Գրիգորյանը ներկայացրել  է անցած ինն ամիսներին կատարված և  բացահայտված հանցագործությունների դեպքերի վիճակագրությունը։ Ըստ մարզի  դատախազի՝ նախորդ տարվա նույն ժամանակահատվածի համեմատ՝ մարզում  բնակարանային և այլ  գողությունների թիվը  նվազել է, ավելացել են ճանապարհատրանսպորտային պատահարների դեպքերը։

Նախորդ 9 ամիսների ընթացքում արձանագրված սպանության դեպքերը, նախորդ տարվա նույն ժամանակահատվածի համեմատ, մեկով ավելացել են, նույնքանով պակասել են սպանության փորձի դեպքերը։ Դիտավորությամբ առողջությանը վնաս պատճառելու 13 դեպք է գրանցվել, որից 10-ը բացահայտված  է։

«Հրազենի, ռազմամթերքի ապօրինի շրջանառության 51 դեպք է արձանագրվել, էստեղ  ունենք դեպքերի աճ 20-ով, որն հիմնականում պայմանավորված է  բնակչության շրջանում  տարված բացատրական  աշխատանքներով։ Ունենք ավազակային  հարձակման 2 դեպք, աճել են դեպքերը 1-ով, ցավոք, 2 դեպքերն էլ մինչև օրս  բացահայտված չեն»,- ասել է մարզի դատախազը։

Նախորդ տարվա համեմատ նվազել է բնակարաններից ու ավտոմեքենաներից կատարված գողությունների թիվը։ Արձանագրված 164 գողության դեպքերից 31-ը բնակարանային են։ Ըստ դատախազի՝ որոշ դեպքերում քաղաքացիները խուսափում են իրավապահ մարմիններին դիմել, գողության դեպքերը նվազել են նաև կանխարգելիչ միջոցառումների արդյունքում։

«Բազմաբնակարան շենքերի մուտքերում և մոտակայքերում  տեղադրվել են տեսանկարահանող խցիկներ, և դա ևս ունեցել է կանխարգելիչ բնույթ, և կարելի է արձանագրել, որ բնակարանային գողությունների թիվը, դրանով պայմանավորված, նվազել է»,- նշել է Գուրգեն Գրիգորյանը։

Մարզում ճանապարհատրանսպորտային պատահարների թիվն է ավելացել։ Սա, ըստ դատախազի, պայմանավորված է  ինչպես կենտրոնական փողոցներում արագաչափերի ու տեսանկարահանման համակարգերի բացակայությամբ, այնպես էլ ճանապարհային ոստիկանների իրականացրած ծառայության անարդյունավետությամբ։

«Ճանապարհային ոստիկանության կողմից նախականխարգելիչ միջոցառումներին ուղղված գործողությունների որոշակի  թերություններով կատարելն է, առավել հաճախ ճանապարհատրանսպորտային  պատահարներ արձանագրված վայրերում  համակարգված  ծառայություն  չիրականացնելը, գիշերային և երեկոյան ժամերին  թույլ հսկողություն իրականացնելը, վարչական իրավախախտումներ թույլ տված վարորդների նկատմամբ խիստ վարչաիրավական միջոցներ չձեռնարկելը»,- նշել է մարզի  դատախազը։

Ավելացել են անչափահասների ներգրավվածությամբ հանցագործությունները, անցած ինը ամիսների ընթացքում հանցագործություն են կատարել 28 անչափահասներ։ Մարզի դատախազությունում ու քննչական մարմիններում են գտնվում նաև համայնքների ղեկավարների կողմից չարաշահումների վերաբերյալ քրեական գործեր։ Դրանցից 5-ը վերաբերում է  գյուղական համայնքներում բջջային օպերատորներին ալեհավաքային կայաններ տեղադրելու համար  անօրինական տրամադրված հողակտորների վարձակալությանը։ Պետական բյուջե է վերականգնվել  16 միլիոն դրամ։ Նախաքննության փուլում է գտնվում նաև Սև բերդ ամրոցի հարակից  հողամասերի օտարման  գործը, իրավապահները  փորձում են պարզել  տարածքների օտարման իրավաչափության գործընթացը։