Թարխանյանը ենթադրում է, թե ինչու է Էռնեկյանը քանդում Զվարթնոցի հին շենքը

Զվարթնոց օդանավակայանի հին շենքի ճակատագիրը. գնահատկան նոր նախագծին. այս թեմայով այսօր ասուլիս էր հրավիրվել Երևանի ակումբներից մեկում:

Ասուլիսին մասնակցում էր նաև Զվարթնոցի հին մասնաշենքի համահեղինակ Արթուր Թարխանյանի դուստրը՝ Անահիտ Թարխանյանը: Նա խոսել է իր ենթադրություններից, թե ինչու է  Երևանի «Զվարթնոց» օդանավակայանի սեփականատեր Էդուարդո Էռնեկյանը ցանկանում քանդել 1980-ականներին կառուցված շինությունը: Ըստ Թարխանյանի՝ Էռնեկյանը ամենայն հավանականությամբ ցանկանում է վաճառել օդանավակայանների իր բիզնեսը:

«Ռելակացիա են անում իրանց բիզնես ծրագրերը: Մի բնագավառից, մյուս բնագավառը: Եկեք մի կողմի դնենք մեր էմոցիոնալ մտքերն ու հասկանանք՝ ինչպես է վարվում բիզնեսմենը՝ իր խնդիրն է բարձր գնով վաճառել իրեն պատկանող ապրանքը: Այդ ապրանքը ՀՀ-ում օդանավակայանն է, ինչքանո՞վ կարող է վաճառել ինքն այդ օդանավակայանը, մեծ հարցական է, որովհետև ցանկացած մարդ, ով գալու է գնի այդ օդանավակայանը, նայում է, որ կողքը ևս մեկ օդանավակայան կա և գինը, պարզ է, նվազում է:  Որպեսզի մաքսիմալ բարձր վաճառի այս օդանավակայանը, անհրաժեշտ է մյուսը քանդել», – ասել է Անահիտ Թարխանյանը:

Ըստ Թարխանյանի՝ ինքը նաև որպես բիզնեսի ներկայացուցիչ է այս եզրակացությանը հանգել:

«Ցանկացած լոգիկայից դուրս է մարդկանց վարվելաձևը, եթե փորձում ես հասկանալ՝ իսկ ինչի՞ եք դուք դա անում, պատասխանը չունենք: Մենք գիտենք, որ սա արժեք է, մենք գիտենք, որ դա հնարավոր է վերանորոգել, մենք գիտենք, որ դա կարող ենք նորից դնել շահագործման, բայց գիտենք նաև, որ նա մնում է պետական: Կա տարբերություն պետականի և մասնավորի մեջ», – ասել է Անահիտ Թարխանյանը՝ հավելելով, որ ինքն այլ բացատրություն չի տեսնում այս ամենի մեջ: Իր գնահատկանը նույնն է.

«Սա նման է այն բարբարոսությանը, որը թալիբներն արեցին՝ քանդելով Բուդդայի հուշարձանը, նման է այն բարբարոսությանը, որը ԻԼԻՊ-ն արեց՝ քանդելով Սիրիայում Պալմիրան, և մենք այսպիսի բարբարոսությա՞մբ ենք ուզում մտնել ԵՄ-ի հետ համագործակցության նոր պայմանագրի մեջ: Դա՞ է Հայաստանի ապագան», – ասավ Զվարթնոցի հին մասնաշենքի համահեղինակ Արթուր Թարխանյանի դուստր Անահիտ Թարխանյանը:

Հիշեցնենք, որ  քաղաքացիական ավիացիայի  գլխավոր վարչությունը  e-draft.am  կայքում արդեն իսկ  քննարկման է ներկայացրել «Զվարթնոց» միջազգային և Գյումրու  «Շիրակ» օդանավակայանների կոնցեսիոների կողմից ներկայացված 2018-2022 թվականների Մաստեր Պլանի նախագիծը։

Նոր պլանով նախատեսվում է նստեցման հատվածի ընդլայնում, վազքուղու վերանորոգում, կառամատույցի վերանորոգում, պարագծի ինտեգրված անվտանգության համակարգ, վառելիքալցավորման կայանի արդիականացում, տեխնիկական սարքավորումների զննում  և մի շարք այլ նմանատիպ փոփոխություններ։

Զվարթնոցի հին մասնաշենքի ճակատագրով անհանգստացած ճարտարապետները պնդում են, որ  արդիականացման քողի ներքո արգենտինահայ գործարար Էդուարդո Էռնեկյանը, որին կոնցեսիոն կառավարմամբ հանձնվել է  օդանավակայանը, նպատակ ունի ամբողջությամբ քանդել «Զվարթնոց» օդանավակայանի հին շենքը։