Գյումրիի Covid բուժման երկու կենտրոններում ազատ մահճակալներ չկան․ հոսպիտալացվում են ծայրահեղ ծանր հիվանդները

Գյումրիի Covid բուժման երկու կենտրոններում ազատ մահճակալներ չկան, նույնիսկ բուժօգնության դիմած միջին ծանրության հիվանդներին չեն հոսպիտալացնում: «Գյումրի» բժշկական կենտրոնում և ինֆեկցիոն հիվանդանոցում բուժում են ստանում նաև Հանրապետության տարբեր բնակավայրերից ու մայրաքաղաքից ուղեգրված հիվանդները: Նոր շտամով Covid-ի բուժման ընթացքը բարդ է ու անկանխատեսելի, ինչի պատճառով  համավարակի 4-րդ ալիքի  դեմ պայքարը դարձել է դժվար, իսկ մահացության ցուցանիշը, նախորդ տարվա համեմատ, բարձր է:

«Գյումրի» բժշկական կենտրոնի Covid բաժանմունքի մահճակալային ֆոնդն ամբողջությամբ զբաղված է, թերապևտիկ և տրիաժ բաժանմունքներում հոսպիտալացված հիվանդների 90 տոկոսի մոտ ախտորոշված է երկկողմանի կամ ծանր ընթացքով թոքաբորբ, թեստավորումների մեծ մասի պատասխանները դրական են:

«Եթե սրանից մի քանի օր առաջ կարող էի ասել` 100 տոկոս ծանրաբեռնվածություն էր, հիմա կասեմ` 120 տոկոս է ծանրաբեռնված բաժանմունքը, որովհետև մեր նախատեսված 70 մահճակալների փոխարեն այս պահի դրությամբ զբաղված է 80 մահճակալ»,-SHANTNEWS.am-ի հետ զրույցում նշել է «Գյումրի» ԲԿ-ի փոխտնօրեն Արմեն Խաչատրյանը։

Ինֆեկցիոնի հիվանդասենյակներում  ևս ազատ մահճակալներ չկան։ Շտապօգնության մեքենաներով ամեն օր տասնյակ հիվանդներ են տեղափոխվում  բուժհաստատություններ, ստացիոնար բուժման են ընդունում միայն ծանր ախտորոշումով  հիվանդներին: Կենտրոններից միջին ծանրության քաղաքացիներին ստիպված տուն են ուղարկում, լինում է նաև այնպես, որ ծանր վիճակում գտնվողներին տեղափոխում են Երևանի կլինիկաներ։

Բաժանմունքների գերբեռնվածության պատճառով  թթվածնի պահանջարկը վերջին մի քանի օրերին կրկնապատկվել է: «Գյումրի» ԲԿ-ի թթվածնի արտադրամասից օրական 240 բալոն թթվածին է սպառվում, անգամ կարիք է առաջանում հավելյալ թթվածին  ներկրելու, ինֆեկցիոն հիվանդանոցում  թթվածնային սարքերի պակաս է զգացվում:

«Քանի որ հիվանդների մեծամասնությունը ծանր են, և մեր ունեցած փոքրիկ սարքերը չեն բավարարում թթվածնով՝ ծավալը քիչ է, անհրաժեշտություն է առաջացել ավելի մեծ ծավալով թթվածին շնչելու, դիմել ենք առողջապահության  նախարարություն, որպեսզի ապահովեն ևս մի քանի կետ կենտրոնացված թթվածնային համակարգով»,- SHANTNEWS.am-ի հետ զրույցում նշել է «Գյումրի» ԲԿ-ի ինֆեկցիոն բաժանմունքի համակարգող Աստղիկ Բեյբությանը։

Հիվանդներին ընդունելու և ըստ ծանրության աստիճանի տեղաբաշխելու կամար ընդունարանում ու բաժանմունքներում են կենտրոնացվել  մասնագետների հիմնական մասը, ինֆեկցիոնում նաև հավելյալ  բուժանձնակազմ ընդգրկելու անհրաժեշտություն է առաջացել:

Հիվանդների մոտ «Դելտա» շտամը, շնչառական անբավարարությունից ու թոքերի ախտահարումից բացի, սուր ինսուլտների և ինֆարկտի առաջացման պատճառ է դառնում։ Կյանքեր փրկելու համար բուժանձնակազմի պայքարը երբեմն դառնում է անհնար:

Բաժանմունքների ծանր ու ծայրահեղ ծանր հիվանդների թվում շատ են երիտասարդները։ 20-ից մինչև 90 տարեկան հիվանդներից շատերը խրոնիկ հիվանդություններով են։ Ստացիոնար բուժում ստացողների մեջ ունեցել են նաև պատվաստվածներ, որոնց հաջողվել է  հաղթահարել  հիվանդությունը։

Covid բաժանմունքների, մահճակալների զբաղվածությամբ պայմանավորված, հնարավոր է  մարզում նոր  կենտրոն բացելու անհրաժեշտություն առաջանա: Հանրապետությունում վերջին մեկ շաբաթվա ընթացքում արդեն մի քանի բուժման նոր  կենտրոններ են բացվել, որոնք անմիջապես համալրվել են: