Ազգային ժողովը քննարկել է ԿԲ խորհրդի անդամի ընտրության հարցը

Խորհրդարանը հոկտեմբերի 27-ի նիստում քննարկել է Կենտրոնական բանկի խորհրդի անդամի ընտրության հարցը:

ԱԺ ֆինանսավարկային և բյուջետային հարցերի մշտական հանձնաժողովն առաջարկել է Արտակ Չուբարի Մանուկյանի թեկնածությունը: Հարցը քննարկվել է «ԱԺ կանոնակարգ» սահմանադրական օրենքի 135-րդ հոդվածով սահմանված կարգով:

Ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանը ներկայացրել է թեկնածուի կենսագրական տվյալները, մասնագիտական հմտություններն ու աշխատանքային ուղին:

ԿԲ խորհրդի անդամի թեկնածու Արտակ Մանուկյանը ներկայացրել է ընտրվելու դեպքում իր գործունեության առաջնահերթությունները: Դրանք վերաբերում են նոր ֆինանսական նախագծերի իրականացմանը, միասնական չափորոշիչների մշակմանը, թվայնացման օրակարգի սպասարկմանն ուղղված աշխատանքներին, կապիտալ շուկայի զարգացման ծրագրերի իրականացմանը և դրա համեմատական մոնիտորինգին, ֆինանսական կրթվածության ծրագրերին: Արտակ Մանուկյանը կարևորել է ոլորտի խնդիրները քննարկելու առումով հանրության հետ երկխոսությունը բարելավելու անհրաժեշտությունը: Կանաչ տնտեսության օրակարգի առաջմղման հարցում թեկնածուն ընդգծել է կանաչ պարտատոմսերի հավելյալ խթանման գործիքակազմի կիրառումը՝ նշելով, որ այս հարցում դեռևս անելիքներ կան:

Արտակ Մանուկյանը, պատասխանելով պատգամավորների հարցերին, անդրադարձել է գնաճի հետևանքների հաղթահարման հարցում ԿԲ դերակատարությանը, մակրոտնտեսական միջավայրի հսկողությանը, կրիպտոարժույթների կարգավորմանը, ոլորտի արհեստավարժ մասնագետներին երկրում պահելու կարևորությանը, գնումների գործընթացին և այլ խնդիրների: ԱԺ նախագահի տեղակալ Հակոբ Արշակյանի հարցն առնչվել է էլեկտրոնային առևտրաշրջանառությանը և վճարման միջոցներին: Նշվել է, որ մայրաքաղաքի փոքր շրջանառություն ունեցող և մարզային խանութներում էլեկտրոնային վճարման համակարգը գրեթե չի գործում: Արտակ Մանուկյանը կարծիք է հայտնել, որ այս մասով ավելի ռազմավարական ծրագրեր են իրականացվում: Ըստ նրա՝ թափանցիկության աճին նպաստող կարևորագույն գործիք է անկանխիկ շրջանառությունը, որն այլընտրանք չունի:

Իրենց ելույթներում օրենսդիրները խոսել են թեկնածուի մասնագիտական որակների, դաշտում առկա խնդիրների մասին, անդրադարձել որոշ ապրանքների գների թանկացման պատճառներին, գնումների գործընթացին և մրցույթների անցկացմանը, նվազագույն աշխատավարձի բարձրացմանն ուղղված քայլերին և այլն:

ԱԺ «Քաղաքացիական պայմանագիր» խմբակցության տեսակետը հայտնելով՝ Հայկ Կոնջորյանը բարձր է գնահատել Արտակ Մանուկյանի մարդկային որակները և մասնագիտական կարողությունները: Խմբակցության ղեկավարը տեղեկացրել է, որ իրենք կողմ են քվեարկելու առաջադրված թեկնածությանը:

Եզրափակիչ ելույթում ԿԲ խորհրդի անդամի թեկնածու Արտակ Մանուկյանն անդրադարձել է ելույթների ընթացքում հնչած որոշ դիտարկումներին, մասնավորապես գնումների գործընթացի, գների կայունության հարցում ԿԲ դերի վերաբերյալ: Չժխտելով, որ գնաճի հետևանքով սոցիալական որոշակի լարվածություն կա՝ Արտակ Մանուկյանը կարևորել է խորհրդարանում ԿԲ-ի, Էկոնոմիկայի նախարարության և Մրցակցության պաշտպանության հանձնաժողովի ներկայացուցիչների մասնակցությամբ հանրային քննարկումների կազմակերպումը, որի ընթացքում հանրությունը կստանա հուզող հարցերի պատասխանները:

ԱԺ նախագահ Ալեն Սիմոնյանը նշել է, որ «ԱԺ կանոնակարգ» օրենքի 145-րդ 10-րդ մասի համաձայն՝ ԿԲ խորհրդի անդամն ընտրվում է գաղտնի քվեարկությամբ՝ պատգամավորների ընդհանուր թվի ձայների մեծամասնությամբ:

ԱԺ հաշվիչ հանձնախմբի նախագահ Նարեկ Բաբայանը ներկայացրել է քվեարկության անցկացման կարգը, ժամը և տեղը: