ՇՊՀ ուսխորհուրդը բուհում ստորագրահավաք է սկսել․ պահանջում են հոգաբարձուների խորհուրդ ձևավորել և նշանակել ռեկտորի ընտրություններ

Շիրակի պետական համալսարանի ուսանողական խորհուրդը բուհում ստորագրահավաք է սկսել։ Պահանջում են հստակ ժամկետներում  համալսարանում  ձևավորել  հոգաբարձուների խորհուրդ և կարճ ժամկետներում անցկացնել բուհի ռեկտորի ընտրություններ: Ստորագրահավաքին մասնակիցները բարձրաձայնում են նաև  բուհում առկա կրթական գործընթացի ու այլ խնդիրների մասին, որոնց հիմնական հասցեատերը  գոյություն չունեցող հոգաբարձուների խորհուրդն է։

ԲՈՒՀ-ի հոգաբարձուների խորհուրդը լուծարվեց մեկ տարի առաջ: 24 անդամներից շատերն անձնական ու քաղաքական տարբեր պատճառաբանություններով  հրաժարվեցին իրենց լիազորություններից։ ՇՊՀ հոգաբարձուների խորհուրդը օրենքի ուժով լուծարվեց, քանի որ կառավարությունը տևական ժամանակ  բացակա անդամների փոխարեն նոր նշանակումներ չկատարեց:

«Ստացվեց այնպես, որ հոգաբարձուների խորհրդի կազմը նվազեց՝ 24 հոգուց մնացել էինք 11-ը, այսինքն՝ կեսից էլ պակաս ու այդպես խորհուրդը օրենքի ուժով լուծարվեց․․․ Չի կարելի, որ նման մեծ մարզային  գլխավոր համալսարանի կառավարումը թողնել ավտոպիլոտի  կամ  ինքնահոսի, և այն կառավարի ժամանակավոր պաշտոնակատար ռեկտորը՝ արդեն երեք ու կես տարի»,- ասում է ՇՊՀ նախկին հոգաբարձուների խորհրդի նախագահ Լևոն Բարսեղյանը։

Համալսարանի լուծարված հոգաբարձուների խորհրդի նախկին նախագահ Լևոն Բարսեղյանի  գտնում է, որ բուհը առանց կառավարման բարձրագույն մարմնի թողնելն անթույլատրելի է, հենց սրանով էլ պայմանավորված է բուհում կարևոր խնդիրների  լուծման դանդաղ ընթացքը: Ռեկտորի ընտրություններ անցկացնելը հենց այդ խորհրդի գործառույթն է։ Երեք տարվա մեջ երկու անգամ հայտարարվեց ռեկտորի թափուր պաշտոնի համար մրցույթ, արդյունքում՝ ոչ մեկը հաղթող  չճանաչվեց: Երեք ու կես տարի է բուհը ղեկավարում է ռեկտորի ժամանակավոր պաշտոնակատարը, պաշտոնակատարներ են նաև որոշ ֆակուլտետների դեկաններ, ամբիոնի վարիչներ և այլք։

Բուհի ուսանողները թվարկում են այն  բազմաթիվ խնդիրները, որոնք կան բուհում, որոնց  հիմնական մասի կարգավորման ու քննարկման իրավասությունը հոգաբարձուների խորհրդինն է: Ուսանողական խորհուրդն իր ստորագրահավաքով նախարարությանը պահանջ է ներկայացնում  ձևավորել նոր խորհուրդ և անցկացնել  ռեկտորի ընտրություններ:

« Ուսանողական խորհուրդը  բացատրական աշխատանքներ է տարել, ներկայացրել  պահանջները, որ սա անձի դեմ կռիվ չէ, անձի դեմ բողոք չէ, ուղղակի մենք ուզում ենք, որ ամեն ինչ լինի օրենքով և մեր բուհը, որպես մարզային ամենամեծ հաստատություն, տարրական չափորոշիչներին համապատասխան գործելաոճ ունենա և ներքին կառավարման համակարգը վերափոխվի»,- ասում է ՇՊՀ ուսխորհրդի քարտուղար Սուսաննա Բարսեղյանը։

«Մենք երեք տարի արդեն բարձրաձայնում ենք, որ համալսարանում աշխատում են մարդիկ՝ և՛ վարչական մասում, և՛ պրոֆեսորադասախոսական մասում, որոնք ընդհանրապես  կապ չունեն  իրենց հաստիքի հետ, այսինքն՝ պատահական մարդիկ են։ Ինչ վերաբերում է հոգաբարձուների խորհրդին՝ հույս ունեմ, որ նախարարությունը  նոր խորհուրդը ձևավորելուց  հաշվի կառնի, որ խորհրդի մեջ պետք է ընդգրկված լինեն կրթության, գիտության հետ կապ ունեցող մարդիկ և էդ ամեն ինչից գլուխ հանող մարդիկ, որպեսզի մենք չարժանանանք  էն վիճակին, ինչ որ կար նախկին խորհրդի ժամանակ»,-ասում է ՇՊՀ ուսխորհրդի նախագահ Գևորգ Ղուկասյանը։

Ռեկտորի ժամանակավոր պաշտոնակատարը ստորագրահավաքի գործընթացը չմեկնաբանեց, միայն հավաստեց, որ նախարարությունում արդեն խորհրդի ձևավորման գործընթաց է սկսվել:

«Գործընթացը կա, գործընթացը գնում է, միշտ կապը նախարարության հետ կա։ Մենք մեր մասով, ուսանողներն՝ իրենց մասով, հինգ հոգի ընտրել ուղարկել ենք տվյալները լիազորին, լիազորն ու հիմնադիրն էլ իրենց  հնգական  ներկայացուցիչներին են ընտրելու և ներկայացնելու վարչապետի հաստատմանը, և կառավարության որոշմամբ՝ մինչև  դեկտեմբերի 30-ը  հոգաբարձուների խորհուրդը կձևավորվի»,- նշում է ՇՊՀ ռեկտորի ժամանակավոր պաշտոնակատար Երվանդ Սերոբյանը։