Հայ-թուրքական կարգավորման գործընթաց. ինչի՞ մասին են խոսել բանագնացները. Ռուբեն Ռուբինյանի պարզաբանումը

«Հայաստանի Հանրապետությունը կողմ է, որպեսզի առանց նախապայմանների Թուրքիայի հետ սահմանները բացվեն, և հարաբերությունները օր առաջ կարգավորվեն, դա բխում է Հայաստանի և հայ ժողովրդի շահերից»,- խոսելով հայ-թուրքական հարաբերությունների կարգավորման գործընթացի մասին՝ Ազգային ժողովում ասել է Ազգային ժողովի նախագահի տեղակալ, ԱԺ նախագահի պարտականությունները կատարող Հակոբ Արշակյանը:

«Հայաստան» խմբակցության պատգամավոր Ագնեսա Խամոյանը հետաքրքրվել էր, թե  ինչ բանակցություններ են տեղի ունեցել Հայաստանի և Թուրքիայի ներկայացուցիչների միջև։

Հակոբ Արշակյանը, ի պատասխան, նշեց, որ Հայաստանի անկախության հաստատումից ի վեր և այն ժամանակ, երբ Թուրքիան սահմանները փակել է, Հայաստանի կողմից դիրքորոշումը միշտ եղել է այն, որ ՀՀ-ն կողմ է առանց նախապայմանների հարաբերությունների հաստատմանը և սահմանների բացմանը։

«Այդ տրամաբանությունը չի փոխվել, Հայաստանի Հանրապետությունն այժմ էլ հանդես է գալիս այդ դիրքերից, և մենք առանց նախապայմանների կողմ ենք, որպեսզի սահմանները բացվեն, և հարաբերությունները օր առաջ կարգավորվեն։ Դա բխում է Հայաստանի և հայ ժողովրդի շահերից։ Ինչ վերաբերվում է հանդիպման ընթացքում տեղի ունեցած բանակցություններին, այն հաղորդագրությունը, որ ԱԳ նախարարությունը տարածել է, ըստ էության, բնութագրում է բանակցությունների ընթացքը։ Իսկ եթե դուք ցանկանում եք ավելի խոր և ավելի համապարփակ տեղեկություն ստանալ հենց բանակցությունների բուն ընթացքի վերաբերյալ, կարծում եմ, որ թե՛ գործընկերային, թե՛ ինստիտուցիոնալ տեսանկյունից բոլոր մեխանիզմները կան, որպեսզի մենք նման քննարկում ունենանք, և դուք կարողանաք ձեր հարցերը ուղղել»,- ընդգծեց Հակոբ Արշակյանը։

Հարցին  պատասխանեց նաև Հայաստանի կողմից  բանագնաց Ռուբեն Ռուբինյանը:

«Եթե կհիշեք, դեռ նախորդ տարի Ռուսաստանի Դաշնության արտաքին գործերի նախարարության պաշտոնական ներկայացուցիչը հայտարարեց, որ կա գործընթաց, և հայկական կողմը խոսել է ռուսական կողմի հետ Թուրքիայի հետ հնարավոր գործընթաց սկսելու վերաբերյալ, որը հետագայում հաստատեց Հայաստանի ԱԳ նախարարությունը, որից հետո Թուրքիան հայտարարեց հատուկ ներկայացուցիչ նշանակելու մասին, որը ողջունեց Հայաստանի ԱԳ նախարարությունը և նշեց, որ նույնպես հատուկ ներկայացուցիչ կնշանակի, որից հետո թուրքական կողմը նշանակեց իր հատուկ ներկայացուցչին, որից հետո հայկական կողմը նշանակեց իր հատուկ ներկայացուցչին։ Այդպես են ձեռք բերվել պայմանավորվածությունները։ Պայմանավորվածությունները ձեռք են բերվել ռուսական կողմի օգնությամբ, հանդիպումը տեղի է ունեցել Մոսկվայում արտաքին գործերի նախարարության ընդունելությունների տանը։ Հարցրեցիք, թե ի՞նչ նկատի ունեք կառուցողական մթնոլորտ ասելով։ Նկատի ունենք կառուցողական մթնոլորտ։ Հանդիպման արդյունքում Հայաստանի և Թուրքիայի ԱԳ նախարարությունը հրապարակել են մամուլի հաղորդագրություններ, որոնցում ներկայացվել է, թե ինչ են քննարկել հատուկ ներկայացուցիչները։ Հաղորդագրությամբ հանդես է եկել նաև Ռուսաստանի ԱԳ նախարարությունը»,- մանրամասնեց  Ռուբինյանը։