Շիրակի մարզում կառուցված սպանդանոցները սպասում են շահագործման թույլտվության

2020 թ․ հուլիսի 1-ից միս-մսեղիքի սպանդանոցային մորթի պարտադիր պահանջը ամբողջ Հանրապետությունում ենթադրում է բավարար թվով սպանդանոցների գործունեություն, այնինչ, որոշ տարածաշրջաններում մինչ օրս գործող սպանդանոցներ չկան: Ենթակառուցվածքների բացակայությունը խնդիրներ է ստեղծել նաև Շիրակի մարզի մսի վաճառքով զբաղվող անհատների, տնտեսվարողների ու գյուղացիների համար։ Կառուցված մեկ-երկու սպանդանոցները դեռ շահագործելու թույլտվություն չունեն։

Մորթի ենթակա բոլոր կենդանիները պարտադիր պետք է ենթարկվեն զննության, իսկ արյունն ու ավշային հանգույցները՝ լաբորատոր հետազոտության: Սիբիրախտի, խշխշան պալարի, դաբաղի և այլ հիվանդությունների դեպքում կենդանու մորթը սպանդանոցում արգելված է։

«Կենդանին չի ընդունվում այն ժամանակ, երբ չունի ուղեկցող փաստաթուղթ, երբ չկա անասնաբույժի տրամադրած փաստաթուղթը։ Հնարավոր է լինեն դեպքեր, երբ փաստաթուղթն առկա է, բայց  նախասպանդանոցային  զննության ժամանակ հայտնաբերվում է  կենդանու մոտ ինչ-որ մի հիվանդություն, այս ժամանակ միսը խոտանվում է»,- SHANTNEWS.am-ի հետ զրույցում պարզաբանել է «Ֆրանս» ՍՊԸ անասնաբույժ-փորձագետ Արսեն Ալավերդյանը։

Անիի տարածաշրջանում  կառուցված սպանդանոցը զբաղեցնում է մոտ 650 քմ տարածք, այստեղ հնարավոր է ժամում մորթի ենթարկել մինչև 7, իսկ մեկ օրվա ընթացքում՝ 30-50 գլուխ խոշոր եղջերավոր կենդանի: Նման սպանդանոց կառուցելու համար ներդրվել է մոտ 150 միլիոն դրամ, որի մի մասը սեփականատիրոջն է տրամադրվել լիզինգային՝ պետական աջակցության ծրագրով: Կառուցումից առաջ կատարվել է շուկայի ուսումնասիրություն։

«Վիճակագրական տվյալների համաձայն՝ Շիրակի մարզը անասնապահության առումով  առաջատարների ցանկում է, եթե ոչ առաջինը։ Բնականաբար, դա էն հիմնական գործոնն էր, թե ինչու մենք հենց Շիրակի  մարզում սկսեցինք մեր գործունեությունը։ Նաև տեղեկացանք, որ Շիրակի մարզում դեռևս սպանդանոցային գործունեություն ծավալող տնտեսվարողներ չկան, դա նույնպես, կարելի է ասել, դարձավ էն հիմնական գործոններից մեկը, որ մենք սպանդանոց կառուցեցինք հենց Շիրակի մարզում»,- SHANTNEWS.am-ի հետ զրույցում նշել է «Ֆրանս» ՍՊԸ գործադիր տնօրեն Վահե Մխիթարյանը։

Կառուցված սպանդանոցը կսպասարկի Անիի և Արթիկի տարածաշրջանների գյուղացիական ու ֆերմերային տնտեսություններին, արդեն ծրագրում են ևս մեկ սպանդանոց հիմնել Աշոցքի կամ Ամասիայի լեռնային տարածաշրջաններում, որտեղ անասնապահությունն ավելի զարգացած է: Սպանդանոցը պատրաստ է շահագործման, բայց դեռ ՍԱՏՄ-ի թույլտվությունը չունեն։

«Սպասում ենք ավարտական ակտին և լիցենզիայի ստացմանը, ամեն ինչ պատրաստ է, երևի հույս ունեմ՝ մինչև ամսվա վերջ արդեն լիցենզիան կունենանք»,- նշել է սպանդանոցի տնօրենը։

Միսը սպանդանոցից շուկա հասնելու համար մատակարարին կամ գնորդին տրամադրվում է 5-րդ ձևի փաստաթուղթ, իսկ մսի վրա դրվում է համապատասխան կնիք, այսինքն՝ մսի որակի պատասխանատվությունը ստանձնում է սպանդանոցը: Փաստաթուղթը տրամադրում է ՍԱՏՄ-ն:

Անասնապահները սպանդանոցների գործունեությանը կողմ են, բայց մարզում մեկ-երկուսի գործունեությունը հարցի լուծում չէ։ Բակային մորթն էլ գյուղերում մնում է միակ  տարբերակ միսն արագ իրացնելու համար։ Բացի դրանից, անասնատիրոջ համար կենդանուն սպանդանոց  տանելը  ծախսատար է։

 Գյուղացիական տնտեսություններն ասում են, որ անցած տարի անասնագլխաքանակը գյուղերում զգալի նվազել է, խոտ չկար, եղածն էլ թանկ էր վաճառվում։ Անասնակերի խիստ պակասի պատճառով  անասնատերերը շուկայականից էժան գնով վերավաճառողներին են տվել։ Հիմա գյուղերում մորթի կենդանի գտնելը դժվար է, լինելու դեպքում էլ շատ թանկ են առաջարկում։