Գյումրիի կույրերի միավորումը բնական ներկանյութերից բացի կարտադրի թղթե տոպրակներ

Բնական ներկանյութերի արտադրությամբ Գյումրիում սկսեցին զբաղվել դեռ 2 տարի առաջ, երբ Հայաստանի կույրերի միավորման Գյումրիի ուսումնաարտադրական ձեռնարկությունը ինքնաշեն սարքավորումներով և ձեռքի հարմարեցված գործիքներով սկսեցին յուղաներկ և գուաշ ստանալ։ Արտադրված ներկանյութերի փորձանմուշները թեև մասնագետների հավանությանն են արժանացել, բայց դրանք դեռ մեծ սպառման շուկաներ չունեն։ Պատճառն, ըստ կույրերի միավորման, իրենց ապրանքանիշի դեռևս ոչ հանրային լինելն է։ Ամեն դեպքում չեն հրաժարվում բնական ներկանյութեր ստանալ, զուգահեռ սկսել են նաև ստվարաթղթե տուփերի և տոպրակների արտադրություն։

Արտադրանքի առաջին խմբաքանակից մոտ 4 հազար պարկուճ յուղաներկ և մոտ 400 տուփ էլ գուաշ է մնացել։ Շուկայում առաջարկվող տեսականուց տարբերվում է սրանով՝ որպես հումք օգտագործվել են Շիրակի մարզի քարհանքերից ստացված բնական նյութերը, տարբեր գույների քարի փոշին, կտավատի ձեթը և այլն։ Տեղական հումքի շնորհիվ այն շուկայականից անհամեմատ ցածր գին ունի։

 Բնական ներկերից օգտվել են նկարչական դպրոցներն ու մանկապարտեզները, նկարիչները։ Հիմա սպառման տեմպերի նվազումը կապում են համավարակի հետ։ Բայց ուսումնաարտադրական ձեռնարկությունում դա չի խանգարում նոր ուղիներ որոնել արտադրական ծավալները մեծացնելու ուղղությամբ։ Տեսողական խնդիրներ ունեցող աշխատակիցների  հնարավորություններին հարմարեցված ինքնաշեն սարքավորումներն և ձեռքի գործիքներն արդեն կփոխարինվեն ավտոմատ սարքերով, որը մի քանի անգամ կարագացնի յուղաներկերի արտադրությունն ու դրանց փաթեթավորումը։

«Վերջերս մեր կոնստրուկտորական բյուրոյին պատվիրեցի չափաբաժնիչը, որը շատ հասարակ ավտոմատ ապարատ է, կիսաինքնաշեն ու շատ հարմար է լրիվ կույրի համար է, կարող է աշխատել պարկուճները լիցքավորելու համար։ Որ էս հարմարանքը ես սարքել էի, ինքնաշեն է, որ լցվիր տյուբիկները ինքը ջրիկ կեղնիր, էս հարմարանքը էդ հարցը լուծել է, այսինքն պնդի լավ որակով պարկուճները կլցվի, կարող ենք մրցակցել ներկրված յուղաներկերի հետ»,-նշել է  ՀՀ կույրերի միավորման «Գյումրիի ՈՒԱՁ» ՍՊԸ գործադիր տնօրեն Լևոն Ափոյանը ։

Նախկինում պետությունը կույրերի միավորման որոշակի փոխհատուցում էր տրամադրում ձեռնարկատիրական գործունեություն ծավալելու համար, բայց  մի քանի տարի է այդ աջակցությունից զրկված են։ Իրենք են միջոցները գտնում, աշխատատեղ ավելացնում։ Նախկին արագակար թղթապանակների փոխարեն  պատրաստ են արտադրել շուկայում արդիական դարձած թղթե տոպրակներն ու ստվարաթղթե տուփերը։

«Հարմարանքներ ենք սարքել, որ կույրերը տպագրությունից հետո կարող են անել, ցանկացած ընկերութուն կարող է դիմել, մենք իրենց լոգոտիպով կարող ենք տպագրել, ձեռքով ենք դա անում։ Ուղղակի մեզ հնարավորություն տան, որ կարողանանք տոպրակների վաճառքը կազմակերպենք, եթե հնարավոր լիներ, դրսի ներկրումը կանգնեցնեն, մենաշնորհը տան Հայաստանի կույրերին»,-ասում է Շիրակի մարզի  «Կույրերի միավորում վարչության» նախագահ Արա Ներսիսյանը։  

Հիմա երկու արտադրամասերում էլ ցուրտ է, աշխատել հնարավոր չէ, սուղ միջոցները թույլ չեն տալիս տարածքները ջեռուցել։ Ժամանակավոր պարապուրդ է, սպասում են տաք օրերը գա, որ սկսեն տարածքները  բարեկարգել, հարմարեցնել, որպեսզի արտադրական ծավալները կարողանան ավելացնել։