Ջոնսոնը հեռախոսազրույց կունենա Պուտինի հետ

Մեծ Բրիտանիայի վարչապետ Բորիս Ջոնսոնը հունվարի 31-ին Ուկրաինա կատարելիք այցից առաջ հեռախոսազրույց կունենա ՌԴ նախագահ Վլադիմիր Պուտինի հետ,- հայտնում է Reuters գործակալությունը՝ հղում անելով բրիտանական կառավարության ղեկավարի ներկայացուցչին։ «Սպասվում է, որ վարչապետը կզրուցի նախագահ Պուտինի հետ այսօր կեսօրին»։

Ավելի վաղ Ջոնսոնը հայտարարել էր, որ մտադիր է Պուտինի հետ զրույցում բարձրացնել Ուկրաինայի թեման և հորդորել Ռուսաստանի ղեկավարին խուսափել վատագույն սցենարից։ Մեծ Բրիտանիայի վարչապետի խոսքերով՝ ինքը Ռուսաստանի ցանկացած ներխուժում Ուկրաինա աղետ է համարելու ինչպես աշխարհի, այնպես էլ Ռուսաստանի համար։

Նույն օրը նախագահի մամուլի քարտուղար Դմիտրի Պեսկովը լրագրողների հետ ճեպազրույցում նշել է, որ Պուտինը հեռախոսազրույց կունենա հունվարի 31-ին։ Նա պարզաբանել է, որ բանակցությունները տեղի կունենան ժամը 21:00-ի սահմաններում (Մոսկվայի ժամանակով), սակայն չի նշել, թե ում հետ: Հունվարի 31-ին հայտնի դարձավ, որ Ռուսաստանի դեմ Միացյալ Թագավորության նոր պատժամիջոցները կարող են ազդել ռուսական էներգետիկ ընկերությունների ակտիվների վրա։ Ինչպես գրում է The Times թերթը, դրանք կներառեն ակտիվների սառեցում և Ռուսաստանի իշխանությունների համար «ռազմավարական նշանակություն» ունեցող անձանց և կազմակերպությունների Միացյալ Թագավորություն մուտքի արգելք։ Սպասվում է, որ պատժամիջոցների նոր փաթեթը կներկայացվի Մեծ Բրիտանիայի կաբինետի կողմից ամենաուշն այս օրվա ընթացքում:

Պեսկովն ասել է, որ այս տեղեկությունը տագնապալի է Կրեմլի համար։ Նրա խոսքերով՝ Լոնդոնի հայտարարությունը նաև «խաթարում է Մեծ Բրիտանիայի ներդրումային գրավչությունն ու գրավչությունն» ընդհանրապես։

Հունվարի 30-ին Մեծ Բրիտանիայի արտաքին գործերի նախարար Լիզ Թրասը հայտարարեց, որ Մեծ Բրիտանիան ընդլայնելու է Ռուսաստանի դեմ պատժամիջոցները։ Նախարարը նշել է, որ Լոնդոնը պատրաստվում է ընդլայնել պատժամիջոցների  ցանկը, որպեսզի Կրեմլի շահերը ներկայացնող ցանկացած ընկերություն ենթարկվի սահմանափակումների։

Ջոնսոնի և Պուտինի վերջին հեռախոսազրույցը տեղի է ունեցել 2021 թվականի դեկտեմբերի 13-ին։ Զրույցի ընթացքում քաղաքական գործիչները քննարկել են Ուկրաինայում տիրող իրավիճակը։ Ջոնսոնը մտահոգություն է հայտնել ուկրաինական սահմանների մոտ ռուսական զորքերի ենթադրյալ լայնածավալ տեղաշարժերի կապակցությամբ։

Արեւմտյան քաղաքական գործիչներն ու լրատվամիջոցների ներկայացուցիչները բազմաթիվ շահարկումներ են տարածում Ուկրաինայի դեմ ռուսական հնարավոր ագրեսիայի մասին։ Ռուսական կողմը բազմիցս հերքել է նման հայտարարությունները։ Մոսկվան ընդգծել է, որ Ուկրաինա «ներխուժելու» պլաններ չունի։