Նոր ախտանիշներով և հիվանդության բարդ ընթացքով հոսպիտալացումներ Գյումրիի հիվանդանոցներում․ սեզոնային գրիպի դեպքերը շատացել են

Առողջության առաջնային պահպանման բուժհաստատություններ և հիվանդանոցներ քաղաքացիների հոսքը նորից ավելացել է: Ըստ բժիշկների՝ այս անգամ սեզոնային գրիպն է պատճառը, որն ուղեկցվում է այնպիսի նոր ախտանիշներով, որոնք բնորոշ են կորոնավիրուսին և հաճախ թեստավորման անհրաժեշտություն է առաջանում: Գրիպային ախտանշաններով դիմածների մեծ մասը երեխաներ են, որոնց մոտ վիրուսի տարածումն ավելի արագ ընթացքով է։

«Վերին շնչուղիների  հիվանդություններով դիմելիությունը  պոլիկլինիկաներում վերջին շրջանում կտրուկ ավելացել է, մինչև 7-8 տարեկան երեխաների դիմելիությունն է շատացել։ Հիմնական գանգատները որովայնի ցավեր, սրտխառնոց, աղեստամոքսային տրակտի  երևույթներ, հազ, փռշտոց, գլխացավ, մարմնի ջարդվածություն»,- նշում է Գյումրիի  Գրիգոր Նարեկացու անվան պոլիկլինիկայի մանկական բաժանմունքի պատասխանատու  Անահիտ Սանդրոսյանը։

«Գյումրի» ԲԿ-ում ևս գրիպի ու հարբուխի գանգատներով դիմելիությունը, հունվարի առաջին երկու շաբաթների համեմատ, կտրուկ աճել է: Թերապևտիկ բաժանմունքում շաբաթ-կիրակի օրերին ստիպված հիվանդների  դուրսգրումներ են կատարել։ Ազատ մահճակալները մեկուսարանում գտնվող հիվանդների համար են նախապատրաստում։

«Մեկուսարանը  վերջին օրերին  ու հատկապես հանգստյան օրերին բավականին ծանրաբեռնված է եղել։ Այժմ 14 մահճակալներից 12-ը զբաղված են, բոլորը նմուշառվել են, հիվանդների հետագա ուղղորդման  նպատակով սպասում ենք պատասխաններին»,- նշում է «Գյումրի» ԲԿ թերապևտիկ բաժանմունքի վարիչ Լիլիթ Սարգսյանը։

Հոսպիտալացված ու հետազոտված հիվանդների մոտ գրիպի որ տեսակն է, բժիշկները դժվարանում են նշել: Գրիպի շտամը պարզելու համար պետք է հիվանդներից նմուշառում կատարվեր, բայց պոլիկլինիկաներն ու մարզային հիվանդանոցներն լաբորատոր ախտորոշումների հնարավորություն չունեն:

Սեզոնային գրիպին բնորոշ ախտանշաններից բացի, այս անգամ վիրուսն ուղեկցվում է այնպիսի բարդություններով, որոնք բնորոշ չեն սուր շնչառական  համակարգի  ախտահարումներին: Ըստ բժիշկների՝ այդ կլինիկական նշանները երեխաների ու մեծահասակների դեպքում ունենում են տարբեր ընթացք։ Երեխաների մոտ հիմնականում արտահայտվում է սուր ականջացավերով։

Ստացիոնար բուժում ստացող  որոշ հիվանդների  մոտ ախտորոշվում է նաև թոքաբորբ, հիմնականում  կարիք է զգացվում թթվածնային սարքերի: Գրիպի ծանր ընթացքով հոսպիտալածվածների մեծ մասը գրիպի դեմ պատվաստում չի ստացել:

Պոլիկլինիկաների իմունկաբինետները կորոնավիրուսայինին զուգահեռ կատարում են սեզոնային գրիպի պատվաստումները։ Գրիպի և կորոնավիրուսի դեմ պատվաստանյութերը  թույլատրվում է ստանալ միաժամանակ:

«Միաժամանակ երկուսն էլ իրար հետ կարելի է պատվաստվել, խնդիր չի լինի՝ ո՛չ ջերմություն, ո՛չ էլ ուրիշ բարդություն չի առաջանում, հակացուցումներ չկան։ Գրիպի դեմ պատվաստում օրական  իրականացնում ենք 10 և ավելի քաղաքացիների, իսկ երեք ամսվա կտրվածքով մոտ 700 բնակիչ արդեն պատվաստվել է»,- նշում է Գյումրիի  Գրիգոր Նարեկացու անվան պոլիկլինիկայի իմունկաբինետի բուժքույր Նելլի Ղուկասյանը։

Սեզոնային գրիպին հավասար մարզում կրկին  կորոնավիրուսով վարակվածության դեպքերի թիվն է աճում: Մարզի երկու «Քովիդ» բուժման կենտրոնները դեռ  վերաբացելու անհրաժեշտություն մասնագետները չեն տեսնում, բայց «Գյումրի» բժշկական կենտրոնի տրիաժ բաժանմունք ընդունված հիվանդների մոտ օրական հաստատվում է 2-5 դրական դեպք, բոլոր հիվանդները ուղեգրվում են Սպիտակի «Քովիդ» բուժման կենտրոն: