Ինչու՞ են գիտնականները մարդու սրտի բջիջներից ձուկ ստեղծել

Հարվարդի համալսարանի հետազոտողները Էմորիի համալսարանի գործընկերների հետ միասին մարդու սրտի մկանների բջիջներից լիովին ինքնուրույն բիոհիբրիդային ձուկ են ստեղծել։ Նա լողում է՝ կրկնելով սրտի մկանային կծկումները։ Սա իր տեսակի մեջ առաջին փորձն է:  Նախկինում գիտնականները փորձեր են կատարել առնետի բջիջների վրա:

Գիտական ​​աշխատանքի մասին հայտնում է Հարվարդի ճարտարագիտության և կիրառական գիտությունների դպրոցի մամուլի ծառայությունը։

Արդյունքները հրապարակված են Science ամսագրում։ «Բիոհիբրիդային ձուկը նախորդ բիոհիբրիդային ձկների համեմատ բարձր արդյունավետություն է ցուցաբերել և պատկերացում է տվել այն մասին, թե ինչպես կարելի է օգտագործել մեխանիկական և էլեկտրական ազդանշանները՝ մկաններն ինքնաակտիվացնելու համար», – ասվում է հոդվածում:

Բանն այն է, որ 2012 թվականին գիտնականների նույն խումբն օգտագործել է առնետի սրտի մկանային բջիջները՝ ստեղծելու մեդուզայի նմանվող բիոհիբրիդային պոմպ:Ի տարբերություն նախորդ սարքերի (այս բառը կիրառելի է տվյալ դեպքում, քանի որ խոսքը ոչ թե կենդանի էակի, այլ բիոռոբոտի մասին է), վերջինը  պատրաստված է մարդու սրտի մկանային բջիջներից, իսկ դրանք, իրենց հերթին, ստացվում են մարդու ցողունային բջիջներից։ . Սա արվել է առաջին անգամ։

Բիոհիբրիդային ձուկը ընդօրինակում է զեբրաձկան շարժումները։ Նրա պոչի լողակը կազմված է մկանային բջիջների երկու շերտից՝ յուրաքանչյուր կողմում: Երբ մի կողմը սեղմվում է, մյուսը ձգվում է: Այս դեպքում բացվում է սպիտակուցային ալիք, որն առաջացնում է հետագա կծկում, ապա՝ ձգում: Առաջանում է փակ ցիկլ, որի շնորհիվ բիոռոբոտ ձուկը կարող է ինքնուրույն տեղաշարժվել աղի և գլյուկոզայի լուծույթում ավելի քան 100 օր։

Ինչի՞ համար է այս փորձը: Ինչպես պարզաբանում են գիտնականները, դա կբարելավի նրանց պատկերացումները մարդու սրտի մասին և նրանց կմոտեցնի ավելի բարդ արհեստական ​​մկանային պոմպի ստեղծմանը: Այսինքն՝ կօգնի սիրտ աճեցնել։ «Այժմ մենք ցանկանում ենք ավելի բարդ բիոհիբրիդային սարքեր ստեղծել: Եվ մեր վերջնական նպատակն է ստեղծել արհեստական ​​սիրտ, որը կարող է փոխարինել այս օրգանը սրտի արատով ծնված երեխայի մոտ: Դա շատ բարդ գործընթաց է»,- ասում է Հարվարդի համալսարանի բիոինժեներության պրոֆեսոր, առաջատար հետազոտող Քիթ Փարքերը: