Կոռուպցիայի համակարգային դրսևորումներ չկան, պետք է ավելի ուշադիր լինենք, որ առանձին դրսևորումներ էլ չլինեն. Դավիթ Անանյան

ՀՀ ԿԱ ՊԵԿ նախագահ Դավիթ Անանյանը «Հեռանկար»-ի տաղավարում խոսել է մաքսակետում խաղի կանոնների, կաշառք վերցնելու հնարավորությունների և այլնի մասին: Անդրադառնալով երեկ համացանցում տարածված դեպքին, երբ տղամարդը մաքսակետում կոտրում է իր բերած լվացքի մեքենան, քանի որ դրա մաքսազերծման համար գումար էին պահանջել, Անանյանը նշեց, որ մաքսակետում խաղի կանոնները հաճախ կարող են տարընթերցումների տեղիք տալ, նաև բարդ լինել ընկալման տեսակետից:

«Մաքսային իրավակարգավորումների առումով ունենք և՛ ներպետական օրենսդրություն, և՛ ԵԱՏՄ իրավակարգավորումներ, և շատ դեպքերում դրանց միջև կարող են լինել տարընթերցումներ, ուստի հնարավոր է, որ ֆիզիկական անձը նաև այս կամ այն գործառույթն իրականացնելիս կամ ապրանքը բերելիս իր համար անհասկանալի իրավիճակում հայտնվի, բայց դա չի նշանակում, որ մաքսավորը իր գործունեությունը պետք է չիրականացնի»,- ասաց նա:

Անանյանն ասաց, որ անկախ նրանից՝ ֆիզիկական անձը բերում է նոր, թե օգտագործված ապրանքատեսակ, օրենսդրությամբ սահմանված սահմանաչափ կա, սահմանաքանակների վերաբերյալ առավելագույն չափեր կան, որոնք փակցված են և հայտնի են: Անդրադառնալով կոնկրետ դեպքին՝ ՊԵԿ նախագահը նշեց, որ տվյալ անձը բերել էր մի քանի տեսակ ապրանքներ, որոնցից շատերը այդ սահմանաչափը չեն գերազանցել, և դրանց վերաբերյալ մաքսային ձևակերպում չի եղել՝  մաքսային վճարներ կամ մաքսատուրքեր չեն գանձվել, իսկ կոնկրետ այդ ապրանքատեսակը սահմանաչափի առումով գերազանցել է, հետևաբար պետք է մաքսային ձևակերպում ստանար:

Հարցին՝ արդյո՞ք արդեն մաքսակետում կաշառք վերցնելու բոլոր հնարավորությունները փակ են, Անանյանը պատասխանեց.

«Եթե ես ասեմ՝ այո, փակ են, ազնիվ չեմ լինի. կարող եմ մի բան հստակ ասել՝ կոռուպցիայի համակարգային դրսևորումներ գոյություն չունեն: Մենք պետք է ավելի ուշադիր լինենք, որ առանձին դրսևորումներ էլ չլինեն, այ, այդ դրսևորումների առումով դեռ անելիքներ ունենք, չենք բացառում, որ այս կամ այն մաքսավորը կամ մաքսային ծառայության աշխատակիցը, հնարավոր է, գայթակղությանը չդիմանա, դրա համար անում ենք ամեն ինչ, որ այդ դեպքերը բացահայտվեն, և օրենսդրությամբ սահմանված կարգով ընթացք տանք»:

ՊԵԿ նախագահը խոսեց նաև այն մասին, որ քաղաքացիներից շատերը կարծում են՝ թավշյա հեղափոխությունից հետո այլևս ոչ մի ապրանք պետք չէ մաքսազերծել: Նա նշեց՝  այդպիսի վարքագիծ իրենք էլ են նկատել, որ ժողովրդի մոտ առկա զարթոնքային իրավիճակում նաև կա այնպիսի մի «կանխավարկած», թե այլևս սահմաններ գոյություն չունեն, ազատությունը լիարժեքորեն ներհոսել է մեր կյանք, հետևաբար, ապրանքների ազատ ելումուտի կամ սահմանահատման պրոցեսը մաքսային ձևակերպում պետք է չստանա:

«Դա մեր բոլորի ունեցած զարթոնքային պրոցեսների թյուրըմբռնում է: Մենք բոլորս պետք է օրենքի տառը պաշտպանենք: Եթե օրենսդրությունը՝ ԵԱՏՄ կարգավորումները և ներպետական օրենսդրությունը այս կամ այն առումով բարդ են կամ լավը չեն, մենք բոլորս պետք է ջանք գործադրենք, փոխենք այդ օրենսդրությունը, բայց քանի դեռ չենք փոխել, պետք է մեր պարտականությունը լինի կիրառել այդ օրենսդրությունը և լինել դրան համահունչ»,- ասաց նա: