Նախկինում գործող հարկային ռեժիմը հարկման արդարության սկզբունքի հետ որևէ աղերս չուներ. ՊԵԿ նախագահ

Հյուսիս-հարավում ՊԵԿ-ը դեռ գործողություններ չի իրականացրել: ՊԵԿ նախագահ Դավիթ Անանյանը «Հեռանկար»-ի տաղավարում հայտնեց, որ իրենք դեռ տեղեկատվություն են մշակում: Անդրադառնալով հարցին՝ արդյո՞ք հարկային-մաքսայինի աշխատակիցը բիզնես ունենալու իրավունք ունի, և այդ դեպքում նա արտոնություններ ստանում է, Անանյանը պատասխանեց, որ այդ սահմանը շատ նուրբ է: ՊԵԿ նախագահը նշեց, որ կա տեսակետ, համաձայն որի՝ մաքսայինի աշխատակցի՝ բիզնես ունենալու պարագայում կոռուպցիոն ռիսկերը կարող են կրճատվել, սակայն մյուս կողմից՝ բիզնեսում «փայ ունենալը», բիզնես ունենալը, բիզնեսին ուղղորդելը, նրա քաղաքական կամ տնտեսական որոշումներին մասնակցություն ունենալն ուղղակիորեն առնչվում է հովանավորչության հետ, որը քրեորեն պատժելի կարող է լինել:

«Կարևոր չէ՝ բիզնես կա՞, թե՞ չէ, կարևորն այն է, թե բիզնես ունենալու պարագայում անձը օրենսդրությամբ սահմանված կարգով իր բիզնեսի կառավարման լիազորությունները հավատարմագրային կառավարմամբ հանձնե՞լ է մեկ այլ անձի, թե՞ ոչ. եթե այո, ապա բիզնես ունենալու, դրա տնտեսական կամ քաղաքական որոշումների կայացմանը չմասնակցելու, բայց այդ բիզնեսից որոշակի դիվիդենտներ ունենալու առումով կարծում եմ՝ ոչ ոք պետք է սահմանափակում չունենա»,- ասաց նա:

Անանյանը նշեց, որ բիզնեսին անհարկի միջամտությունների մասին ՊԵԿ-ին տեղեկացնելու իրենց հայտարարությունից հետո դեռ շատ կարճ ժամանակ է անցել, և իրենք դեռ բողոքներ չեն ստացել: ՊԵԿ նախագահի կարծիքով՝ պետք է նաև զանգերի, այցերի միջոցով դա պարզեն, գնան, շրջեն, նաև տեղում հարցնեն, ոչ թե սահմանափակվեն զուտ իրենց ուղարկվող տեղեկատվությամբ: Նա ընդգծեց՝ դա ինքնանպատակ չէ, ոչ թե պլան են կատարում, այլ ուզում են տեղեկացված լինել՝ ՓՄՁ-ով զբաղվողների մոտ իրականացվե՞լ է կոշտ գործիքակազմով վարչարարություն, օրենքի խախտում տեղի՞ է ունեցել արդյոք: Անանյանը հայտնեց, որ նախ պետք է իրենց ներքին ռեսուրսներով այդ գործերը քննեն, վնասները փոխհատուցեն, մեղավոր աշխատակիցներին պատժեն:

Խոսելով ռեստորանային բիզնեսի ներկայացուցիչների բողոքներից, թե իրենց մոտ ստուգումները շատացել են, Անանյանն ասաց, որ հուլիսի 1-ից օրենսդրությունը փոխվել է. եթե նախկինում արտոնագրային վճար էին վճարում, իսկ հունվարի 1-ից հուլիսի 1-ը՝ արտոնագրային հարկ, ապա կարծում է, որ այդ հարկային ռեժիմը հարկման արդարության սկզբունքի հետ որևէ աղերս չուներ:

«Քաղաքի կենտրոնում և արվարձանում միևնույն քառակուսի մետր սպասարկման սրահ ունեցող հանրային սննդի օբյեկտը կամ հարկ վճարողը նույն հարկն էր վճարում, այսինքն՝ խաթարվել էր հարկման համաչափությունը: Ավելի արդար է ըստ շրջանառության հարկելը, դրա հետ մեկտեղ այնպիսի գործիքակազմ մտցրեցինք, որ փաստաթղթավորման առումով էլ լինի մոտիվացիա. շրջանառության 6 տոկոս՝ հանած փաստաթղթավորված ծախսերի 3 տոկոս, բայց ոչ պակաս՝ շրջանառության 4 տոկոս. մեր գնահատմամբ՝ դա նորմալ հարկային բեռ է տվյալ ոլորտի համար: Այո, կարող է առանձին հարկ վճարողների մոտ մի քանի անգամ դա բարձրանալ, բայց 0-ից տարբերվող հարկային պարտավորությունների դեպքում մի քանի անգամ աճը, կարծում եմ, համադրելի չէ»,- նշեց նա: